Сделать домашней|Добавить в избранное
 
Главная » Молодежь - ГIолохъанлъи » Редакциялда гьоболлъухъ
на правах рекламы

Редакциялда гьоболлъухъ

  • Версия для печати
Добавил(а): istina от 25-11-2016, 11:33

Сириялда вас чIварав инсулгун гара-чIвари

Цо вугев вас чIварав инсулгун хабар гьаби бигьаяб иш гуреблъи лъалаан. Амма гьадин захIмалъилин ккун букIинчIо. Дагьал церегIан къояз нижеца гьоболлъухъе ахIун вукIана Фаталиев ГIабдула. ТIоцере нечонцин рукIана гьесда вачIайилан гьаризе. Кин букIаниги, абуна нижеца гьесда. Гьесги гьари къабул гьабуна. 

Церегоялдаса нахъе лъикIал гьудулзаби ругониги, редакторцин вукIана хабар кин байбихьилебали лъаларого. Цин кIиязго ракIалдещвезабуна лъимерлъи. Бицана гьитIинаб мехалда гьарурал самолетазул, школалъул гIумруялъул. Лъимерлъиялъ талихIаб дунялалде вачарав кинниги,  кенчIелел рукIана ГIабдулал берал, цин-циял лъугьа-бахъиназул бицунаго. Амма, васасул бицине лъугьиндал, щакърахана, бадиб магIу хулана. 
- Дица кватIун гьабуна хъизан, гьединлъидал цIакъ хирияв вукIана дие ХIажи, - ян байбихьана гара-чIвари. - ХIаракат бахъулеб букIана гьесиеги диего щвараб гIадаб тарбия кьезе. ГIемер бицунаан нилъерго тарихалъул, гIадат-гIамалалъул. Бицаралъухъ гIенеккулареб, дандечIолеб гIамалги гьесул букIинчIо. ВукIа-вахъин, гIадат-гIамал лъикI лъазеян гьитIинаб къоялдасаго къварилъи ккаралъувеги рохалилъеги кидаго цадахъ вачунаан. "Киб дица гъалатI биччараб? Кида нижеда гьоркьор балъголъаби рижарал?" абурал суалазе жавабал ратулел гьечIо…, - ян угьун хIухьел биччана ГIабдулаца.
- Кидаго дур берда цеве вугев вас…
- ЛъикIаб заманги гьечIин гьанжеян абун, дица хIаракат бахъана гьесул рокьи бижизабизе диналде. Цадахъ мажгиталдеги  вачунаан. 
Школа лъугIун хадуб, гьес абуна жиндие тохтурлъун вахъине бокьун бугин. Гьелдасаги вохун вукIана, вас хьолбохъ вукIинин абун, дунгоги хIалтIулев вугелъул медакадемиялда. Дида гьесул киналго гьудулзабиги лъалаан, гьесул интересалги лъалаан…, лъалин кколаан… 
Гьес мегеж биччан бихьидал, дун гьесда вагъана. Данде рагIи абичIого, кIкIвана гьес гьеб. Гьесул гьудулзабиги лъикI цIалулел лъимал рукIана. Гьединлъидалги батила, дир щаклъиго букIинчIо гьел мекъаб нухде ккун ратиялда. Цо къоялъ вас рокъове вачIинчIо, гьесдаго цадахъ гьесул кIиго гьудулги вилана. ЦIакъ къо чIун рукIана ниж, цIехечIев чи, раккичIеб бакI хутIичIо. Вац Заургун цадахъ нижеца рагьичIеб нуцIа хутIун батиларо. Кумек гьарун, ана президентасухъецин, гьеб букIана  МухIу ГIалиев президентлъун вугеб заман.  КIудияб кумек гьабуна МВДялъул министр ГIадилгерейица. Гьесул кумекалдалъун ратана нижеда гьел. Ратана Хасавюрталда рахчун. ХIинкъизарунги ругоан. Гьал мекъаб рахъалде цIарав Арсен абулев гIолохъанчи хадув хъачагъазда гъорлъ чIвана. 
РачIана рокъоре. Дол васазул эбел-эменал хурхана жидерго васазда, дица диргоясда, дуда яхI гьечIищанги абун, кьабуна. ГIемер хабар букIана, гIемераб ракIбакъвай щвана гьесиеги. Гьелдаса хадуб ХIажи, Къуръаналда кверги лъун, гьедана тIокIаб гьединаб иш гьабиларин. Гьеб соналъ, цIалудаса академикияб отпускги босун, гьев ветераназул госпиталалде хIалтIизе лъугьана. Гьабулеб ишалъе мухIканав вукIана, тохтур хIисабалдаги квер битIарав ватана. Гьелъги батилаха гьесул рахъалъ цадахъ хIалтIулезул лъикIаб пикру букIунаан. Хадуб лъугIизабуна академияги, шагьаралъул кIиабилеб больницаялда хIалтIизе лъугьана. Москваялде ординатураялде цIализе ине кинабго хIадурун букIана. Цо къоялъ ахирисеб нухалъ операция гьабизеян ана больницаялде, гьелдаса хадув вилана. Радал рокъове вачIинчIо. 
- Мажгиталде унев вукIаравищ гьев?
- ВукIана, Малыгинаялде. Котровалда бугеб  мажгиталде ине дица гьукъун букIана, хъизанги васги вугин дур, гьезул милат гьабеян абун. 
ХIалбихьизеян гьевги вачун, КIудияб мажгиталде ана чанцIулго. Гьениб батIияб рагъа-ракари бугони, бичIчIилаан гьев цIидасан мекъаб нухде ккун вукIин. Гьенибги киназго гIадин какалги ралаан, щибго дир щаклъи ккезесеб хьвада-чIвадиги букIинчIо. 
- Кинха лъараб нужеда гьев Сириялде аравлъи?
- Гьев радал рокъове вачIинчIогойин нижеда ургъел чIван букIинчIо. Гьеб заманалъ гьесул хъизан букIана, васги гьавун вукIана. Жиндирго гъове ун ватилин тун вукIана.  Нахъисеб къоялъги рокъове вачIинчIелъул, цIех-рех гьабизе лъугьана. Хадуб  гьесул лъади ГIайшатица  абуна жив Сириялде щванин абун смс бачIанин ХIажицайилан. 
Божизе кIолеб букIинчIо. Кин? Щай?... Пайда щиб?!
- ТIаде-гъоркье рачIунел щакал гьудулзаби рукIанищ? ГIарац гIоларогойин рукIунелъул гIолохъаби, гьелъул гIарзал рукIунаанищ?
- РукIинчIо. Гьес аквариумал гьарулаан. Гьезиеги гIемерал заказал  рукIунаан, компьютерал къачIазеги махщел букIана. ГIарацги щолаан. Гьебго  заманалда больницаялдаги хIалтIулаан. Гьесие гIарац къваригIун букIарабани, нижецаги гьабилаан кумек.  Васасул махщел бугилан дунги вохун вукIана. Щибго гьединаб жо ракIалда бугин бицунеб гIаламатго букIинчIо. 
Хъизанги буго, васги вуго… гьесие камураб жо букIинчIо. Кинабго лъикI букIана. 
- Гьев нужехъе кIалъачIищ?
- Анкь ун хадуб, кIалъан вачIана тIасалъугьа дадайилан. Семана, тIасалъугьинарин ахIдана. ВатIанги бичарав, эбел-эменги, хъизан-лъимерги рехун тарав дуе кинаб тIасалъугьин букIинебин ццидахана.  Кида гьев кIалъаниги, вагъулев вукIана дун.  
Цо нухалъ кIалъан вачIиндал, дуе гьениб лъикIищ бугебан цIехана дица.  "Гуро, дун рекIекълъун вуго. Бицухъе батичIо гьаниб. Гьанже гьаниса нахъе нух гьечIо дие.  Инин лъугьани, гьаз чIвала, гьениве ворчIаниги, гьез жанив лъола", - ян кьуна жаваб.  Жинца  ярагъ кодобе босизе гьечIин, махщалида рекъон гIадамал сах гьаризе ругин абуна гьес.
Гьарулеб букIана, дуда биги гьечIин, мун гьанжего гьанже гьениве ккарав чи вугин, тамихIалде цIачIого хутIиялъе кинабгоги гьабилин, тIадвуссаян.
Дун гIемер семулев вукIиналъ, гьесул кIалъай дагьлъана дихъе, кIалъалаан эбелалъухъе.
- Лъица гьев гьениве вачарав, живгойищ арав?
- Маратица ахIанин жив гьанивеян бицана гьес. Марат кколаан гьесул гьудул, цIакъ лъай бугев вас вукIана, лъалаан ингилис, гIараб мацIалги. Гьев, Москваялда ординатураялда цIалулев чи, ун вуго гьениве. ХIажи Сириялде ахIараб заманалда,  Марат  ИГИЛалъул сахлъицIуниялъул министр гIадав чи вукIун вуго. Гьевги чIвана, машинаялда бомбаги щун. 
- ХIажи кин хварав?
- Гьес бицунаан жив батIи-батIиял больницабазде командировкаялъ витIулин. Гьедин, командировкаялдаса рокъове вуссарав гьесда нуцIил кIулал хун ратун руго. Мадугьалихъе лобзик босизеян арав чи, мадугьалас жиндирго унтарай ясалъухъ балагьизе вачун вуго рокъове.  Ясалъухъги балагьун, ХIажиги мадугьалги азбаралде щун руго. Гьеб заманалъ бомбаялъул кесек щун, лъукъун вуго ХIажи. Гьев хвасар гьавизеян аскIоб бугеб подъездалъуве вачун вуго. Гьенибги щун буго бомба. Гьенив хун вуго. 
- Нужеда пашманаб хабар лъица бицараб?
-  ГIайшатица бицана, гьейги доя йикIана кIиябго лъимергун. ХIажи хун вуго 15 апрелалда, гьей нижехъе кIалъана 21 апрелалда. Кин бицинебали лъаларого чIун йикIун  йиго гьей. Нижеда вас хвараблъи щуго къоялдасан гурони лъачIо. 
- Хъизан хадуйищ дое арай?
- У. Гьелъ абуна жий Турциялде инин, Сириялде инарилан. Вас вихьизе бокьун (доб заманалъ цо вас гурони вукIинчIо), ХIажица жий Турциялде ахIулей йигин. Ниж рази рукIинчIо, гьелъул эменги дандечIун вукIана, васги гьанив тун, аян гьарана. МукIурлъичIо.


- Нужер хьул букIун батила, гьевги Турциялде вачIинин ва тIадруссинеги бегьулин…
- У, гьединаб хьул букIана нижер. Абулеб букIана гьесда, Турциялда рукъги босилин, гьенивгIаги чIайилан. Жинда аскIов чIезавун кIиго рагъухъанги вугила, гьаниса ворчIизе жиндие рес гьечIилан абуна гьес.
КIиго сонги бащдаб ана гьедин, гьезие Сириялда кIиабилев васги гьавуна. 
- Хъизан гьанже кийха йигей?
- Сириялда. Гьелъ тIадюссине инкар гьабулеб буго.  Дида кколеб буго гьей хIинкъун йигин  яги гьедин абизе тIамулей йигин. ЧIвани, щибха гьабилеб, гьединаб батила Аллагьасул къадарилан жаваб кьолеб буго ГIайшатица. 
БитIараб бицани, хIадур вуго дунго ине, гьединаб рес балагьулевги вуго. ЛъималгIаги нахъе рорчIизаризе анищазда вуго. Дун лъалхъизавулев вуго нусалъ жал хIадур ругин, рачIа ниж хвасар гьаризеян абунгутIиялъ. Гьелъ абулеб буго жидер ургъел гьабугейилан, жидее кинабго чIезабун бугилан. 
Хьул буго ахир-къадги гьейги тархъанлъилин, кумекалъе гIагарлъиги бахъинин, пачалихъалъ кумекги гьабилин…
- Щай гьедин ккарабин абураб суалалъ рахIат толарого вукIунев ватила мун…
- Гьеб кинабго гьедин ккеялъе гIайиб дидаго бугин тола. Киб бугониги гъалатI биччараб куцха дица…  ТIоцеве гьев гьезда гьоркьове ккедал, дида абулеб букIана гьез гьеб гIамал толарилан. Таралги рихьана, божун вукIана гьесги танилан. 
- Нужер рокъоб диналда тIасан хабар, дандеккунгутIиял рукIунаанищ?
- Диналда тIасан дандеккунгутIаби рукIинчIо, цо гIиси-бикъинал суалазда сверухъ хабар букIунаан. 
- Полициялъулаздехун рокьукълъи букIанищ? 
- БукIинчIо. БукIине ресги букIинчIо, дица гьитIинаб къоялдасаго гьесие кIудияв инсул бицунаан, гьев вукIана мустахIикъав чекист - майор. 
-  Руго цо-цо эбел-эмен, жидер лъимер Сириялда букIинги лъан, щиб гьабилебалиги лъаларого. Щиб дуца абилеб гIурал васал рокъор ругел эбел-инсуда, кинаб цIодорлъи гьез гьабизе кколеб?
- Гьенире аразда гьанже гьабизе жо букIинаро.  Ине хIадур ругезда абила  - унге, нуж гуккулел руго.  Эбел-инсуда абила - лъималазда бичIчIизабе алжаналде нух чиги чIвачIев, гIадамазе заралги гьабичIев бусурманчиясе бугеблъи. Гьерсалги рицун, цIалел руго доре. Дир васги гIакълу гьечIев, битIараб-тIекъаб батIабахъизе лъаларев чи вукIинчIо, амма гьев гьезда гъорлъе ккана.  Гипноз гьабурал гIадин рачун унел руго гIолохъаби. ЛъикI хIадурарал психологал ратилаха гьезул… ЦIодорлъи гьабе, цо квешаб къуваталъ нилъ ва нилъер лъимал балагьалде рачунел руго! 




Автор: Шамсият Султанбегова

Газета №: 47, от 25. 11. 2016 Месяц выхода номера газеты. Например января Год выхода номера газеты. Например 2012г.





Уважаемый посетитель, Вы зашли на сайт как незарегистрированный пользователь.
Мы рекомендуем Вам зарегистрироваться либо войти на сайт под своим именем.

Комментарии:

Оставить комментарий

При использовании материалов сайта, активная гиперссылка на сайт Hakikat.Info обязательна!
При использовании материалов сайта в печатных СМИ, на ТВ, Радио - упоминание сайта обязательно!