Сделать домашней|Добавить в избранное
 
Главная » Религия - Дин ва гIумру » Нухлулазе гIанса
на правах рекламы

Нухлулазе гIанса

  • Версия для печати
Добавил(а): istina от 7-11-2016, 11:02

Адамил лъимер ракьалда бижаралдаса нахъе рахIат толареб суал буго инсан щай вижун вугев, гIумру ва хвел щиб жо кколебин абураб

 

 Дунял-гIалам бижарав ТIадегIанав Аллагьас, гьеб суалалъе жавабги босун, халкъалъухъе ритIана аварагзаби  ва рещтIана тIахьал. Хирияб Къуръаналдаги, ахирисев аварагасул  хIадисаздаги гьезие мухIканаб жавабги кьун буго. Гьезда абулеб буго ТIадегIанав Аллагьас  чурхдул рижилалде цере киналго pyxIaл рижанилан. Эбелалъул ургьиб лъимер бижун хадуб, ТIадегIанав Аллагьасул хIалкIолъиялдалъун лъимадул чорхолъе pyxI биччазе ва гьелъул букIинесеб гIумру бихьизабун, малаик витIулила. Эбелалъул ургьиб лъимер гIoлаго, цоцазда хадур кколел хиса-басиязул хIакъалъулъ Къуръаналда мухIканго хъван буго.

СШАялдаса гIалимчи, анатомиялъул ва эволюциялъулаб биологиялъул профессор Джонсон Томасица хъван буго: "Гьанжесеб заманалъул цебетIураб гIелмуялъул лъайгун дун дол гIасрабазде (Къуръан рещтIараб заман) виччалев вукIаравани, дихъа хъван бажарилароан Къуръаналда бугеб мухIканлъиялда инсан вижиялъул хIакъалъулъ", - абун. РухIалда бан имам Гъазалияс хъвалеб буго: "Инсанасул чорхолъ букIуна кIиго батIияб pyxI: цо инсанасе хасаб, абадиялъ нахъе хутIулеб, гIакълу-лъай бугеб илагьияб pyхI; цогидаб - холел хIайваназулги букIунеб гIадинаб, жиндалъун чорхол къуват, багъа-бачари букIунеб pyxI".
Къуръан-хIадисалъ бицухъе, иман жиндилъ букIунеб pyxI ракьалъ туризабуларо. Гьеб илагьияб амрулъун бугеб pyxI абадиялъго холаро, гIицIго инсан хвеялдалъун жиндирго рещтIунеб бакI хисула. Хобги гьелъул рещтIунеб бакI буго - я алжаналъул ахлъун, яги цIадул гвендлъун букIунеб. Муъминчи хвалдаса хIинкъуларо, Аллагьас тIадкъарабги гьабун, кидаго хвалде хIадурго вукIуна. Аллагьасде гIасилъарав хвалдаса  хIинкъула, гьединав чиясе хвалил пикру гьабизецин бокьуларо. Нилъеда лъаларо щиб лахIзаталда гIумру гьоркьоса къотIилебали. Хвелалъ гьитIинав-кIудияв батIа гьавуларо. Хвел киназего гIаммаб буго. ТIадегIанав Аллагьас Къуръаналъул гIемерал аятазулъ гIадамал ахIулел руго щаклъи гьечIого бачIине бугеб, жиндаса лъутун чи ворчIулареб хвалде хIадурлъун, гьеб кIочене течIого рукIиналде. Муъминзабазул цевехъан ГIабдулгIазизил ГIумарица абулеб буго: "Киназдаго якъинго лъаниги, инсанас бищунго цIакъ щакаблъун толеб жо буго хвел", - ан. Цоги, нилъер аварагасда цIехедал бищун цIодорав чи щив кколевилан, гьес жаваб кьун буго: "Бищун гIемер хвелги рехсолев, бищунго цIакъ хвалдеги хIадурлъарав чи вуго, гьесие буго дунялалда рахIатги, ахираталда хиралъиги", - ян. 
"Гьанив чи тунгутIи - 
                 загьираб амру, 
Унеб бакI лъангутIи - 
                кIудияб гIантлъи". 
(СагIид-апанди)
Коммунистазул идеологиялъ нилъее гьукъун букIана рухIалъулги хвалилги цIap бахъизецин. Пенсионеразе насихIатаздацин бихьизабун букIана хвел ракIалде бачIине тезе бегьуларилан. Генетика гIелму гьукъун букIана.
Араб гIасруялъул 50-абилел соназдаса баянлъана жибго клетка цIакъго захIматго гурони хадуб гъолареб хIалалъ гIуцIун букIин ва клеткаялъул рекIелъ (ядро) ругел хромосомалин жидеда цIар лъурал жал хасаб кодалдалъун хъван рукIин. Щибаб pyxIчIаголъиялъул буго кинабго букIинесеб, гьелъул къисмат, базе бугеб гIумру, ирсалъе кьезе бегьулел унтаби, тIом-расалъул кьералде гIунтIун, кинабго бихьизабураб программа.
Цо физиологиял хаслъаби гурелги, гьенир хъван ругила чорхолъ кколел аза-азар хиса-басиял. ГIалимзабаз абулеб буго цо клеткаялъул рекIелъ (ядро) кьун ругел киналго балъголъаби кагътиде росун хъвазе ккани, гьеб кинабго азарго томалъул энциклопедиялдаги жанибе бачине кIвезе гьечIилан.
Материалистал тIирун чIола гьеб кинабго жибго жиндасанго лъугьараб бугинги. СубхIаналлагь!
СШАялъул Калифорния штаталдаса профессор Йоль-Кло Соломоница абулеб буго:
"...инсанасе вижулаго хъван буго гьес базе бугеб заман - цо къо тIаде гьечIого". Америкаялъул гIалимчи Л. Хейфлихица 1965 соналъ чIезабун буго черхалъул клеткаби рикьулел рукIин чIванкъотIараб къадаралде ва хадур холелги рукIин. ГIемераб заманалъ хадур гъолареб балъголъилъун хутIун букIана гьеб. Дагьаб цебе генетиказ чIезабуна клеткаялъул хромосомазда цо генаби гурелги, нилъеца базе кколеб заман борцунел хасал бутIабиги рукIин. Гьезда грек мацIалда теломерал абула. Жакъа нилъеда лъалел киналго рухIчIаголъабазда гьел (теломерал) ратун руго. Щибаб клетка кIийиде бикьулеб мехалъ, гьелдаса батIалъулеб буго цо теломер. Теломеразул къадар лъугIарабго, клетка тIокIалъ кIийиде бикьулеб гьечIо. Инсанас рарал гIумрудул соназда рекъон, черхалъул клеткаби дагьлъулел руго, гьел дагьлъанагIан, нилъ херлъулелги руго.
Россиялъул гIалимчи А. Оловниковас формулацин ургъун букIун буго инсанасул гIумру борцине, ай, хромосомазул участкабазда теломеразул къадарги борцун, гIумруялъул хутIараб заман чIезабизе кIолин. Гьебго темаялда атомазул роценазда гьарурал гIелмиял цIех-рехазе гIоло 2009 соналда Нобелил премия кьуна химиялъул рахъалдасан лъабго гIалимчиясе.
ГIадамал херлъичIого, унта-щокълъичIого, рахчун чIарал бакIаздацин хола. Дагьалищ лъугьа-бахъинал кколел кIудиял тIабигIиял балагьаздасаги, хIатта самолёт ракьалде бортун, щущан анигицин цо-цо гIадамал сах-саламатго хутIиялъул. Гьеб кинабго буго нилъ Рижарасул хIалкIолъи, Аллагьасда кIолелъул Жиндие бокьухъе лагъасул гIумру къокъ ва халат гьабизе. Абула, инсанасул гIумру цIараб хIухьелалдалъун борцунилан. Кинабго лъалев Аллагь гурони гьечIо.
"Лаилагьа иллаллагь абизе тIаме 
ТIарамагъадисеб хIухьел цIалелъул"



Автор: МухIамад ГIалиев

Газета №: 44, от 4. 11. 2016 Месяц выхода номера газеты. Например января Год выхода номера газеты. Например 2012г.





Уважаемый посетитель, Вы зашли на сайт как незарегистрированный пользователь.
Мы рекомендуем Вам зарегистрироваться либо войти на сайт под своим именем.

Комментарии:

Оставить комментарий

При использовании материалов сайта, активная гиперссылка на сайт Hakikat.Info обязательна!
При использовании материалов сайта в печатных СМИ, на ТВ, Радио - упоминание сайта обязательно!