Сделать домашней|Добавить в избранное
 
на правах рекламы

Гьикъе-бицина

  • Версия для печати
Добавил(а): istina от 13-01-2017, 10:43
Лъимер гьабидал гIакъикъ хъвей

ГIакъикъ хъола лъимер гьабидал ва гьелъул рас кIкIвайдал. Бурайдат-асхIабас бицараб хIадисалда буго:  "Аварагас  ХIасанидасан ва ХIусенидасан гIакъикъ хъуна", - абун. Ислам бачIиналдеги гIарабаз гьедин гьабулаан, ислам бачIун хадубги гьеб иш хвезабичIого тана. Гьеб кIвар бугеб суннатги буго. 
Уму-Курзин абурай асхIабалъ бицун буго: "Дица аварагасда гIакъикъалъул цIехана ва аварагас абуна васасдасан кIиго  чахъу, ясалдасан цо чахъу хъвела", - ян. Васасдасан кIиго хъвеялъул магIна буго вас гьавидал рохел загьир гьаби цIикIкIараб бугин абураб.  Ибну ГIабасидасан бицараб риваяталда буго: "Аварагас  ХIасанидасан ва ХIусенидасан цо-цо куй хъуна", - абунги. Гьалда нахърилълъун кIияздасанго цо-цо чахъу хъуни, гьелъги гIей гьабула. ГIакъикъ хъвеялъул тIалаб гьабулевги лъимадуе напакъа кьолевги эмен вуго. Аварагас  ХIасанидасан ва ХIусенидасан гIакъикъ хъунин абураб хIадисалъул магIна буго, аварагас  гьезул инсуде амру гьабунин ялъуни гIакъикъ хъвезе жо кьунин абураб. Гьабун хадуб анкьго къо иналде лъимер хвани, гьелдасаги хъвезе суннатаб буго. КIиго лъимер цадахъ гьабиялдалъун цо гIакъикъ хъвеялъ гIей гьабуларо, гьелдалъун гIакъикъги кIиго хъвезе ккола. Гьеб хъвеялъул гIуж лъимер балугълъиялде щвезегIан буго, балугълъиялде щвезегIан нахъбахъун хутIани, инсудаса гьеб хъвеялъул тIалаб тIаса ккола. Гьелдаса хадуб жинцагоги хъвезе бегьула. Хирияб суннатаб гIуж лъимер гьабуралдаса анкьабилеб къо буго. ГIаишатидасан бицараб хIадисалда буго:  "Аварагас  ХIасанидасан ва ХIусенидасан анкьабилеб къоялъ гIакъикъ хъуна, гьезда цIаралги лъуна, гьезул бетIералдаса расалги инареян амруги гьабуна", - ян. ГIакъикъ хъун хадуб лъимадул бетIер кIкIвазеги ва гьелъул цIайи халгьабун гIарац ялъуни месед садакъаде кьезеги суннатаб буго. Щайгурелъул, аварагас  ФатIиматида амру гьабуна ХIусенил рас цIан, гьелъул къадар халгьабун месед садакъаде кьейин. 
ГIакъикъалъе хъолеб жоялъул шартIалги къурбаналъе хъолелъулго гIадал руго. Гьеб нилъецаго кваназеги суннатаб буго. Лъимадул ракьа сах-саламатго букIиналъул  мурадалда, хъолеб жоялъул ракьа гъурун бекичIого, цоцадаса батIа гьабизеги суннатаб буго. 
Цебе рехсаралде тIаде рачIуна цо-цо суннатал жалги адабалги. Гьездасан буго: хъолаго Аллагьасул цIар абун хъвей. ГIаишатица бицана аварагас ХIасанидасан ва ХIусенидасан гIакъикъ хъунин ва абунин: "Аллагьасул цIаралдалъун байбихьула, я БетIергьан Аллагь Дуе ва Дудасан буго пуланасул гIакъикъ", - ан. Хъолеб мехалъги къад заманалда хъвезе лъикIаб буго. 


Автор: ХIадур гьабуна МухIамадхIабиб МАХIАТIОВАС.

Газета №: 1, от 13. 01. 2017 Месяц выхода номера газеты. Например января Год выхода номера газеты. Например 2012г.





Уважаемый посетитель, Вы зашли на сайт как незарегистрированный пользователь.
Мы рекомендуем Вам зарегистрироваться либо войти на сайт под своим именем.

Комментарии:

Оставить комментарий

При использовании материалов сайта, активная гиперссылка на сайт Hakikat.Info обязательна!
При использовании материалов сайта в печатных СМИ, на ТВ, Радио - упоминание сайта обязательно!