Сделать домашней|Добавить в избранное
 
на правах рекламы

ВагIза

  • Версия для печати
Добавил(а): istina от 13-01-2017, 10:40
Ислам бачIинегIан инсанияталда гьоркьоб тIибитIун букIана зулму, гIадатлъун билълъун букIана бергьараз къурал инжит гьари. Цинги Аллагьас рещтIана Къуръан, витIана халкъалъе гьеб баян гьабизе хирияв МухIаммад (с.т.гI.в) ва кинабго зулму нахъчIвана. Халкъ бецIлъиялдаса канлъуде щвана. Инсанияталда бичIчIизабуна Аллагьас "мун вуго Дир лагъ, Дун гуресе дуца бетIер къулуге, Дун вуго БетIергьан" абураб магIна. Гьелъул хIакъикъат бичIчIарас лъиданиги цебе бетIер къуличIо ва жиндиего чияца бетIер къулиги къабул гьабичIо.

Пикру гьабе, Къуръаналда гьарулел хитIабазул: "Ле, гьал гIадамал" ялъуни "Ле, гьал иман лъурал чагIи", - абун кIалъала тIолабго халкъ бижарав Аллагь халкъалда. Гьалдалъун нилъеда бичIчIула Аллагьас бечедав, мискинав, чIегIерав, хъахIав яги гIарабияв, гIажамияв ратIа гьарун гьечIеблъи. Гьадинал аятал Къуръаналда Аллагьас анцI-анцI рехсон руго ва цониги тухум яги кьибил ратIа гьарунги гьечIо. Амма гьелда тIадги рахъун нилъ лъугьунел руго цояздаса цоял кIодо гьаризе, цояв хIакъир гьавизе, жинца пуланаб тухумалъулгун ригьин гьабуларин абизе, гьел гIодорегIанал ругин, дун цIакъав вугин чIухIдаризе. 
Гьединго Аллагьас нилъ цо нухалъ ахIун тун гьечIо вацлъиялде, цолъиялде, цоцазул хIукъукъал цIуниялде. Гьес къойилго гьелде нилъ рачунеб гIамал гьабизе тIамулел руго. Пикру гьабе къойил ралел каказул. Паризаяб как базе бусурманчи вачIуна мажгиталде, цо имамасда нахъвилълъун, цо мухъилъ ритIунчIун, хIатта гьев аскIов вугев чигун хьибилги цун вахъун чIун вукIуна, как бан бахъидал цоцаздехунги руссун салам кьола, кверал росула, гьелдалъун гьез лъазабула дидаса дуе зарал гьечIин. Гьадин, щибаб къойил хьибил цун вугев чиясда кIолищ вагъизе, кIолищ гьев хIакъир гьавизе, кIолищ гьев какизе? КIоларо, гьелъ руго нилъ мажгиталде ахIулел. Гьаб буго мажгиталда балеб жамагIат-какалъул мурадги. Гьелде тIадеги, рузманкъоялъ данделъула шагьаралда ругелщинал бусурбаби, гьелдалъунги гIадамал цоцазда лъала ва гьоркьоб рокьи-хинлъи тIибитIула.
Гьанже рачIаха пикру гьабизин мажгиталде хьвадуларел гIадамазул. Чанги чи вукIуна мажгиталде хьвадуларев. Гьез рокъоб бангIаги как бачIого толаро. Амма гьедин бараб какалъги инсанияталда гьоркьоб рокьи-хинлъи лъугьинабула. БецIаб сардилъ, щивго аскIовги гьечIого, жиндирго рокъоб бусурбанчияс как балеб мехалъ, гьес лъазабула жив жамагIатгун цадахъ вукIин. Гьес какилъ абула "Ияяка нагIбуду ва ияяка настагIин", ай Дуе буго Аллагь нижеца лагълъи гьабулеб ва Дудасан буго нижеца кумек тIалаб гьабулебин абун. Пикру гьабе, жинцаго как балеб бугониги гьев кIалъалев вуго "Ниж" абун гIемерлъул формаялда. Кумекги гьес цохIо жиндиего гьарун толеб гьечIо, дунялалда ругелщинал бусурбабазе гьарулеб буго. Цинги дугIа гьабулаго алхIамалъулъ бусурбанчияс абула "Игьдина", Дуца ниж битIараб нухде тIоритIе, Аллагь, абун. Гьеб буго АлхIамалъулъ бугеб къагIида, гьединго буго АттахIиятуялъулъги. Живго вукIа, жамагIатгун вукIа АттахIияту цIалулевщинав чияс Аллагьасда гьарула "нижеда киназдаго салам лъейгиян". Гьанже бачIунеб буго суал: дуца пикруго гьабулеб бугищ гьел рагIабазул? Щибаб къойил гIицIго ратибаталги паризаял какалги раялда жанир дуца диналъул вацасе 35 нухалъ гьабула дугIа, гьев битIараб нухде ккезавеян, 18 нухалъ гьарула гьесие салам, ай сахлъи, цинги какдаса ватIалъидал, салам кьун бахъиндал байбихьула гьевго вац какизе, гьабула гьесдехун тушманлъи, гIодизарула рукъалъул агьлу, ятимасухъа бахъула боцIи. 
Бусурбаби цолъиялде ахIиялъе Аллагьас тIадгьабун буго рамазан моцIалъ кIалкквезе, вакъарасул хIал бичIчIизе, гьесулгун гьоркьоблъи гьабизе. Миллионал нахъа ругев бечедав чиясги гьеб моцIалъ кIалдиб лукъма лъоларо, хIакимчиясги лъим гьекъоларо, мискинав, язихъав чиги гьеб моцIалъ кваналаро. ТIубараб къоялъ бечедав чи вакъидал гьесул ракI тIеренлъула, ракIалде щола  вакъарасул хIал. Кици буго гIорцIарасда вакъарасул хIал лъаларин абураб. Исламалъин абуни гIорцIаравги вакъизавулев вуго, хIатта вакъун хадуб кIалбиччалагоги гьев чохьодаса инегIан кваназе виччачIого таравихIал разе ахIула. Цинги гъобго мухъилъ гъосда ватула мискинав диналъул вац, гьесул кверги босун гьабула гьесие садакъа. Гьединабго мурад буго закагIатгун хIежалъулги. Дунялалда ругелщинал бусурбаби ракIарараб бакIалда киназго ретIуна цо ретIел. Гьез тIад жемула гIицIго ххамил кIиго кесек. Гьанибги бичIчIизабулеб буго щивасда мун тIолалго бусурбабазул вац вукIин.
Абизе бегьула бусурбабазда гьоркьоб гурищ питна бугеб, гьел гурищ рагъулел ругелин. Гьезда нилъеца абила ТIадегIанав Аллагьас Къуръаналда абураб гIадин (магIна): "ГIадамаздасан руго жидер кIалаз абулел - нижеца Аллагьасдаги ахир къиямасеб къоялдаги иман лъунаян, амма гьез иман лъун гьечIо. Гьез махсароде кколел руго Аллагьги муъминзабиги, амма гьеб гьедин гьечIо, гьез жидедаго лъачIого жалго жидецаго махсароде кколел руго" (Бакъарат, 142).
Чанха ругел бусурбабазул мухъилъ чIолел мунапикъзаби, чан ругел бусурбабазда цадахъ кваначIого рамазан моцIалъ къоял тIоритIулел кIигьумерчагIи. Гьелъ Аллагьас хIакъикъиял бусурмабазе сипат гьабун абун буго (магIна): "Муъминзаби вацал руго", - ян (Ал-хIужурат, 10). Дуца тIолалго бусурбаби дур вацаллъун рикIкIинчIони, гьединго гьезги мун жидерго вацлъун рикIкIинчIони, камилав муъминчи вукIиналда хьулго лъоге.


Автор: ХIабиб ГIисаев

Газета №: 1, от 13. 01. 2017 Месяц выхода номера газеты. Например января Год выхода номера газеты. Например 2012г.





Уважаемый посетитель, Вы зашли на сайт как незарегистрированный пользователь.
Мы рекомендуем Вам зарегистрироваться либо войти на сайт под своим именем.

Комментарии:

Оставить комментарий

При использовании материалов сайта, активная гиперссылка на сайт Hakikat.Info обязательна!
При использовании материалов сайта в печатных СМИ, на ТВ, Радио - упоминание сайта обязательно!