Сделать домашней|Добавить в избранное
 
Главная » Общество - ЖамгIият » РухIияв цевехъан
на правах рекламы

РухIияв цевехъан

  • Версия для печати
Добавил(а): istina от 17-03-2017, 11:58
Росдал гьоркьохъеб школалда, «ХIакъикъат» газеталъул редакциялъул хIалтIухъабазда ва районалдаса рачIарал гьалбадерида дандчIвай гьабуна цIалдохъабаз, учительзабаз, росдал жамагIаталъ. Хъвадарухъанасул - нилъер рухIиял церехъабазул цоявлъун кколев Ражаб ДинмухIамаевасул цIаралда бугеб школалъул жанахIалъул къадада бан бугоан магIарул газеталъе гIемерал соназ нухмалъи гьабурав Ражаб ДинмухIамаевасул хIурматалда гьабураб хъарщи. Гьенибго гIуцIун букIана Ражабил гIумруялъул ва хъвадарухъанлъиялъул хIакъалъулъ бицунеб бокIон. Тадбир байбихьана ракIалдещвеялъул хъорщода цере тIугьдул лъеялдалъун. Щвана хъвадарухъанас гIумру гьабун букIараб рокъоре. Нижеда цадахъ гьенир рукIана Ражабил вацасул ва яцалъул лъималги. Гьез бицана имгIаласул гIумруялъул хIакъалъулъ. 
Школалъул залалде ракIарун рукIана хъвадарухъанасул росуцоял, гIагарлъи, гьалбал, районалъул бетIерасул заместитель Дибиров ГIабдусалам, росдал бетIер Салманов ГIусман, шагIирзаби Сабигат МухIамадова ва НасихIат ГIабдурашидова. Дандеруссин нухда бачунев Дибиров ГIабдусаламица бицана росуцоясул хIакъалъулъ. Цинги рагIи кьуна ГIали Камаловасе. 
- Ражаб ДинмухIамаев гьавуна 1905 соналда. ЗахIматаб букIана гьесул лъимерлъи. Эмен, росулъа чиги чIван, гIурус ракьалде гочине ккана. Ункъо сон барав Ражабица инсуда цадахъ гIумру гьабуна Орелалда, Тулаялда, Петербургалда. АнцIго соналдасан гьел рокъоре тIадруссана. Ражабица гIахьаллъи гьабула совет хIукуматалъе гIоло гьабулеб къеркьеялъулъ. 15 сон барав Ражаб ккола Буйнакскалъул лъималазул рокъове, гьениса - магIарул лъималазе рагьараб школа-интернаталде. Ражабида лъикI лъалаан гIурус мацI. Гьес бергьенлъиялда лъугIизабуна совпартшкола, хIалтIана Хунзахъ районалъул комсомол организациялъул секретарьлъун. Гьесул бажариги гIуцIарухъанлъиялъе бугеб махщелги бихьун, цIализе витIула Москваялде. ХIалтIана партиялъулгун советиял идарабазда, районалъул газеталъул редакторлъун. Хъвадарухъанлъиялъул махщел цIикIкIарав Ражаб ДинмухIамаев 1931 соналда тасдикъ гьавуна "Социализмалъул байрахъ" газеталъул редакторлъун. 1934 соналда тIамуна "МагIарул большевик" газеталъул редакторлъун. КIудияб хIалтIи гьабуна гьес редакция щула гьабиялъе, гьенире махщел бугел журналистал ракIариялъе, - ян бицана ГIали Камаловас. 
 - Ражаб ДинмухIамаев вукIана Дагъистаналъул адабияталда прозаялъе кьучI лъуразул цояв, магIарул адабияталда - тIоцевесев. 1929 соналда къватIибе биччана гьесул "Бидухъ би" абураб къиса, 1932 соналда - "Хъабчилъ бахIарзал" абураб роман, "Галинал гьалбал" абураб къиса ва цогидалги тIахьал. Гьев гIахьаллъана 1934 соналъул 17 августалда Москваялда тIобитIараб ТIолгосоюзалъул хъвадарухъабазул тIоцебесеб съездалда. Типлисалда, офицерзабазул школаги лъугIизабун, 1943 соналда ана рагъде. 1944 соналъул апрелалда Украинаялъул Тернополь районалъул Заболотниково росдада гIагарлъухъ гIумруялдаса ватIалъана Ражаб ДинмухIамаев,- илан бицана Зикрула Илясовас. 
Гьеб къоялъ Урма росулъ рагIулел рукIана гIумруялъ рачунел лазатал бакънал. Гьел журан рукIана, ихдалил ругьелги босун, росулъе рачIарал хIанчIазул гIажаибал бакъналгун. Хъвадарухъанасул минаялда берчIварабго, цере рачIунел рукIана араб гIасруялъул 30-40-абилел сонал. Гьале гьаб минаялъур рижана магIарул адабияталъул жавгьарлъун кколел пикраби. Гьаниса роржана нилъехъе гьеб къоялъ Урма росулъ рагIулел рукIарал талихIал лахIзатазул цIурал бакънал. 
ГIажаибго лъикIал гIадамал ратана урмасел - изнуго цIехечIого, нижер ракIазулъе лъугьарал гьез бицунеб букIана магIарулазул чарангIан къвакIараб намусалъул, дунялго хIайранал магIарул гIадатазул, гIаламго урхъараб гьудуллъи-вацлъиялъул хIакъалъулъ. Школалъул цIалдохъабазул ва учительзабазул коллективаз бихьизабуна концерт, рекIехъе цIалана Ражабил асараздаса кескал, рихьизаруна хъвадарухъанасул асараздаса, жидецаго хъварал спектакляздаса бутIаби. Урмадерида байрам баркизе рачIун рукIана районалъул художествияб хIаракатчилъиялъул гIахьалчагIиги. КучIдул ахIана дарги ва гIурус мацIазда. 
Гьелеха дол гIумруялъ рачунел лазатал бакъназул цоял - вацлъиялда гIумру гьабун ругел халкъазул талихIалъул кечI, гIумруялъул чIвабзаз рачунел хIикматал саринал. РекIее кIудияб асар гьабуна кIиябго миллаталъул гьудуллъиялъул бицунеб Лаваша районалъул гимналъ. Росдал бегавул Салманов ГIусманица абуна росдал цо къватIалъе Ражаб ДинмухIамаевасул цIар кьезе бугилан. Гьес нусазарго гъуруш биччан буго росуцоясул цо тIехь цIидасан бахъиялъеги. Гьелъие кумек гьабилин абуна ГIали Камаловасги. 
Гьединго хъвадарухъанас гIумру гьабун букIараб минаялъул къадада чIвазе буго ракIалдещвеялъул хъарщиги. 
    

Автор: Шамай Хъазанбиева

Газета №: 10, от 17. 03. 2017 Месяц выхода номера газеты. Например января Год выхода номера газеты. Например 2012г.





Уважаемый посетитель, Вы зашли на сайт как незарегистрированный пользователь.
Мы рекомендуем Вам зарегистрироваться либо войти на сайт под своим именем.

Комментарии:

Оставить комментарий

При использовании материалов сайта, активная гиперссылка на сайт Hakikat.Info обязательна!
При использовании материалов сайта в печатных СМИ, на ТВ, Радио - упоминание сайта обязательно!