Сделать домашней|Добавить в избранное
 
на правах рекламы

Хасаб пикру

  • Версия для печати
Добавил(а): istina от 7-11-2016, 10:55
Дагъистаналъул мугIрузул жаниблъиялда, аслияб куцалда Авар ва ГIанди гIоразул рагIаллъабазда ругел росабазул бетIербахъи буго ахихъанлъиялдаса. Гьел росабалъ бижула хинал улкабазда бижулебго пихъ: чIахIияб хурма, соно ва цогидабги. 
Лъида рагIичIеб чIикъдерил ракьалда бижулеб букIараб "БергъучIиб" цIибил. Гьединабго цIибил букIунаан Сагъри  кьода гъоркьа бахъараб, гIурул лъим бачун гьабураб Доргъоли магъилъги. Лъида бихьичIеб чIикъдерил ракьалда букIараб цIар рагIараб "ХIабсалат" микьир, компот гьабизе ва кваназе бищун лъикIаб ва  тIагIамаб ахбазан-курак. Советияб заманалда гьеб куракалъухъ заводалъ кьолаан цо гъуруш (долларалъул багьа букIана 0,80 гъуруш). Мунагьал чураяй эбелалъул эбел МуртазагIалил Хамизица бицунаан "МалахIусен"-цIибил холароанин тIасияб соналъ ахикь хIалтIаби гьаризегIанги. Гьал мухъазул авторас  ЧIиркъатIа росдал Дахадаевасул цIаралда букIараб колхозалъе нухмалъи гьабуна анкьго соналъ, ва гьеб заманалда ахихъанлъиялъул рахъалъ районалда колхозалъ кколаан тIоцебесеб бакI ва щибаб соналъ щолаан "Жигули" машина.
Бищун рикIкIад букIараб, лъалъазе лъим бачине санагIалъи гьечIеб ЦIохаб мегъцин букIана бокьарав чиясул цебебакIалдасацин лъикI. Риккилаб магъилъ хутIун букIана цо-цо карул гъветI ва, гIезегIан рикIкIадаса лъимги бачун, гьебги чIаго гьабуна. ТIадехун рехсараб ЦIохаб мегъ гьанже рехун тана ва гьединго рехун тана Хъудалиб мегъги. Рецц Аллагьасе, Риккила мегъгIаги лъикIаб хIалалда буго. Дун гьелдаса кутакалда вохула, гьелда гъорлъ дирги хIал бугелъул. Добехун мегъ абулеб бакIги бащдаб бекьичIого хутIун буго, гъутIби ракъвалел руго, лъим гьечIого. 
Кутакалда лъикIаб иш гьабуна ДРялъул бетIерас 2016 сон ахихъанлъиялъул лъагIеллъун лъазаби. Гьелдаго цадахъ,  хIукуматалъ рагIи кьун букIана республикаялъул  бюджеталдаса 500 млн гъуруш биччазе цIиял ахал чIарал гIадамазе кумек гьабун кьезе. Бихьизабун букIана федералияб ва республикаялъул бюджетаздаса, цо гаялда хадуб хъулухъ гьабурабги рикIкIун, 100 000 гъуруш кьезе. Гьелъги гIадамазул цIикIкIараб гъира ккана рес бугел бакIазда ахал гьаризе. Гьединал бакIалин абуни, кьурабазги, ганчIазги, заз-хъарахъалъги ккураб нижер гIадаб бакIалда, цIакъ дагь гурони гьечIо. Гьединал санагIалъаби гьечIел бакIазда, ахал гьаризе гIемераб захIматги харжги хвезабун, гьаризе ккола магълъал. Нилъецаго гьабураб хIалтIи малъичIого, кIудияб бульдозералъ сагIаталда жаниб хIалтIи гьабун босула кIиазарго гъуруш, гьитIинаб ДТ-75 тракторалъ - 1000-1500 гъуруш. Гьеб захIмалъиялда гьабуна хIалтIи, гьаруна магълъал, бищана гамачI, бачана лъим. Гьединал бакIазда ва гIодоблъиялъул хурзабахъ ахал гьаруралъухъ кьолеб буго цого къадаралда гIарац. Гьебин абуни,  битIун гьечIо. Исана мугIрузул сонги бугелъул, хадубккунгIаги гьелде кIвар кьезе ккела. Лъим бачине ккола рикIкIадаса, гьелъухъги уна гIемераб гIарац. ГIурухъа лъим кьабизе ккани, босизе ккола насос, мотор, рогIрал, бачине ккола ток. Гьебгощинаб хIалтIи гьабизе ва къваригIараб босизе ккани  (мотор, насос, рогIрал, ток бачин, магълъал гьари, сетка-арматура), мисалалъе, 0,20 гаялда ах чIезелъун букIине кколеб буго 200 азаргоялдаса дагь гьечIеб гъуруш. Гьединго рехсезе ккола цо нухалда гIурухъа лъим кьабун ах  лъалъазе унеб 400-500 гъурушги. Нижер гIадаб багIарараб бакIалда ах анлъго нухалданиги лъалъазе ккола. Гьеб захIмалъиялда гьабуна ах, лъагIалица гьабуна хъулухъ, лъалъана, бана рак, бекьана, гьабуна дару-хер. Дагьабниги цIорой ккани, лъагIалица гьабураб магIишат уна хIурудахъ. Гьединлъидал республикаялъул хIукуматалъ ургъизе ккела ахихъабазе кумек гьабизелъун кинаб бугониги тадбир, хасго магIарухъ ругезе. 

Автор: ХIадисил Камил, ЧIиркъатIа росу

Газета №: 44, от 4. 11. 2016 Месяц выхода номера газеты. Например января Год выхода номера газеты. Например 2012г.





Уважаемый посетитель, Вы зашли на сайт как незарегистрированный пользователь.
Мы рекомендуем Вам зарегистрироваться либо войти на сайт под своим именем.

Комментарии:

Оставить комментарий

При использовании материалов сайта, активная гиперссылка на сайт Hakikat.Info обязательна!
При использовании материалов сайта в печатных СМИ, на ТВ, Радио - упоминание сайта обязательно!