Сделать домашней|Добавить в избранное
 
на правах рекламы

ГIолохъанлъи

  • Версия для печати
Добавил(а): istina от 27-01-2017, 14:30
Ункъо соналда жаниб цо укол
Дагъистаналъул пачалихъиял лъайкьеялъул идарабазда цIалулел руго 
20 пачалихъалдаса студентал
Бищун гIемер студентал цIалулеб бакIлъун рикIкIуна Дагъистаналъул пачалихъияб медицинаялъул университет (ДГМУ). Гьенив цIалулев вуго къватIисел улкабаздаса 130 студент. СССРалъул заманалда вукIунаан 450-500 чи. 
ДГМУялъул халкъазда гьоркьосеб отделалъул нухмалъулев Абакаров МухIамадханица бицана гIемерисел ругила Азербайжаналдаса, гIарабазул ва Африкаялъул пачалихъаздаса, Индиялдаса рачIарал гIолилал.  Гьел ругила гIадлуги бичIчIиги бугел, гIезегIан лъикI цIализеги цIалулел. 
- КъватIисел улкабаздаса рачIарал студентазе ДГМУялда киналго шартIал ругин абизе бегьула. ЦIалиги гьезие хираго чIола. Масала, сах гьариялъул факультеталда цIаларалъухъ студентас лъагIалие кьезе ккола 95, цаби-гIусазул факультеталда - 110-115, ингилис мацIалда цIалулев вугони - 130 азарго гъуруш. Буго гьезие санагIатаб общежитиеги. ЦIали лъугIун хадуб гьезул цо-цоял Дагъистаналдаго чIола, ай нилъер ясазулгун ригьин-цIаги гьабун. Масала, Индиялдаса Кхан МухIамад Имраница лезгинай ячана, гьесул кIиго лъимерги буго. Гьев хирурглъун хIалтIулев вуго Буйнакскалда. Индиялдаса Алок Мишра ккола хирург, хIалтIулев вуго Буйнакск шагьаралъул поликлиникаялъул заведующийлъун, - ан бицана М. Абакаровас. 
Дагъистаналде тохтурзабилъун цIализе рачIиналъе ккараб гIиллаялъул, ДГМУялда гIуцIун ругел шартIазул бицун дица гара-чIвари гьабуна цо-цо студентазулгун.
Абуалруб Немри, Палестинаялдаса ункъабилеб курсалъул студент:
- Дир эмен ккола машинаби къачIалев чи, эбел - рукъалъул гIадан. Нижер буго анкьго лъимер. ГьитIинаб къоялдасаго анищ букIана тохтурлъун вахъине. Палестинаялда тохтур ккола къадруялда ва лъикIаб ресалда вугев чи. Палестинаялда мединституталде цIализе лъугьине ккани къваригIуна 98 балл. 12 сонилаб школа лъугIун унеб мехалъ дие гьел баллал щвечIо. Германиялде цIализе ине бокьун букIана, амма инсуца, исламияб бакIалде ун лъикIилан, Дагъистаналде витIана. 
Дагъистаналъул тIабигIат Палестинаялъулалдаса берцинаб буго. Дун щвана Дербенталде, ГIахъущаве, Кубачиялде. РакIрагьарал, кидаго кумекалъе рахъине хIадурал чагIи руго дагъистаниял. Амма бищунго бокьула нужер миллияб кьурди, бакъвараб гьангун ражи-хинкIал.
Нижее лекция цIалула бакIалъулал студентазда цадахъ, цо залалда, гьединлъидал, захIмат букIуна лекторас бицунеб жоялда хадур гъезе, гьесда рекъон лекция хъвазе. Нижер доба цIализе бугеб лекция цебеккунго деканаталдаса учузаб багьаялде босула ва лекция цIалулеб мехалда гьелда хадуб халккола.           
Чаурасия Прадипи, Индиялъул Дели штаталдаса студент:
- Дир эмен ккола бизнесмен,  эбел - рукъалъул гIадан, йиго ункъо яцги. Дир гьудул Навнит цIалулев вукIана ДГМУялда, гьесул баракаталдалъун ккана гьаниве. Тохтурлъун вахъине букIараб инсул анищ хIорго хутIана, гьанже гьеб дидего тIаде босун буго дица. Индиялда тохтурасул хIурмат гьабула. Масала, гIодор чIун хабар-кIалалда чанго министр вугони ва аскIосан тохтур унев вугони, тIадеги рахъун, гьез гьесие салам кьола.
Дун щвана Гъуниве, ЧIикIаве, Дербенталде. Нужер мугIрузул берцинлъиялъ битIахъе хIайран гьавуна. 
Дун ккола инсул цо вугев вас, гьев гIемер хIалтIана дун цIализавулаго, дир кинабгIаги ихтияр гьечIо гьесул ракIбакъвазабизе. Гьединлъидал дун, гьес малъарабги гьабун, Индиялда хIалтIизе вуго. 
Бабирова Гюльшан ва ГIашурова Зулейха, Азербайжаналъул Гусар ва Губа районаздаса студентал: 
- Дир эмен ккола учитель, эбел - бухгалтер. Инсул анищ буго дун тохтурлъун яхъин. 
- Дир эмен ккола хIукуматалъул хъулухъчи. Нижер буго лъабго лъимер. Вацал руго тохтурзаби, диеги бокьана гьезул нухдасан ине. 
Бакуялда бугеб гIурус жамгIияталъул жигаралдалъун, багIарал аттестатал щварал лъимал ритIула Россиялъул ВУЗазде цIализе. Гьедин рачIарал руго нижги. 
Нилъ мадугьалзаби кколелъул, Дагъистаналъул берцинаб тIабигIатги дагъистаниязул гIамал-хасиятги, гьоболасул гьабулеб хъатирги, гьезул хинкIазул тIагIамги нижеда кутакалда лъикI лъала.  
МахIачхъалаялда нижер гIагарал чагIи руго, гьединлъидал, абизе бегьула ниж гьанисаго чагIи ругин. 
Пармар Снехали, Индиялъул Гужерад штаталдаса студентка:
- Дир руго кIиго ясги цо васги. Эмен ккола ралел бакIазул инженер, эбел - рукъалъул гIадан. 
Индиялда цIализе бокьарал гIемерал руго, амма институтал гIоларого руго. Гьаниб гIадин гIарацги кьун, цIализе лъугьунеб къагIида доба гьечIо. Школа лъугIиялъулал экзаменазда 93-95 балл щвечIони, цIализе росуларо. 
МахIачхъала гIадинаб, мугIрулги, ралъадги, гIодоблъиги аскIоб бугеб шагьар бихьун букIинчIо, гIайиб гурищ гьаб гьадин гIадлу гьечIого тезе.  
Дун щвана Дубкиялде, Дербенталде ва ЧIикIае, хIайран гьаюна мугIрузул берцинлъиялъ ва гIадамаз. Дие цIакъ рокьула магIарул хинкIал, цIурачадал. 
Дун гIажаиблъизаюна цо берталъ лъабго-ункъо гъат гьабун гьалбадерида цебе, ай столазда тIад лъун рукIарал кванил нигIматаз. Гьеб ккола тIагIамалъул хIурмат гьабунгутIи.
ДГМУялда нижее теория кьеялъул иш квеш гьечIо, амма больницабазда букIунеб практика махщел щвеялъе щибго пайда гьечIеб буго. Гьенир ниж рукIуна гара-чIвариялда, рацIцIа-ракъалъи гьабулел…
Русидзе Ревази, Гуржиялдаса студент:
- Дир эмен ккола бизнесмен, эбел - рукъалъул гIадан. Дун вуго гьезул цохIо вугев вас. Нилъ руго кавказалъулал, мадугьалзаби, гьединлъидал, гуржиязулги дагъистаниязулги рукIа-рахъинги, гIамал-хасиятги, маданиятгун адабиятги релълъарал руго. Гьедин батила, дида гьанир бицине гIурал захIмалъаби дандчIвачIо. 
Тбилиси буго цIакъ бацIцIадаб ва сундулъго гIадлу бугеб шагьар. Амма МахIачхъала Дагъистаналъул тахшагьар бугин абидал, божуларого вукIана дун. 
Гуржиялда школалъул учителас  яги ВУЗалъул преподавателас цIалулесухъа гIарац босун букIин тIатани, гьев жанив тIамула. 
Дица гIажаиблъи гьабула нужер гIемерисел студентал кIийилаздагун лъабилазда "цIалулел" рукIиналда. Унтарасе гьединав тохтурасдасан щиб кумек щвезе бугеб? 
Больницабазда нижее практика гIуцIун бугеб къагIида буго гьаниб дир ракI рекъолареб тадбир. ТIоцебесеб курсалъул практикаялда дида лъазе кIвечIо щив куратор нижер вукIаравали. Мебель бехъерхъизе, рацIцIалъи гьабизе тIамиялдалъун щиб практика студентазе щвезе бугеб?
Жасим МустIапа, ГIиракъалъул Багъдад шагьаралдаса студент:
- Дир эмен ккола ралел бакIазул инженерал хIадурулеб институталъул преподаватель, эбел - рукъалъул гIадан, руго вацги яцги. 
ДГУялда цIаларав дир вацгIал Анварица гIакълу кьун, вачIана дун гьаниве. 
ЛъикIаб лъайги камилаб махщелги бугев тохтур ккола ГIиракъалда гIадамаз рикIкIунев ва кIудияб харж щолев чи. Гьединлъидал, дун тIоцебесеб курсалдаса нахъего лъикIал къиматазда цIалулев вуго. 
Дагъистаналъул тIабигIат бокьана, амма МахIачхъалаялъул архитектураги, чорокал къватIалги, кьищниялъ цIурал къалазулги бицани, ГIиракъалдацин щивго божиларо. Дагъистаниял руго ракI лъикIал, гурхIел бугел, амма сабур гьечIел, ай хехал чагIи. ЦIакъ гьоболасул адаб гьабулел чагIи руго, амма киназго реццулел нужер хинкIазул дие кеп щвечIо. 
ДГМУялда тохго гIуцIун буго больницабазда букIунеб практика. ГIемерисел студентал гьенир рукIуна заман чIвалел, цоял дарабазда хадур ритIула, цогидал азбар лъухьизе тIамула. Гьале ункъо соналда жаниб унтарасда цо укол гьабуна дица, гьебгиха кин гьабизе кколебали лъицаниги малъичIого. Гьединав тохтур лъиеха къваригIун вугев?

Автор: Нури Нуриев

Газета №: 3, от 27. 01. 2017 Месяц выхода номера газеты. Например января Год выхода номера газеты. Например 2012г.





Уважаемый посетитель, Вы зашли на сайт как незарегистрированный пользователь.
Мы рекомендуем Вам зарегистрироваться либо войти на сайт под своим именем.

Комментарии:

Оставить комментарий

При использовании материалов сайта, активная гиперссылка на сайт Hakikat.Info обязательна!
При использовании материалов сайта в печатных СМИ, на ТВ, Радио - упоминание сайта обязательно!