Сделать домашней|Добавить в избранное
 
на правах рекламы

МахщелчагIи

  • Версия для печати
Добавил(а): istina от 17-02-2017, 14:39
Дагъистаналъул пачалихъияб университетги лъугIизабун, Агъвали росдал гьоркьохъеб школалде хIалтIизе ячIана Заира. Гьелъул анищ букIана районалдаго адаб-хIурмат цIикIкIарай байбихьул классазул мугIалим, жиндирго эбел Салтанатил гIадинаб нух тIаса бищизе ва учительлъун хIалтIизе. Гьелъ тIаса бищана авар мацIалъулгун адабияталъул мугIалимасул махщел. Гьелъие букIана цоги гIилла: рахьдал мацIалъул мугIалим ПатIимат Мухтаровалъ магIарул мацIалде рокьи бижизаби. 

Заира ГIалиева хIалтIизе ячIаралдаса нахъе хисана Агъвали росдал школалъул цIалдохъабазул рахьдал мацIалде букIараб бербалагьиги ва ахир лъуна цоцада релълъарал чIамучIал дарсазе. Заираца жигар бахъана, батIи-батIиял методикиял къагIидабиги хIалтIизарун, мацIалде лъималазул рокьи бижизабизе. Къойидаса-къойиде цIикIкIана магIарул мацIалда тIоритIулел класстун къватIисел тадбиразулъ гIахьаллъулел цIалдохъабазул къадарги, районалъул ва республикаялъул даражаялда тIоритIарал къецазулъ ва олимпиадабазулъ лъималаз кколел цересел бакIалги. Гьеб кинабго букIана мугIалималъул захIматалъул, макьу гьечIел сардазул ва рахIат гьечIел къоязул хIасил. Заира, захIмалъабазе къуркьичIого, цеехун ана.
Гьелъул хIалтIул цебетIеялъул аслияб масъалалъун лъугьана лъималазулъ гIагараб ракьалде, гьелъул тарихалде ва маданияталде рокьи куцай. Гьеб кинабго гьелъ, биун тIолеб месед гIадин, магIарул мацIалъ бессулаан гьезул ракIазулъ. ГIадатиял гурел къагIидаби хIалтIизариялъ цIалдохъабазе хиралъана магIарул мацIалъул дарсалги. Гьелъ жигар бахъулаан щивасда бичIчIизабизе магIарул мацI цIуни ва умумузул тарихгун гIадатал лъазари щивав магIаруласул борч букIин. Камуларо магIарул мацI жидее хIажат гьечIин абулел лъималги умумулги, нилъер мацI цIуничIони, миллатги маданиятги тIагIунеблъи гьездаги бичIчIизабула. 
Заира ГIалиевалъул захIмат гIадада хутIичIо: гьелъие нугIлъи гьабула щварал грамотабаз ва шапакъатаз. Чанго соналъ гIахьаллъана гьей районалъул мугIалимзабазул къецазда ва "МагIарул мацIалъул бищун лъикIав мугIалим-2009" республикаялъул конкурсалда тIоцебесеб бакIалъе мустахIикълъана ва "ДРялъул лъайкьеялъул отличник" цIаралдалъун кIодо гьаюна.
Районалда гьелъ тIоритIана Расул ХIамзатовасул, МухIамад Шамхаловасул ва Сабигат МухIамадовалъул хIурматалда гIуцIарал байрамкъоял. Гьелъул гIуцIарухъанлъиги, тIасабищараб пишаялдехун бугеб рокьиги ва жа-вабчилъиги бихьана районалъулгун республикаялъул нухмалъиялда, ва гъоркьисала гьелъие кьуна "Дагъистаналъул мустахIикъай учитель" абураб цIар.
ХIалтIи нухда бачине бугеб гьунарги бихьун, гьей районалъул культураялъул хIалтIухъабазул гьариялдалъун районалъул нухмалъиялъ Маданияталъул кIалгIаялда методистлъун хIалтIизе тIамуна. Жиндирго аслияб мугIалимасул хIалтIудаса нахъе ккезе течIого бачана Заираца гьеб хIалтIиги. МухIамад Шамхаловас 100 сон тIубаялда бан тIобитIараб тадбирги лъикIаб даражаялда гIуцIана ва нухда бачана гьелъ, гьединго жигараб хIалтIи гьабуна Агъвали росулъ гьесул музей-рукъ рагьизеги. Гьеб хIалтIухъ Заирае ХIурматалъул кагъат кьуна "ХIакъикъат" газеталъул бетIерав редактор ГIали Камаловас.
Махщел тIокIай мугIалим гурейги, Заира ккола лъикIай шагIирги, ункъо лъимадул эбелги. Школалдаго хъвазе байбихьана гьелъ кучIдул, цинги, университеталда цIалулеб мехалъги, гIодоб течIо ва жакъаги, эркенаб заман щварабго, хъвала рекIел хIал загьир гьабурал ва мацIгун маданият цIунизе ахIарал кучIдул. Гьел рахъана "ЦIумадисезул гьаракь", "ХIакъикъат" газетаздагун журналазда ва "ЦIумадисезул шагIирзаби" тIехьалда. МагIарул мацIалъул гIолохъанал мугIалимзабазе кумекалъе "ХIакъикъат" газеталда рахъана гьелъул рагьарал дарсазул конспекталги. 

Автор: Зулфия Сажидова, "ЦIумадисезул гьаракь" газеталъул мухбир

Газета №: 6, от 17. 02. 2017 Месяц выхода номера газеты. Например января Год выхода номера газеты. Например 2012г.





Уважаемый посетитель, Вы зашли на сайт как незарегистрированный пользователь.
Мы рекомендуем Вам зарегистрироваться либо войти на сайт под своим именем.

Комментарии:

Оставить комментарий

При использовании материалов сайта, активная гиперссылка на сайт Hakikat.Info обязательна!
При использовании материалов сайта в печатных СМИ, на ТВ, Радио - упоминание сайта обязательно!