Сделать домашней|Добавить в избранное
 
Главная » Горянка - МагIарулай » 27 ноябрь - Эбелалъул къо
на правах рекламы

27 ноябрь - Эбелалъул къо

  • Версия для печати
Добавил(а): istina от 2-12-2016, 13:01
Дуца гIемер къулчIана къварилъиги магIуги... 
"Муслимат" руччабазул регионалияб жамгIияб гIуцIиялда 
кIодо гьабуна Эбелалъул къо 
Щибаб соналда тIобитIула "Муслимат" гIуцIиялъ Эбелалъул къо. Гьеб кIодо гьабизе гьенире данделъула лъимал гIемерал ва сакъатал лъимал хьихьарал улбул. МахIачхъалаялъул халкъ социалияб рахъалъ цIуниялъул управлениялъул хIалтIухъан ПатIимат ТIиновалъ бицана 21-абилеб сон бугила "Муслимат" гIуцIиялъ лъимал гIемерал руччабазе кумек гьабулелдаса. 
"74 бахIарчияй эбел йиго МахIачхъалаялда гIумру гьабун. Пачалихъалъ гьединал улбузе гьабулеб кумек букIуна - кIиго лъимер цадахъ гьабуразе 20 000 гъуруш кьола, лъабго лъимер цадахъ гьабуни - нусазарго гъуруш, щуабилеб лъимер гьабидал - 10 000 гъуруш, анцIабилеб лъимер гьабуралъе - 300 азарго гъуруш", - ан бицана ПатIимат ТIиновалъ.
"Гьаб байрам кIодо гьабизе байбихьараб мехалда, нижеда абулаан гьеб бусурбабазул байрам кколарин. Нижецаги абулаан гьеб кколин улбузул байрам, улбулги щибаб къойил кIодо гьаризе тIадаб бугин.  
Лагъалъ хважаин гьаюн йигин абулеб калам рагIидал, гьелъул магIна щибдайин йикIунаан дун. Хадуб бичIчIана магIна: эбелалъ яс гьаюлей йиго ва гIедал гьей эбелалалда малъаризе лъугьуней йиго. Цебе ясалда кIолароан эбелалде данде юссинецин. Гьанжейин абуни…  
 "Россиялъул букIинесеб улбузда бараб буго" абураб ахIиялда гъоркь тIобитIараб форумалда Рамазан ГIабдулатIиповас абуна жакъасел гIолилазухъ балагьидал, ахIи базе ккараб хIал лъугьун бугин. Шамил имамасда цIехон буго гIемерал балагьаздаса, къварилъабаздаса ворчIанин мун, балъголъи щибин. Гьес жаваб кьун буго жив ворчIанин эбелалъул гьари-дугIа сабаблъун. 
Нижер гьанире гIемерал руччаби рачIуна. Гьел регIула жидерго рокъоб хIалтIи гьабизеги, лъималазе тарбия кьезеги, унтарасухъе раккизе инеги, гIадамазда гьоркьоб гIаданлъи гьабизеги, жамгIияб гIуцIиялъ гьарулел ишазулъ гIахьаллъизеги. Амма гьезда гьоркьой бищунго цIикIкIун жамагIаталъе пайдаяйлъун дица рикIкIуна, жиндирго лъималазе лъайги тарбияги кьун, хадуб гьезулги лъималазе тарбия кьолей йигей ПатIимат БатIалова. Щибаб къоялъ шагьаралъул рагIалдаса бахъараб, рачун лъималазул лъималгун ячIуна гьей "Муслиматалде",- ян бицана Хадижат ШихгIалиевалъ.
ПатIимат БатIалова жиндирго лъималазул лъималазда магIарул мацIалда гурони кIалъалей гьечIоан, рокъобги рахьдал мацIалда гурони жал кIалъаларин бицана гьез. Руччабазул жамгIияб гIуцIиялде рачIарал гьалбадерие рухIияб дунялалъул берцинлъи рагьана "Аманат" лъималазул централъул гьитIичаз. Гьез пасихIго ахIана ва рикIкIана улбузде гьарурал кучIдул. МухIамад аварагасул (с.гI.в.) гIумруялъул бицана "РухIияб берцинлъиялъул школалъул" студентаз. 
Улбузул байрамалде рачIаразда гьоркьор рукIана анцIгоялдаса 16-ялде щвезегIан лъимал ругел руччаби. ГIемер рукIана социалияб рахъалъ цIуниялъул централде кумек гьарун гIемер рачIине кколел, гьелъул хIалтIухъабазда лъикI лъалел руччабиги. Цоял магIарухъ гIумру гьабиялъе шартIалги гьечIого шагьаралде гочарал, цогидал мина-карт бухIарал. Щиялъул бугоан жидерго гIузру, къварилъи.
ЧIарада районалъул Шалиб росулъа МахIачхъалаялде гочарай 11 лъимадул эбел Майсарат Салимовалъ бицана, шагьаралдаги гIумру гьабизе захIмат бугин, росги жийги хIалтIулел ругониги. "Росулъ кIиго классалъул школа гурони хутIун гьечIо. ГьабсагIаталда ниж руго мухьдахъ ккураб рокъор. Бищун гьитIинав вас исана школалде ана, кIудияй ясалъул росги хун, гьелъулги кIиго цадахъ гьарурал лъимал хьихьун руго дица. Гьейги хIалтIизе хьвадула". 
16 лъимадул эбел ГIайшат Шарапудиновалъ бицана, МахIачхъалаялда букIараб минаги бухIун, чанго соналъ вагоналъуб гIумру гьабун букIанин жидер хъизан. "Дир лъималазул 11-ял чIаго хутIана, щугоял хвана. КIиго нухалда кIигьарурал, цо нухалда лъабгоял цадахъ гьарурал лъималазул цо-цоял гурони хутIичIо. Росги беццав чи вуго. Чанго сон буго неврологияб унти бугей ясалъе пенсия гьабизе кIоларого. ГIемер рекерахъдизе ккана гьеб тIалаб гьабун, амма жеги хIасил ккечIо. Дунгоги эпилепсияялъ унтарай гIадан йиго. 2000 соналда бухIана нижер мина, амма пачалихъалъул рахъалдасан кинабгIаги кумек щвечIо. Кумек гьабуна мажгитазде рачIунез садакъа кьун, "Муслимат" гIуцIиялъ. Васасе паспорт щвараб мехалда, гьесие шагьаралда прописка гьабизе щоларого хутIун йиго. Эбелалъ  балеб буго шагьаралда мина. ГьенибгIаги прописка гьабизе щвелин йикIуна. Тахшагьаралъул администрациялъул бетIерасухъе ине бокьун чанго моцI буго иргаялда чIун", - ан бицана ГIайшат Шарапудиновалъ. 


Автор: ПатIимат СултIанмухIамадова

Газета №: 48, от 2. 12. 2016 Месяц выхода номера газеты. Например января Год выхода номера газеты. Например 2012г.





Уважаемый посетитель, Вы зашли на сайт как незарегистрированный пользователь.
Мы рекомендуем Вам зарегистрироваться либо войти на сайт под своим именем.

Комментарии:

Оставить комментарий

При использовании материалов сайта, активная гиперссылка на сайт Hakikat.Info обязательна!
При использовании материалов сайта в печатных СМИ, на ТВ, Радио - упоминание сайта обязательно!