Сделать домашней|Добавить в избранное
 
Главная » Религия - Дин ва гIумру » РекIел хIал - кагътиде
на правах рекламы

РекIел хIал - кагътиде

  • Версия для печати
Добавил(а): istina от 23-12-2016, 14:13
ГIумруялъ гIи-боцIуда хадувги, вехьлъуда вукIине ккеялъги тIадегIанаб лъай босизе рес ккечIониги, БетIергьанас лъикIаб пагьмуги кучIдул гьаризе гьунарги кьурав чи вуго Гьандихъа Сайгид. Гьес жинцаго гьарурал кучIдул кагътидеги росуларо, хIажат ккаралъуб рекIехъе рикIкIуна. 
"Дун поэтилан абураб цIар хIажатав чиги гуро, амма цо кинаб бугониги ишалъ рекIее асар гьабидал, чвахун рачIуна жалго рагIаби ва гьел кIочонги толаро", - ян бицана Сайгидица ва рекIехъе рикIкIана чанго кечIги. Жакъасеб гьумералда нижеца рахъулел руго гьесул цо-цо кучIдул.   

Дунялалъул гьал къоял 
Дунялалъул гьал къоял къирун-къарун унел жал,
КъватIал сверун, кеп кьабун, гIадада ине тоге.
Бичас гьанивго толев чиги нилъер гьечIелъул,
Аллагьасе какал ран, накабазда гIодор чIа.
Дунялалда дуй кьурал къоял лъугIун хадуса,
Бичасул амру тIубан, дур цIаралда хIучч цIайдал, 
НуцIида кIутIичIого, кIалзул калам гьечIого, 
ВачIина дуде аскIой дов ГIизрагIил малаик. 
Дуца бер къапилалде, цо калам гьабилалде,
РухIги босун ГIизрагIил зобалазде воржина.
Дур вацалгун яцалаз, тIолабго гIагарлъиялъ 
МагIил гIорал тIуниги, гIададисеб жо буго.
Гьаб къо тIаде щоларев чиги нилъер гьечIелъул,
БитIе салатгин салам нилъер аварагасде.
Бичас нилъер цIаразда тIасан хIуччал цIалалде, 
Аллагьасе какал ран накабазда гIодор чIа!
Гьанже жамагIат бачIун дургун къо-лъикI гьабизе, 
Киналго нилъ росулел росу рагIалде щвела.
Гьениб бухъун хоб буго, тIад чIвазе къанал руго,
ТIалкъен цIализе чIарал харабазул тIел буго.
Бикьулеб конфет буго, кьолеб садакъа буго,
ЖамагIатго данделъун, бачунеб зикру буго.
Дур гIагарал-божарал, халкъалъ адабги гьабун,
Цо къадруяб бакIалда кьерда гIодор чIун руго.
Гьаб къо тIаде щоларев чиги нилъер гьечIелъул,
БитIе салатгин салам нилъер аварагасде.
Бичас  нилъер цIаразда тIасан хIуччал цIалалде, 
Аллагьасе какал ран накабазда гIодор чIа! 
Гьанже росдал дибирас дур хабатIе лъимги тIун, 
ГIинзуниб гьеб тIинкIидал цIидасан рухI бижила.
ЛахIчIегIераб хоб буго, къваридаб лахIду буго, 
Къварилъараб гьеб дур ракI 
        къватIиб кIанцIулеб буго.
Къаданив гIодов вукIун Мункаргин Накир вуго,
Дунялалда гьарурал лъикIал-квешал жал хъварал
ТIахьалги цере росун, сурав босулеб буго. 
КIалалъ мекъи бицани, лугбал кIалъазарула,
Гьенив мекъи ккарасул нух квегIиде сверула. 
Нужейго нух битIизе, Пирдавус алжан щвезе,
БитIе салатгун салам нилъер аварагасде. 
Бичас нилъер цIаразда тIасан хIуччал цIалалде,
Аллагьасе какал ран накабазда гIодор чIа! 
Дунялалда гьарурал лъикIлъаби гIемерлъани,
Бичасе рарал какал камилго тIуранани, 
ТIадегIанас сайигъат - Пирдавус алжан кьола.
Дунялалда  гьарурал квешлъаби гIемерлъани, 
Бичасе рарал какал камилго тIурачIони,
ТIадегIанасул сайгъат - гьалдолеб жужахI буго. 
Бокьарас алжан босе, бокьарас жужахI босе, 
Щивасда бараб буго, гьанибго тIубазабе.
Гьаб къо тIаде щоларев чиги нилъер гьечIелъул,
БитIе салатгун салам нилъер аварагасде.

КантIуларесе вагIза 
Рогьалилъдай ина, къадедай ина, 
Яги чи кьижараб сардил гIужалъдай?
Дурги рухI босилеб гIилиюналде,
ЛъикIаб гIамал гьабун хIадурго вукIа. 
РухI босе вачIарав ГIизрагIил малайк,
Щиб сураталдадай тIаде вачIина? 
ТIолго дур гIагарлъи, вижараб росу,
ЦохIо лахIзаталда гьанибго тела. 
Росдал гIолохъабаз, иргадал рахъун,
Бухъилеб дуеги абадияб рукъ, 
ХIулидал ургида ругьунал лугбал,
ГанчIил къедги гьабун лъела къанабакь. 
РетIизе бахилаб хирияб ретIел, 
Хисила дуцаги бозил натIазухъ. 
Халкъго бахиллъараб гIемераб боцIи,
Дуца дунял тедал тела гьанибго. 
Гъоб гIарасаталде вахъараб къоялъ, 
Къайи бакIлъиладай, рагIад щвеладай? 
СиратIалъул кьотIе щвараб мехалда, 
Щияндай бахина ахирияб гьеб?
Гьеб кинабго дуе хIакъаб жо бугин, 
Бай къол щуябго как, Аллагь гурхIизе.
Анибго хутIулеб тIокIлъараб боцIи, 
Кье мискинзабазе, садакъаялъе.

Унтун бусада вугев 
диналъул вац АминхIажиясе 
БачIина дидеги цо чIегIераб къо,
ЧIвала дирги зани, заназул рохьоб. 
Дун цевеса индал анибго тезе,
Хъвалищха калима хъахIаб кагътида. 
Гьандихъ росуялде, сверухълъиялде, 
ТIогьотIа росарал мугIрул-щобазде. 
Борхатаб кьурулъан гIодой чвахулеб 
"Бидакъул" чвахуде, гьелъул парсазде. 
Гьаб дир росуялде тIад балагьараб 
ГIунсбуз босен лъолеб "ТIалакъолоде".
ТIегьалде найилгIан ракI тIаде щолеб 
"ЦIахIини" бакIалде, сверухълъиялде.
Дир бащадаб гIумру жанибго араб 
Гьаб Бабаюрт-хъутан, лъоб "Чихъихъ" мегIер.
Гьенир дида аскIор дир хинкIал кварал, 
Огь, къайицадахъал, дир гьалмагъзаби. 
Чанги сверила дун ГIарасаталда, 
Гьанхъадерил лъарал лъеде хьулги лъун, 
РакIалде бачIина гьитIинаб заман, 
Доб гIанчIаб лъимерлъи, добаго тараб.
Унтул бусадаса вахъуневани, 
Росу сверилаан ракI сваказегIан, 
Ккурал гьал дир лугбал риччалелани,
ТIоцеве щвелаан "Хьунда" магъилъе.
Унтул бусадаса дун вахъинаро,
БукIайилан тела пана-дуниял.
Ккурал гьал дир лугбал риччан теларо, 
Гьанирго рукIа нуж, мугIрулгун щобал.  

ХIажи Гъазимирзоевасул 
хабатIе щведал
Дур дегIен галараб Гебергалабалъ,
ГанчIал руго гьанже гIиял бакIалда. 
Дур Гороч билараб Бекьилъ магIарда, 
ГIиял гъади гьечIо, гъулдул гурони.
Дуца гIи бачараб гендерил парсахъ, 
ПиштIи дагьлъун буго удаманазул. 
Дуца гьан белъараб Гумали почихъ, 
Чода тIукъби чIвалев Малачи гьечIо.
ЯчIунге, Гогил яс, гуржи-магIарде, 
Гьенир постал ругин солдатал чIарал, 
ЯчIаниги щоге чадир чIвалелъуй 
ЧIобогояб майдан батила дуда.
Гьазул квас босулел базаби гьечIо, 
Кинабго къватIиса бачIунеб буго. 
Гьазул кун дургъулел фабрикал къана, 
Халкъ хIалтIи гьечIого мискинго буго.
Гьазул мода буго ярагъгун рачIун,
Бергьараца къурал хIакъир гьарулел. 
Гьаз хIукуматалъул гIарацги бикъун, 
Жидеего хъулби руго эхетун.
Гъазимирзал ХIажи, гIухьбузул поэт, 
Хехго вахъунилан гIайиб гьабуге. 
Цо хутIараб рехъен цIогьабаз ани, 
Рогьо букIинарищ удаманасе.

ГIабдулгъафурил МухIамадиде 
РахIматал рикьулеб рогьалил гIужалъ, 
Бортана цойги цIва магIарулазул. 
Какде чи вачIунеб рузман къоялда, 
Къадаралде щвана Бичасул вали.
Дуде квер борхарал мунапикъаца, 
Къоялго раладай дуниялалда? 
Нахъасан речIчIулел гьаби кинниги, 
ТIадегIанав  Аллагь, гьезул гIасилъи.
Дуй хIукму къотIарал "къадизабазул", 
"Барзахалде" щведал щибдай букIана?
ТIарикъат малъизе вижарав инсан, 
Анин мунги вачун "Пирдавусалде".
Мун шагьидлъанилан рагIараб мехалъ, 
Жанив чи хутIичIо гьаб нижер росулъ. 
Гьанир хутIаралги дандеги руссун, 
Бадиб магIу ккечIев чиго вукIинчIо.
Аллагьасул къадар къабулаб бугин,  
Къадар гьадин ккезе букIун батила. 
Къадаралде щварал гьанир толарин, 
Гьанже угьдиялъул пайда ккеларо.

Ана жакъаги къо дир гIумруялъул 
Ана жакъаги къо дир гIумруялъул, 
Рехана  цоги чIум кьурал къоязул.
Кидалдай тела мун дицаги гьаниб, 
Щибго пайда гьечIеб пана-дуниял.
Бортила дирги цIва цIвабзазда гъорлъа, 
ЧIвала дирги зани, заназул рохьоб.
Зонода бикIараб дир цIарги цIалун 
Кьела дие къулгьу, дир лъималаца.
ТIокIав вахинаро лъове "КкалатIе", 
ТIогьол байдабазда гIигун сверизе. 
ТIадего щвеларо "ГьорогухIалде", 
ГьитIинаб замана ракIалде щвезе.
Рогьалил гIужалда "Ручнихъ" къавуда, 
ГIунсбузул гьаркьахъе кьижизе анищ, 
Богол гIуж бачIиндал гъоб "ТIалда-ручниб", 
Чвахулеб лъел гьаркьихъ гIин базе анищ. 
Роол къалъул гIужалъ лъоб "ТIасакIкIалал", 
ТIокIкIараб лъел иццда кIалчIвазе анищ,  
Киналго лъалхъулел "ЦIутIарахъ" щобда, 
Дунги лъалхъилаан лъилъулевани. 
Дир ахирисеб нух "Хьунда" магъилъе, 
Къо тIагIараз толеб, дицаги телеб. 
Дир ахирисеб рукъ нахъа-хабалалъ, 
Дир инсуца ккураб, дицаги кквелеб.

Автор: Гьандихъа Сайгид

Газета №: 51, от 23. 12. 2016 Месяц выхода номера газеты. Например января Год выхода номера газеты. Например 2012г.





Уважаемый посетитель, Вы зашли на сайт как незарегистрированный пользователь.
Мы рекомендуем Вам зарегистрироваться либо войти на сайт под своим именем.

Комментарии:

Оставить комментарий

При использовании материалов сайта, активная гиперссылка на сайт Hakikat.Info обязательна!
При использовании материалов сайта в печатных СМИ, на ТВ, Радио - упоминание сайта обязательно!