Сделать домашней|Добавить в избранное
 
Главная » Культура - Маданият » Халкъияб кечI-бакъан росабалъ хутIила
на правах рекламы

Халкъияб кечI-бакъан росабалъ хутIила

  • Версия для печати
Добавил(а): Musa от 19-02-2013, 12:48

Тарихги гIадаталги гьечIеб халкъ - мискинаблъун рикIкIуна

 

   Шагьаралъул культураялъул рукъзабахъ кидаго хIалуцун букIуна. БатIи-батIиял тадбирал тIоритIулаго, гьезде хIадурлъулаго уна гьенир къоял. Росабалъ ругел культураялъул рукъзал кинха ругел? Дагъистаналъул культураялъулъ гьез кинаб бакI кколеб?

Росабалъ культурияб рахъ цебетIезабизе хIаракат бахъулеб буго Хасавюрт районалъул культураялъул управлениялъул начальник МуртазагIали МухIамадгIалиевас. Районалда культураялъул идарабаз гьабулеб хIалтIул хIасилал рихьула "Водник" культурияб централда щибаб моцIрол ахиралда тIобитIулеб культураялъул хIалтIухъабазул данделъиялдаги..

 

 

 

Творческиял коллективазул церетIеял
   
   Араб сон Хасавюрт районалъул культураялъул идарабазул хIалтIи цебетIеялъулъ лъикIал хIасилал рихьизарураблъун букIанин рикIкIунеб буго МуртазагIали МухIамадгIалиевас. Ахираб чанго соналде дандеккун, гъоркьисала районалъул маданият цебетIезабиялъул мурадалда гIемераб хIалтIи гьабунин рикIкIунеб буго гьес.


   "Араб соналъ ниж ун рукIана Астраханалде, "ЧIагояб лъим" абураб халкъияб творчествоялъул халкъазда гьоркьосеб фестивалалда гIахьаллъизе. Районалъул искусствоялъул школалъул лъималазул ансамбль ун букIана Сочи шагьаралда тIобитIулеб халкъазда гьоркьосеб фестивалалда гIахьаллъизе. Гьенир гьез тIоцересел бакIал росана. Владикавказалда тIобитIараб лъималазул кьурдул коллективазул халкъалда гьоркьосеб фестивалалдаги лъималазул "Нур" ансамблялъе цересел бакIал щвана.


   Хасавюрт районалдаса "Ламаназ" халкъияб коллективалъ МахIачхъала шагьаралда тIобитIулеб букIараб "МугIрузул гIадамал" фестивалалда лъикIаб гIахьаллъи гьабуна. Гьениб "Маданияталъулаб ирс цIунаралъухъ" ва "Халкъияб костюмалъул поэзия" номинациязда гIахьаллъаралъухъ дипломазе мустахIикълъана", - ян бицана МуртазагIали МухIамадгIалиевас.  


   Араб соналда творческиял коллективазе ракIалда чIараб лъугьа-бахъинлъун лъугьана республикаялъулал фестивалал-конкурсазда гIахьаллъи. Культураялъул министерствоялъ тIубараб лъагIалида жаниб тIобитIун букIана бищунго лъикIал культураялъул идараби тIаса рищиялъул конкурс. Гьеб конкурсалдаги лъикIаб гIахьаллъи гьабуна Хасавюрт  районалъул культураялъул идарабаз. Эндирей росдал культураялъул рукъалъе лъабабилеб бакI щвана ва къиматал сайгъатазе мустахIикълъана.


   Халкъияб творчество бихьизабиялъул рахъалъги кIудияб хIалтIи цебетIолеб буго районалда. Творческиял коллективал гIахьаллъана ватIан хиралъиялъул темаялъул кучIдузул республикаялъулаб конкурсалда. "Дагъистаналъул хъизан" абураб хъизаналъулаб художествияб творчествоялъул фестивалалда гIахьаллъана Хасавюрт районалдаса кIиго хъизан. "МугIрузул кучIдул" байрам-конкурсалда "МугIрузул дандерижи" ансамблялъул солист ЛатIип Шаиповасе тIоцебесеб бакI щвана.
   
ХIалтIул бергьенлъабаздаса рохула, амма
гIунгутIабиги камуларо

   
   "Гьел киналго бергьенлъабаздаса разилъизе бачIуна. Амма, гIунгутIабиги захIмалъабиги камун рукIунаро. Росаби мискинго руго. Росу ккола халкъалъул рухIияб, гурхIел-рахIмуялъулаб рахъ ва маданияталъул гIадатал цIунулеб бакI. Ахираб заманалдайин абуни гьеб рахъ загIиплъун буго, - ян бицана МуртазагIали МухIамадгIалиевас. - Амма гIумруялъухъ дун лъикIаб рахъалдасан валагьула ва бокьараб ахIвал-хIалалъуса нух батизе бегьулин рикIкIуна. Мисалалъе, цо-цо культураялъул рукъзал къачIачIого гIемерал сонал руго, хIажатаб ретIел босизе рес гьечIо. Гьединлъидал, пачалихъалъул кумек гьечIого тIубаларо".
    
РекIелъ некIсиябщиналъул чIинкIиллъи

   
   "ГIумру гьабиялъул кьучI экономика букIин кигIан нилъеда бичIчIизабизе хIаракат бахъаниги, нилъеда бичIчIизе ккола маданияталъул ирсги, гIадаталги, тарихиял ракIалдещвеялги гьечIого инсаният чIобого хутIизе букIин. Гьединлъидал, нилъер щивасул рекIелъ букIине ккола гIумруялъул цоцазда релълъарал къоязда хIухьбахъизе чIолеб, ракIалъе цIияб къуват щвезабулеб, лъикIаб кечI-бакъаналъухъ гIенеккизе бегьулеб, басриябщиналъул гьитIинабго чIинкIиллъи,- ян рикIкIунеб буго культураялъул управлениялъул начальникас.


    МуртазагIали МухIамадгIалиевас бицана халкъияб творчествоялъул аслияб рахълъун кколин Дагъистаналъул халкъазул маданият цIуни ва цебетIезаби, халкъалъул художествияб ва творческияб рахъ цебетIеялъе шартIал чIезари.
   Культураялъул управлениялъул начальникас районалъул маданият цебетIезабиялъулъ лъикIаб хIалтIи бихьизабуразда гьоркьор Эндирей, ГIусманюрт, ИчичIали, Сивухъ  росабазул культураялъул рукъзал рехсана.
   
ГIолилазе тарбия
кьеялъул мурадалда

   
   "Нижер аслияб масъала буго гIолилазулгун хIалтIи гьаби. Хасавюрт районалъул искусствабазул школазда ругьун гьавулев вуго 400-ялдаса цIикIкIун цIалдохъан. Гьез лъикIаб гIахьаллъи гьабула ва бергьенлъи босула конкурсазда, фестивалазда. Араб соналда Хасавюрт районалъул культураялъул идарабазда тIобитIана 84 тадбир. Районалда буго лъималазул художествияб школа. Гьенир ругьун гьавула 139 цIалдохъан. Школалда буго ункъо кружоказулаб гIуцIи. Гьеб ккола Сулевкент росулъ бугеб, 91 цIалдохъан хьвадулеб щагIил тIагIелал гьарулеб кружок ва Къурущ росулъ цIулада бикIун накъищал гьариялъул, тIунсби рессиялъул, художествиябгун изобразительнияб искусствоялъул кружокал. Гьез гьарурал хIалтIаби рихьизелъун лъола батIи-батIиял выставкабазда", - ян бицана МуртазагIали МухIамадгIалиевас.


Культураялъул идарабазул хIалтIухъабазда кIочон толеб гьечIо музыкалияб искусствоялда гьоркьоса дагь-дагьккун тIагIунел ругел халкъиял музыкалиял алатазда бакънал рачинеги. Гьеб мурадалда районалда тIобитIун букIана хъумузалда бакънал рачиналъул конкурс.

 

Автор: Пат1имат Султ1анмух1амадова

Газета №: 6, от 15 февраля 2013г.





Уважаемый посетитель, Вы зашли на сайт как незарегистрированный пользователь.
Мы рекомендуем Вам зарегистрироваться либо войти на сайт под своим именем.

Комментарии:

Оставить комментарий

При использовании материалов сайта, активная гиперссылка на сайт Hakikat.Info обязательна!
При использовании материалов сайта в печатных СМИ, на ТВ, Радио - упоминание сайта обязательно!