Сделать домашней|Добавить в избранное
 
на правах рекламы

Лъугьа-бахъин

  • Версия для печати
Добавил(а): istina от 25-11-2016, 11:18
СагIид-хIажи, паризаяб хIежги борхун, балагьун чIун вукIана Жидаялъул аэровокзалалда, самолет бачIиналъухъ. Гьесда аскIов вукIана цо хIажичиги. Гьезул хабар ккана, лъай-хъвай гьабуна ва заман иналъе гьалъул-долъул бицун рукIана. ХIажичияс бицана жив хIалтIулев вугин ралел бакIазул идараялда ва Аллагьасул цIобалдалъун исана анцIабилеб нухалда хIежги борханин. СагIидица гьесда хIеж баркана, Аллагьас къабул гьабегиян дугIа гьабуна. Мун чанабилеб нухалда гьаниве вачIунев чийилан цIехедал, гъираго гьечIого гьадин бицана СагIидица: 
- Дун гIемерал соназ балагьун чIун вукIана хIеж гьабизе рес щвеялъухъ. Лъеберго соналъ больницалдаги хIалтIун, хIалица бакIарана хIеж борхизе гIарац. Гьеб данделъараб мехалда, дида аскIое ячIана цо чIужугIадан. Гьей йикIана дица сах гьавулев гьитIинав васасул эбел. Вас вукIана палижалъ  унтун. Васасул эбелалъул гьурмада бихьулеб букIана къварилъи, кин бугониги, гьимизеги гьимун, дие рецц-бакъги гьабун, гьелъ абуна гьаб больницаялде жал тIокIалъ тIадруссине гьечIин. Дида ракIалде ккана гьей дица гьабуралдаса рази гьечIин ва васги вачун цоги больницаялде ине ратилин. Дир хIал бичIчIараб гIадинги лъугьун, гьелъ абуна жий дудаса кутакалда рази йигин, мун вукIанин дир васасе хIеренав, гурхIулев, инсудасаги цIакъ гурхIизеги гурхIанин. Дур кумекалдалъун васасе мадарги кканин, дуца нижер хьулги тIадбуссинабунин. 
Больницаялдаса нахъе гьел иналъе гIилла лъазабизелъун дун ана администрациялде ва цIех-рех гьабуна. Гьениб бицана васасул эмен хIалтIудаса нахъе рехун вугин, васасе дару гьабизе гIарац гьечIолъиялъ нахъеги унел ругин. Дун ана больницаялъул бетIерав тохтурасухъе ва гьесда гьарана васасе дару больницаялъул хIисабалдасан гьабеян. БетIерав тохтурас гьари къабул гьабичIо, гьаб хасаб больница кколин абуна. Дица Аллагьасда гьарана, дир анищ букIанин Дур рукъалде хIеж гьабизе, дир мурад букIанин Аварагасул мажгиталда как базе, Дур Аварагасде зиярат гьабизе. ГIемерал соназ дун гьелде хIадурлъулевги вукIанин, гьанже дида ракIалде кканин гьай чIужугIаданалъеги гьелъул васасеги кумек гьабизе. Дуца дун Дур рахIматалдаса нахъчIвагейин. Гьединаб гьариги гьабун, хIеж борхизелъун бакIарараб гIарацги босун, дун ана больницаялъул кассаялде ва васасе дару гьабизе анлъго моцIалъе гIураб гIарац кьуна гьенибе. Васасул эбелалдаги абуна больницаялъ гьесие кумек гьабизе тIаде босанин.
Кассаялде гIарацги кьун, пашманго рокъове тIадвуссана, амма эбелалдасаги васасдасаги ургъел тIаса босиялъ, вохунги вукIана. Гьеб сордоялъ дида макьилъ бихьана цIакъ гIажаибаб макьу. Дица КагIбаялда сверун тIавап гьабулаго, гIадамаз дие саламги кьун, абулеб букIана, Аллагьас къабул гьабегийила дур хIеж, я СагIид-хIажийилан.  
Гьоркьоб заман иналдего, цо къоялъ радалго телефоналдасан кIалъана больницаялъул нухмалъулев ва дида абуна, бегьулеб батани кумек гьабейин. Нилъер сахлъицIуниялъул пуланав хъулухъчиясе хIежалде ине бокьун бугин, амма гьесие цадахъ тохтур хIажат вугин. Дида ракIалде ккун бугин мун гьесда цадахъ, гьесул тIалаб гьабизе ва хIеж борхизе  витIизе. Дир бадиб магIу хулана, разияв вугинги абун, телефон гIодоб лъуна. Гьедин, щибго гIарацги хвечIого, гьалеха дица хIеж борхана. Гьелде тIадеги, дица жиндие хъулухъ гьабуралъухъ, дов хъулухъчияс дие мухьги кьуна. ХIежалда цадахъ рукIаго, дица гьесда бицана ккара-тарабги ва дов унтарав васасул хIакъикъатги. Гьеб рагIидал, хIакимчияс лъазабуна жиндир мухьалдасан васасе дару гьабеян ва дица кассаялде кьун букIараб гIарацги тIадбуссинабейин. Хадубги гьес лъазабуна больницаялда мискинал гIадамал сах гьаризе хасаб касса рагьейин ва хIалтIудаса нахъе рехун вукIарав васасул эменги жиндирго фирмаялде хIалтIизе восана.
Гьалеха, цоги нухалъ хIакълъана нилъее хирияв Аварагасул хIадис: "Аллагь лагъасе кумек гьабулевлъун вуго, лагъас жиндирго вацасе кумек гьабулебгIан мехалда", - ян абураб. Гьебго магIнаялъул цогидаб хIадисалдаги буго: "Жиндир дугIаялъе жаваб гьабизе ва ургъел тIаса ине бокьарав чияс, захIмалъиялда вугесул ургъел тIаса босе". 

Автор: МухIамад МухIамадов

Газета №: 47, от 25. 11. 2016 Месяц выхода номера газеты. Например января Год выхода номера газеты. Например 2012г.





Уважаемый посетитель, Вы зашли на сайт как незарегистрированный пользователь.
Мы рекомендуем Вам зарегистрироваться либо войти на сайт под своим именем.

Комментарии:

Оставить комментарий

При использовании материалов сайта, активная гиперссылка на сайт Hakikat.Info обязательна!
При использовании материалов сайта в печатных СМИ, на ТВ, Радио - упоминание сайта обязательно!