Сделать домашней|Добавить в избранное
 
на правах рекламы

РакIалдещвей

  • Версия для печати
Добавил(а): istina от 3-03-2017, 10:40
ГIадамал херлъула, гIумру анагIан,
Мун гIолохъанлъулей гIаламат кинаб?
Руччаби сун уна, сонал ранагIан,
Ай мун берцинлъулеб балъголъиго щиб?

Рещалъараб моцIгIан цIвакараб гьурмалъ,
Гьадабго дангъваги добго гьимиги.
Дуе заманацин мукIураб буго,
Дибирил мукIурлъи бицун щибизе…
Гьедин байбихьулеб букIана "ХIакъикъат" газеталъул бетIерай бухгалтер ХIажиева ПатIиматие жиндир хIал Алжаналъуб батаяв Дациев МухIамадрасулица сайгъат гьабураб кечI.
Аби буго, гIадамасул рекIел гIатIилъи гьесул гьурмада бугеб нуралъ борцунилан. ВитIарав вукIана Дациев. Унго-унголъунги гIакъилал умумузул гьел рагIаби ракIалде рачIунаан, ПатIиматида берчIварабго, гьей йихьарабго. Гьейгун гара-чIваридалин абуни, цо батIияб, ургъел тIаса босараб гIадаб асар лъугьунаан.
Араб къарнуялъул ункъоялда анцIабилел соназул авалалда ячIана ХIажиева ПатIимат "ХIакъикъат" газеталъул редакциялде бетIерай бухгалтерлъун. Гьелдаса нахъе араб къоло хадуб соналъ нижее ПатIимат йикIана ригьалъ чIахIиязе яслъунги гIелцоязеги гIисиназеги яцлъунги. Гьел рагIаби гIадат хIисабалда абулел гуро. ХIакъикъаталдаги гьедин букIана.
Лъиениги балъгояб жо гуро, бокьараб идараялда бухгалтерги бухгалтерияги, гьениб гьабулеб аслияб  хIалтIудаса дагьал ратIатIун, жидерго тIадаб ишги тIубан, рукIунеллъи. Гьединлъидал киналго бухгалтерзабазда гуро бичIчIулеб гьенир ругезул хIалтIул хаслъиги гьезул хIажалъабиги. ХIажиевалдайин абуни гIемер лъикI лъалаан  коллективалъул хIалтIул хаслъи, къимат гьабулаан гьезул захIматалъул. Сундехунго гьелъул букIунаан лъикIаб бербалагьи. ПатIиматил гIумруялъул мурадго букIанин абизе бегьула чиясе жиндаса бажарараб кумек гьаби, жинде хIажалъигун вачIарав чи рази гьави. Гьелъие БетIергьанас кьун букIана гьунар гIадан вичIчIизеги, гьесул ургъел-тIалаб рекIелъе биччазеги. Масала, харж щвезегIан, хIажалъи ккун, гIарац кьеян бухгалтериялде вачIарав чи, щиб рес батунги, гьелъ мурад тIубачIого, нахъчIвараб хIужа букIунароан. Гьедин киназго гуро гьабулеб. Гьеб гуребги, цадахъ хIалтIулезул рохел бугелъубги къварилъи ккаралъубги ПатIимат йикIунаан бищунго цеесей гIадан гIадин, гьезда хьолбохъ чIун. Редакциялъул хIалтIухъан яги гьесул цевесев гIага-божарав  чи унта-щокълъани, гьеб тIалабги бетIерай бухгалтералъ жиндего тIаде босулаан. "Балагьилин Дибирица щиб абулебали", - янги абун, гьединаб суалалъ аскIове чи вачIаравго, телефоналъул трубка кодобе босулаан  гьелъ… Гьединлъидалин нижеца ПатIиматил гIумруялъул гьудул Дибиридеги нилъерго Дибирилан абулеб букIараб. Гьесулги, нижерго жанисев чиясул гIадал ракIжубарал гьоркьорлъаби рукIана редакциялъул хIалтIухъабазулгун, гьанжеги гьединалго хутIунги руго.
МагIарулазул аби буго, гIамал рекъон хъвалин къадарилан. Аллагьас цоцазе рижарал, цоял цоязда релълъарал, цого гIамал-тIабигIаталъул гIадамаллъун рихьулаан Дибирги ПатIиматги. Гьезул букIана жидедаса цогиязги мисал босизе рекъараб, кинабго рахъалъ рухIдаллъизе бачIунеб хъизан. Гьезул цоцазде букIараб рокьиялъулги адаб-хIурматалъулги хIакъалъулъ бицунеб, ПатIиматида гьаюраб къо баркун, Дибирица хъвараб кечIалдасан чанго жугьа ракIалдещвезабилин:

Дир гIумру, дир гIишкъу дуй бикьулаго,
Мун хиралъана дий, къо бахъанагIан.
Жакъа гьаюраб къо кIодоги гьабун,
Къочизе виччанте дун дур горбода.

Аминатгун Гъази, ХIажигун цадахъ
Баркула нижеца, хIурулгIин, дуда.
Замана аниги, добго гьимигун
Гьадайго йиго мун, нижер ПатIимат.

Щиб гьабилеб, Аллагьасул хIукмуялдаса  рорчIизе бакI букIунарелъул…
Бухгалтериялъулги экономикаялъулги гIелмуялъул бицине гьел лъалел гIадамазухъа гурони бажариларо. Аммаха бихьараб, лъараб рехсезе бегьула. ГIемер рачIунаан ПатIиматихъе  махщелцоял гьелъулгун гIакълу дандбазеги, гьабулеб-толеб гьикъизеги, хIисаб-суалалъул бицинеги. РачIинарелги кинха, гьелъ кигIанги лъикI лъугIизабидал ДГУялъул экономикияб факультетги, щун букIиндал хIалтIул гIезегIанго бечедаб хIалбихьиги. Гьеб гуребги, гьелда аскIор гIемер рихьулаан, цIалунги лъугIун, гьанжего гьанже махщалил нухде байбихьулел гIолохъанал бухгалтерал-экономисталги. Гьезиеги, эбелалъ лъималазе, учителас цIалдохъабазе гIадин, малъа-хъваял гьарулаан ХIажиевалъ. 
ПатIиматие "Дагъистан Республикаялъул мустахIикъай экономист" абураб цIар кьунин рагIидал, гьадин хъвалеб буго гьелъулго махщелцояв бухгалтер-экономист ЛъаратIа районалъул Колоб росулъа ГIабдулкаримов АсхIабхIажица:

ПатIимат, коллега, баркула дуда,
Мун кIодо гьаюраб тIадегIанаб цIар.
ХIалтIиги гIумруги берцин гьабураб,
Кьерилазда гьоркьоб щвараб бергьенлъи.  

Экономикаги культуриябги,
Кванилъе цIам гIадин, рекъезе гьабе.
ТалихIги, рохелги, аваданлъиги
Аллагь разилъулеб батаги дуе.

У, йикIана гьей Дагъистан Республикаялъул мустахIикъай экономистги экономикиял гIелмабазул кандидатги. Кьун рукIана ПатIиматие цогидал шапакъаталги сайгъаталги. Гьез бицуна ПатIимат жинца гIумруялъе тIасабищараб махщалил унго-унгояй устар йикIарайлъиги. 
ЛъагIел сверана ПатIимат абадияб рокъое аралдаса. Гьей йикIанин, гьечIин, анин абизе захIмат буго жакъа Дибириеги, лъималазеги, гьелъул гIага-божаразеги гIадин, нижееги, гьудул-гьалмагъзабазе ва цадахъ хIалтIаразе. Гьедин, хIакъикъаталда  божизе кIоларого, кIваниги, бокьуларого букIуна нилъер ракIазулъ бакI ккурав, лъалкI тарав лъикIав чи нилъедаса ватIалъараб мехалъ. ПатIимат йикIана гьей лъалейщиназе рекIел хинлъи бикьарай, унго-унголъунги лъикIай инсан. 

                                       

Автор: МухIамад ПатахIов

Газета №: 8, от 3. 03. 2017 Месяц выхода номера газеты. Например января Год выхода номера газеты. Например 2012г.





Уважаемый посетитель, Вы зашли на сайт как незарегистрированный пользователь.
Мы рекомендуем Вам зарегистрироваться либо войти на сайт под своим именем.

Комментарии:

Оставить комментарий

При использовании материалов сайта, активная гиперссылка на сайт Hakikat.Info обязательна!
При использовании материалов сайта в печатных СМИ, на ТВ, Радио - упоминание сайта обязательно!