Сделать домашней|Добавить в избранное
 
Главная » Медицина - Сахлъи магIарулазе » Тохтуралъул малъа-хъваял
на правах рекламы

Тохтуралъул малъа-хъваял

  • Версия для печати
Добавил(а): istina от 21-04-2017, 11:37
ГIодор ккезегIан чIечIого, заманалда сах гьабизе ккола унти

Къалам кодобе босизе дун тIамуна гьадинаб лъугьа-бахъиналъ. Дица тIалаб гьабулеб участокалда гIумру гьабулей йиго пуланай гIадан. Кида дихъе ячIаниги,  къотIной дандчIваниги, дица гьелда абулаан, дур бидул кьабиги лъикIаб гьечIин, гьелъ дуего зарал гьабизегIан чIечIого, цIуна-къай гьабеян, рихьизе гьарурал дарабиги хIалтIизареян ва захIматалъулгун йикIа-яхъиналъул тартибги хисизабеян. 
Гьелда гIемераб бицана, бидул тIадецуй цIикIкIани, гьелъ бидурихьазе гьабулеб къварилъиялъул хIакъалъулъ. Бищунго загIипал гьел гIадалнахулъ рукIунилан ва, гьезие гъая ккани, тIаде захIматаб унти бачIунилан. КIудияб милатго гьабулароан гьелъ дир рагIабазул. 
Цо къоялъ, ясалъ кверги ккун, гьей поликлиникаялде ячIиндал гьикъана щиб ккарабилан. Бицунеб жо тIубан бичIчIулареб куцалъ кIалъана гьей, ишан гьабун бихьизабуна кваранаб бохги кверги унтун ругилан. Хъата-масан борцана бидул тIадецуй, 200- ялдасаги тIаде бахун бугоан. Гьеб гIодобе ккезарулел дарманазул кIудияб пайдаго ккечIо. ТIокIаб нахътIамичIого йитIана больницаялде, хадуб халгьабизе дунгоги ана. Компьютералъ рахъарал суратаздасан хIакълъана бидурихьалъе  гъая ккун, гIадалнахулъе би баккун  букIин. Тохтуразул мацIалъ гьелде абула инсультилан. Ахираб заманалда гIолохъанлъун  буго унтулезул гIумру. ЦIикIкIарасеб къадар буго бихьиназул. 
Щиб унти гьеб кколеб? Гьеб буго цогидал унтаби цIикIкIиналъул хIасилалда кколеб унти. Гьелда цере кидаго рукIуна гипертонияб унти, атеросклероз, аритмия, рекIел гIунгутIаби, чакаралъул унти, бидурихьазул сакъатлъи  ва гь.ц.  Унти байбихьула кутакалда нахъаса бетIер унтиялдасан, кигIан дагьабгIаги цебехун къулизе кIунгутIиялдасан, ракI багъариялдасан ва бетIер свериялдасан. Кидаго гуро гIадалнахул бидурихьал кьватIулел, букIине бегьула гьезул цояб буччунги. ГIадалнахуе къваригIараб къадаралда би щоларо ва гьенир лъугьине бегьула  цIидасан такрарлъуларел  хиса-басиял, кквезе бегьула палижалъ, махIрумлъизе бегьула каламалдаса. ХIухьел цIалеб, рекIее буюрухъ кьолел гIадалнахул бакIазда гьеб ккани, гIумруялъе хIинкъи буго. 
Гьединлъидал рихха-хочичIого, гIагарал-божараз унтарасе гьабураб тIоцебесеб кумекалда бараб буго гьесул гIумру цIунун хутIи. Кидаго гурелъул аскIов тохтур вукIунев, лъикIаб буго киназдаго лъазе инсульталъул гIаламатазул хIакъалъулъ.  
Унтарав гIакълуялдаса ун гIодов ккезе, лагIдезе бегьула. Гьесул жиндаго хадуб хъаравулъи букIунаро. Гьев гIакълуялдаса инчIого вугони, гьесда абизе ккола гьимеян, кверал тIаде рорхеян, мацI къватIибе битIеян ва щиб бугониги абеян. Гьими букIуна гьетIараб, кIалзул цояб рахъ далун уна, тIаде борхулаго цояб квер цоялдаса нахъе ккола, мацI битIун чIоларо, цо рахъалдехун хъамула ва бицунеб жо магIникъаб, бичIчIулареб лъугьуна.         
ТIоцебесеб иргаялда унтарав санагIаталда вегизавила, хадуб,  телефоналъ ахIун тохтурасул хехаб кумек тIалаб гьабизе ккола. Тохтур тIаде щвезегIан, мацIалда гъоркь кквезе кьезе бегьула эналаприл ялъуни каптоприл. ЛъикIаб буго 2 таблетка фуросемидил кьуни. ВачIарав тохтурасда кинабго бицине ккола, кинаб хIалалда унтарав ватаравали ва гьесие кинаб кумек гьабурабали.
Гьеб унти рокъоб сахгьабулеб унти гуро, хадубккунги гIажизав чилъун унтарав хутIичIого вукIине, кIвараб хIаракат бахъизе кколабищун гIагарда бугеб больницаялде гьев хъамизе.
Цеехун рехсарай гIадан, жиндир заманалда кумек щведал, сахлъана.
Написат Рашидова, 
№1 поликлиникаялъул участокалъул тохтур

Автор: Написат Рашидова, №1 поликлиникаялъул участокалъул тохтур

Газета №: 15, от 21. 04. 2017 Месяц выхода номера газеты. Например января Год выхода номера газеты. Например 2012г.





Уважаемый посетитель, Вы зашли на сайт как незарегистрированный пользователь.
Мы рекомендуем Вам зарегистрироваться либо войти на сайт под своим именем.

Комментарии:

Оставить комментарий

При использовании материалов сайта, активная гиперссылка на сайт Hakikat.Info обязательна!
При использовании материалов сайта в печатных СМИ, на ТВ, Радио - упоминание сайта обязательно!