Сделать домашней|Добавить в избранное
 
на правах рекламы

Хасаб пикру

  • Версия для печати
Добавил(а): istina от 17-03-2017, 11:54
Жинсияб ва формаялъулаб категориязда цадахъ предметияб цIаралъул кIвар бугеб морфологияб гIаламатлъун ккола гьелъие хасаб падежияб категорияги. Предметияб цIаралъул падежал ккола предложениялъулъги каламалъулъги цогидал рагIабаздехун предметиял цIаразул батIи-батIиял гьоркьорлъаби жидер кумекалдалъун загьир гьарулел грамматикиял формаби. Масала: Муса классалде ана (Муса - асл.п. - подлежащее). Мусаца мугIалимасе жаваб кьуна (Мусаца - акт. п. - подлежащее). МугIалимас Мусае лъикIаб къимат лъуна (Мусае - кьов. п. - хъвалсараб дополнение). Мусал хатI берцинаб буго (Мусал - хас.п. - рекъонккечIеб определение).
Грамматикияб гIуцIиялда бан, авар мацIалда гIемерал падежал руго. Падежазул гIемерлъи мацIалда тIад хIалтIулел гIалимзабаз бихьизабун букIана анцIила ичIабилеб гIасруялъго. Гьелдаса хадуб авар мацIалъул падежияб системаялъул хIакъалъулъ цIех-рех гьабуна батIи-батIиял миллатазул машгьурал гIалимзабаз (А. Шифнер, П.К. Услар, Л.И. Жирков, Е.А. Бокарев, А.С. Чикобава, И.И. Церцвадзе, М.-С. Саидов, Г.И. Мадиева, М.М. МуртазгIалиев, А.Гь. ХIамзатов, У.З. Элдарова, М.Д. Хангереев ва гь.ц.). Жакъа къоялдацин гьел падежазул хIакъалъулъ хъван руго,  хъвалелги руго, жеги хъвазеги руго гIезегIанго гIелмиял хIалтIаби. Амма гьезда киназдаго кIун гьечIо гьеб падежияб система цоккураб тартибалде бачине.
А. Шифнерица кьолеб буго 13 падеж (Schifner A. Versuch uber das Avarische. Memoires de Akademie de St. -  Petersbourg .VII-е,  Serie V, №8. 1962. гь. 64). П.К. Усларида батун буго гIага-шагарго 40 падеж: 6 гIадатаб (аслияб), хутIарал - бакIалъулал (Услар П.К. Этнография Кавказа. Языкознание, III. Аварский язык. - Тифлис, 1889. гь. 37). ГIадатал падежаллъун П.К. Усларица рихьизарун руго цадахълъиялъул ва дандекквеялъул частицабигун аслияб падежалъул формабиги (вацгун, вацгIан). 
Гьесда хадур авар мацIалда тIад хIалтIарал гIалимзабаз гьединал формаби хасал падежаллъун рикIкIунаро (Мадиева Г.И. Морфология аварского литературного языка.- МахIачхъала, 1980. гь. 35). 
Л. И. Жирковасул пикруялда рекъон, авар мацIалда буго 24 падеж (Жирков Л. И. Грамматика аварского языка. - М.,1924. гь. 51). Гьесул пикруялда разилъун йиго У. З. Элдароваги. А. С. Чикобавацаги, И.И. Церцвадзецаги чIезабун буго 24 падеж (Чикобава А. С., Церцвадзе И.И. Аварский язык. - Тбилиси, 1962. гь. 54). М.-С. Саидовас (Саидов М. -С. Аварско-русский словарь. - М,. 1967. гь. 729), Е.А. Бокаревас (Бокарев Е. А. О категории падежа // ВЯ. № 1.- М., 1954. гь. 40-41), Г.И. Мадиевалъ (добго тIехьалда), М.М. МуртазгIалиевас (МуртазгIалиев М. М. Микьго сонил ва гьоркьохъел школазда фонетика ва морфология малъиялъул методика. - МахIачхъала, 1968. гь. 45-50), М. Е. Алексеевас ва Б.М. Атаевас (Алексеев М. Е., Атаев Б. М. Аварский язык. - М., 1998, гь. 50) кьолеб буго 19 падеж. М. Д. Хангереевас (Хангереев М. Д. Категория падежа в аварском языке. - МахIачхъала, 2000. гь. 36) бихьизабун буго 16 падеж (4 гIадатаб ва 12 бакIалъул). А. Гь. ХIамзатовасда (ХIамзатов А. Гь. Падежазул къадар // Гьудуллъи №4. - МахIачхъала, 1998) батун буго 8 падеж. 
Гьеб куцалда гIалимзабаз авар мацIалъул падежазул къадаралда хурхараб суал жеги роцIинабун гьечIелъул, школалъул ва педколледжазул учебниказдаги гьезул батIи-батIияб къадар бихьизабулеб буго, ай, А. ХIамзатовас абухъе, школалъул ва цогидалги лъаялъул идарабазул учебниказул авторалги  "гьез (ай гIалимзабаз) лъураб кьодасан хьвадулел руго". Масала, 4 классалъул учебникалда (ГIалиханов С.З. Авар мацI. 4 классалъе. МахIачхъала, 2011 с., гь. 116-138) кьун буго 16 падеж; 1991 соналъ басмаялда бахъараб щуабилеб классалъул учебникалда (ГIабдулаев М. ГI., МуртазгIалиев М. М. Авар мацI. 5 классалъе. МахIачхъала, 1991. гь. 8-10.) - 19 падеж, цIидасан къачIараб 6-7 классазул учебникалда (ХIамзатов А. Гь. Авар мацI. 6-7  классазе. МахIачхъала, 2008. гь. 35-36) - 16, цересел басмабазул учебниказда (ХIамзатов А. Гь. Авар мацI. 6-7  классазе. МахIачхъала, 1992. гь. 35.) - 8 падеж. Педколледжазе бахъараб тIехьалъул тIоцебесеб басмаялда (ГIабдулаев М. ГI., Сулейманов Я. ва гь.ц. Авар литературияб мацI. Педучилищеялъе тIехь. МахIачхъала, 1965, гь. 58) кьун буго 28 падеж, кIиабилеб  басмаялда  падежазул къадар мухIкан гьабун гьечIо, амма 68 гьумералда кьураб таблицаялда рихьизарурал падежал рикIкIани, гьезул къадар 15-ялде бахуна. 
Гьебго хIал буго школалъул практикаялдаги. Цо-цо районалъул школазда лъазабулеб буго 19 падеж, цогидал районазул школазда - 8 яги 16 падеж. ТIадегIанаб лъайкьеялъул идарабазул практикаялдацин гьеб суал мухIкан гьабун гьечIо.
Жеги роцIинчIел, дагIбаялда ругел суалазул цояб ккола падежазул ахирал аслуялдаса ратIагьариялъул суалги. Гьеб суалалъул захIмалъи бараб буго, падежазде сверулаго, аслияб тун, цогидал падежазда гIемерисел рагIабазул аслу хисиялда. Гьединаб хисараб аслуялда кIиабилеб ялъуни хъвалсараб аслуянги абула. Церехун рехсарал гIалимзабаз, предметиял цIарал падежазде сверулаго, аслияб куцалъ хIисабалде босун буго цо гуреб, цо чанго аслу. Амма аслуги ахирги цоцаздаса ратIа гьарун руго батIи-батIияб къагIидаялъ. Масала, М.-С. СагIидовас аслуялдаса ратIа гьарун руго гьал  хадусел ахирал (рихьизаризин гьел ахирал таблицаялдалъун):       
Таблицаялда рихьизарурал ахирал гьес кьун руго школалъул цIалул тIехьалдаги (СагIидов М.-С. Авар мацIалъул грамматика. 5-6-абилел классазул учебник. - МахIачхъала, 1964. гь. 35-38.). Гьединабго пикру буго мацIалъул цо-цо гIалимзабазулги школалда хIалтIулел мугIалимзабазулги.
Г.И. Мадиевалъ ва гьелдаго цадахъ гIезегIанго гIалимзабаз рихьизарун руго гьал хадусел ахирал:
Аслияб падеж    -    -;
Актив падеж      -    -с, -лъ, -ца, -з;
Хаслъул падеж  -    -ул, -л;
Кьовул падеж    -    -е;
Жинда падеж     -    -да;
Жиндилъ падеж -    -лъ;
Жиндихъ падеж -    -хъ;
Жиндикь падеж -     -кь;
РачIул падежал -    -е;
РатIалъул падежал - -са(н), -а(н). 
ГIага-шагарго гьединалго ахирал аслуялдаса ратIа гьарун руго школалда жакъа къоялда пайда босулеб учебникалдаги (автор А. ХIамзатов). Амма рачIул ва ратIалъул падежазул ахирал гьенир хадурегIелаллъунги рикIкIунел руго, актив падежалъул ахирлъун  -ца гурони бихьизабун гьечIо. Цебехун рехсараб макъалаялда гьес хъвалеб буго: "Авар мацIалъул абуни, гьанжелъагIан батIа гьабулеб буго гIицIго лъабго ахир: -с, -лъ, -ца. ХIакъикъаталда бацIцIадаб, аслияб ахир ккола -ца. -С ва -лъ ккола формативазул, ай форма лъугьинарулел суффиксазул бутIа. Актив падежалда хисичIого, кьибил цIунулел предметиял цIаразул лъугьуна цIияб аслу. Гьале гьел суффиксал: -ас (-асу), -алъ         (-алъу). Гьездаго цадахъ гIемерлъул формаялъул суффиксги -аз (-азу). Гьел цIунула киналго падежиял формабазда". 
Гьединабго пикру загьир гьабулеб буго М.Е. Алексеевасги, Б.М. Атаевасги, М. Д. Хангереевасги. Гьел, актив падежалъул анализги гьабун, рачIун руго гьадинаб хIасилалде: -с, -лъ, -з морфемал актив падежалъул ахираллъун рикIкIине кколаро, щайгурелъул гьел руго, нахъе инчIого, киналго падежазулъ цIунун хутIулел хъвалсараб (ай кIиабилеб) аслуялъул суффиксал.
Падежияб свериялда хурхун бахIс гьабулеб лъабабилеб суал ккола бакIалъул падежазул щуабилеб серия.
Щуабилеб серия тIоцебе чIезабун буго Л. И. Жирковас. Гьеб сериялъул рахъкколел гIалимзаби жакъаги дагьал гьечIо. Гьездаса цояв  М. М. МуртазгIалиевас хъвалеб буго: "Щуабилеб сериялда рекъон, падежазде сверула жаниса гьодорлъи магIна бугел предметазда лъурал цIарал, масала: рукъ, рохь, чемодан, портфель, стол, шкаф, шифоньер, холодильник, гъамас, хьаг, гIеретI, таргьа ва цогидалги. Гьединал цIаразе нилъер мацIалъ ургъараб хасаб падежияб форма ккола жаниб, жанибе, жаниса(н) падежазул форма, ай щуабилеб серия.


Автор: Кавсарат Сулейманова

Газета №: 10, от 17. 03. 2017 Месяц выхода номера газеты. Например января Год выхода номера газеты. Например 2012г.





Уважаемый посетитель, Вы зашли на сайт как незарегистрированный пользователь.
Мы рекомендуем Вам зарегистрироваться либо войти на сайт под своим именем.

Комментарии:

Оставить комментарий

При использовании материалов сайта, активная гиперссылка на сайт Hakikat.Info обязательна!
При использовании материалов сайта в печатных СМИ, на ТВ, Радио - упоминание сайта обязательно!