Сделать домашней|Добавить в избранное
 
на правах рекламы

Гьикъе-бицина

  • Версия для печати
Добавил(а): istina от 20-01-2017, 10:56
Гьаб заманалда, берцинлъиялъейиланги абун, руччабаз гуребги, бихьиназцин толел руго малъал. Лъазе бокьилаан гьел тезе бегьулищали?

Малъал къунцIичIого тей буго аварагасул суннаталда данде кколареб жо. Аварагасул гIадат букIана зама-заманалдасан малъал къунцIулеб. Малъал руго чороклъи гъоркье бакIарулеб бакI ва гьездалъун чорхое заралги ккезе рес буго. ГIалимзабаз чIезабун буго кверазда тIад букIунила 300 батIиял микроб ва гIемерисел гьел ракIарулила малъазде гъоркье. 
Руччабаз тола малъал ва жидеца гьел рацIцIад гьарулин абула гьез.  КигIан гьез рацIцIад гьаруниги, къунцIараб мехалда гIадин рацIцIадго гьел рукIунаро. Аварагасул хIадисалда буго: "Щуго жо буго жиб рацIцIалъилъун рикIкIунеб: 1. Сунат гьаби. 2. Надалдаса, ай дандекколареб бакIалдаса расал нахъе инари. 3. Михъал къунцIи. 4. Малъал къунцIи. 5. Къвалакьа рас инаби" (Бухари). Цогидаб хIадисалда буго: "Аварагас нилъее заман чIезабуна михъал, малъал къунцIиялъулъ, расал нахъе инариялъулъ, ай кIикъого къоялдаса цIикIкIун течIого рукIин". Гьеб хIадисалда абулеб буго расал ва малъал рижаралго къунцIейилан. Хасгьабун кIикъого къо бихьизабун гьечIо. Амма гьелдаса цIикIкIун течIого букIине хIаракат бахъейин абулеб буго. Малъал тей, гIемерисел гIалимзабазда аскIоб, карагьатаб буго. КIикъого къоялдаса нахъбахъун тезе цIакъго карагьатаб буго. Цо-цо гIалимзабаз абулеб буго гьел тезе хIарамабцин бугин. 
Бусурманчи вуго Аллагьас как байин щибаб къоялъ тIадкъарав чи. Гьединлъидал чара гьечIого гьес какиечуризе ккола. Амма малъал толел ругони, хасго руччабаз, хIинкъи буго малъазда гъоркье бакIарараб чороклъиялъ какиечурулаго, гьенибе лъим биччачIого теялда. Яги черх чуризе тIалъани, лъим щвечIого хутIиялда. Цинги гьев хутIула черх чуричIев гIадин, щайин абуни, гьесул лъим кинабго бакIалде щун гьечIелъул. "Макъасидул ХIасанат" тIехьалда буго: "Аварагасдасан малъал къунцIулеб къагIида нилъехъе щвечIо ва гьединго бихьизабураб заманги гьелъие гьечIо. Гьел къунцIизе бегьула бокьараб заманалда ва бокьараб къагIидаялъ. Кинниги, гьезие къунцIизе хирияб заман  ва къагIида бихьизабун буго гIалимзабаз. Малъал къунцIизе цIакъго хирияб заман буго хамиз ва рузман къо. Щайгурелъул, Аварагасул хIадисалда гьедин буго, ай хирияб бугин".  Аварагасул хIадисалда буго: "Рузман къоялъ малъал къунцIарав чи Аллагьас цIунула балагьаздаса, бачIунеб рузман къо щвезегIан ва тIаде жеги лъабго къоялъги". Гьединго Аварагасул хIадисалда буго: "Мискинлъиялдаса цIунизе бокьарав чияс малъал къунцIе хамиз къоялъул бакъаникакдаса хадуб". Баззарица ва ТIабаранияс "АвсатIалда" бицун буго: "Аллагьасул Расул вукIана рузман къоялъ малъал къунцIулев ва михъал къокъ гьарулев какде вахъиналде цеве". ТIабаранияс ГIаишатидаса бицараб хIадисалда буго: "Рузман къоялъ малъал къунцIарав чи цIунула квешлъиялдаса, тIасияб рузман щвезегIан". ГIабду Ар-Разакъица бицунеб буго Суфян Савриясул хIакъалъулъ: "Гьев вукIана хамиз къоялъ малъал къунцIулевлъун. Хадуб гьесда абун буго жакъа хамиз къо бугин, рузман къо метер бугин. Гьес абула суннат нахъбахъуларин". Балагьеха, кин цере рукIарал гIадамаз хIаракат бахъулеб букIарабали Аварагас  тIадчIей гьабулеб букIараб суннат тIубазе. ХIатта цо къоялъцин нахъбахъун толеб букIинчIо. Гьанже нилъехъги балагьеха, чан къоялъ нилъеца къунцIичIого толелали. Суннат тIубаялъулъ буго лъикIлъи ва унтабаздаса цIуни. "Анваралда" хъван буго: "Щибаб анцIго къоялдасан, нахъбахъичIого, малъал къунцIизе лъикIаб буго", - ян. Гьеб буго чиясул тIабигIаталда бараб. Хехго малъал рижулевги ва кватIун рижулевги вукIуна чи. Гьез жидедаго рекъезабизе ккола. Цо-цо чагIазул гIадат букIуна малъал цабзаз рукъулеб. Гьебги буго цIакъ рекъечIеб жо. Нилъеда лъала малъазда гъоркь чанго батIиял микробал рукIунеблъи. КIалдире гьел индал, зарал ккола. 
Малъал къунцIулеб куцги бихьизабун буго. Имам ан-Нававияс рехсолеб  буго тIоцебе малъал къунцIизе лъикIаб бугила кваранаб кверзул чIикIарулеб килщидаса байбихьун, гьитIинаб килщиде щвезегIан, хадуб кIудияб килищги. Хадуб квегIаб квералъул гьитIинаб килщидаса кIудияб килщиде щвезегIан. Хадуб хIатIидаса байбихьула, гьитIинаб килщидаса кваранаб хIатIил, хадуб квегIаб хIатIил гьитIинаб килщиде щвезегIан. Малъал къунцIун хадуб лъикIаб буго кверал чуризе. Кверазул яги хIатIазул малъал къунцIулеб мехалда, цояб килищ къунцIун, цогидаб къунцIичIого тезе карагьатаб буго, гIузру гьечIони.  

Автор: ФИО или фамилия и инициалы автора

Газета №: 2, от 20. 01. 2017 Месяц выхода номера газеты. Например января Год выхода номера газеты. Например 2012г.





Уважаемый посетитель, Вы зашли на сайт как незарегистрированный пользователь.
Мы рекомендуем Вам зарегистрироваться либо войти на сайт под своим именем.

Комментарии:

Оставить комментарий

При использовании материалов сайта, активная гиперссылка на сайт Hakikat.Info обязательна!
При использовании материалов сайта в печатных СМИ, на ТВ, Радио - упоминание сайта обязательно!