Сделать домашней|Добавить в избранное
 
на правах рекламы

Школалъул гIумру

  • Версия для печати
Добавил(а): istina от 28-10-2016, 12:06
Рокъобе хIалтIи
Лъимерлъиялдаса махIрум 
гьарийищ яги букIинеселъул тIалабищ?

 

ЦокIалго нижее загьир гьарурал пикрабазда гьоркьоб цо гурони батIияб магIнаялъул ккечIо (жиндир цIар рехсогеянги гьарана гьев чияс). Гьале гьебги: "Учителас лъай балагьизе куцазе ккола цIалдохъан. БукIинесеб гIумруялда хIажалъизе бугеб гурони батIияб лъай дир лъимералъе хIажат гьечIо. Гьебгун дарсазда нахъа кIусизе дун регIуларо. Гьединлъидал дуца дарсал гьарунищан яги рокъобе щиб кьурабан дица киданиги гьикъуларо. Дир аслияб масъала буго лъимал ракъун-къечон ва ратIликъ тунгутIи. КIудиял гIураб мехалда, гьез жидецаго бетIербахъиялъе жигар гьабила. Дида къанагIат гурони дандчIваларо школалда щвараб лъаялдалъун гIeй гьабулев чи". 

КъватIисел улкабазда

Ахирал соназда нилъеца киналъ мисаллъун рикIкIунеб Европаялда кинаб ахIвал-хIал бугеб рокъобе хIалтIи кьеялъул рахъалъ? Интернеталъул кумекалдалъун гьеб суалалъе гьадинаб жаваб батана нижеда.
Германиялда, Франциялда ва Англиялда гIисинал классазул цIалдохъабазе рокъобе хIалтIи кьоларо. ЧIахIиял классазул цIалдохъабазе рокъоб гьабизе жо камуларо. Амма гьез рокъобе кьураб хIалтIи тIубазабула школалдаго, ай къалъудаса хадуб. Гьединлъидал цIалдохъабиги тIубараб къоялъго школалда хутIула. Гьедин школазул хIалтIи гIуцIизе ккана цIалдохъабазул эбел-эмен хIалтIулел рукIиналъ, ай жидерго лъималазда цадахъ рукIине гьезул заман гIолеб гьечIолъиялъ.

ЦIалул адаб гьабула Югалъулаб Кореялда

Гьезул цIалдохъаби кьижула сордо-къоялъул гIицIго щуго сагIаталъ. Къадруяб университеталда цIализе гъираялъ (букIинесеб гIумру вузалъул дипломалда бараб букIунеблъи бичIчIула гьезда) цIалдохъаби тIамула репетиторазухъе хьвадизе. Камилаб лъаялда хадур гьел лъугьуна ичIго сон тIубаралдаса нахъе. Лъайкьеялъе хвезабулеб гIарцуда барахщуларо лъималазул эбел-эменги. ЦIалдохъабазул ригьалъул лъимал школалда дарсал байбихьараб заманалда азбараздаса, парказдаса ва цогидал рекIелгъеялъул бакIаздаса тIагIуна - гьел рукIуна дарсазда. 
Лъималазе рокъобе хIалтIи гIемер кьолин гIарзал рукIуна кореялъулазулги, амма гьездаса лъимал тIубанго эркен гьареян тIалаб гьабизе лъиданиги ракIалде кколаро. Гьелъул гIаксалда, гьезул лъимал цадахъго кIиго батIияб школалдацин цIалула: радалиса гьел уна гIадатияб школалде ва къалъудаса хадур батIи-батIиял курсазда ва репетиторазухъ хIадурлъулел рукIуна Россиялда ЕГЭ гIадаб экзаменазде. 
ГIун бачIунеб гIелалъул сахлъиялъе зарал кколинги абун, Югалъулаб Кореялъул нухмалъиялъ, къаси сагIат 22 тIубан хадуб Сеулалда репетиторлъи гьукъиялда бан, хасаб закон къабул гьабун букIана. Гьелъул хIасилалда мухьдахъ репетиторлъи гьабулезул ва Сеулалдаса цогидал шагьаразде хьвадулел лъималазул къадар цIикIкIана. Роол каникулазул заманалдацин кореялъулал-цIалдохъаби хьвадула репетиторазухъе.

Италиялда

Чан тIадкъай рокъобе кьелебали чIезабураб къадар гьечIо Италиялда. Цо-цо школазда щибниги кьоларо рокъобе, цогидазда - тIасан борчIараб ахIвал-хIал буго гьелъул. Роол каникулазде гIемер тIадкъаял кьеялда бан, пуланав цIалдохъанасул эмен Марино Пейреттица, учителасде хитIабгун рагьараб кагъат хъван букIана Интернеталъул цо сайталда. "Бокьун буго нужеда бицине щай дир васас роол каникулазде кьураб тIадкъай тIубазабичIебали. Нижеца гьеб заманалда гIемер батIияб иш гьабуна: велосипедалда рекIун, тира-сверана, лъелго сапаралъ ана, рукъ-бакI къачIана, программирование лъазабуна. Нужер ихтияралда дир вас вукIуна ичIго моцIалъ, гьеб заманалъ кье гьесие лъайгун тарбия. Диран абуни, васасда гIумру малъизе лъабго моцI гурони гьечIо", - ян хъвалеб буго Пейреттица.
Гьеб кагътица италиялъулал кIийиде рикьизаруна. Цояз школалъул къагIидабаздаса рази гьечIев Пейреттил рахъккуна. Цогидал гьесде данде рахъана, Интернеталда кагъат лъечIого, учителасда аскIовеги ун, тIубазе бегьулаанин гьеб иш.
Рокъобе тIадкъай кьеялъул рахъ эбел-инсул ихтияралда буго. Чан сагIаталъ лъимер школалда толебали кьочIое босула, гьесие лъайкьеялъул программа тIаса бищулеб мехалда. СагIат 13:30 тIубазегIан школалда рукIунел цIалдохъабазе анкьил заманалъ рокъобе гIемерал тIадкъаял кьола, амма гьатIан къоялде щибго кьечIого тола. СагIат 16:20 тIубазегIан школалда рукIунел лъималаз дарсал гьенирго гьарула ва шаматгун гьатIан къоязде гьезие цIикIкIарал тIадкъаялги кьола.

Анкьида 
жаниб 90 тIадкъай

Рокъобе кьолеб тIадкъаялъул чIара-хьараб къадар чIезабун гьечIо Бразилиялдаги. Щибаб штаталда жиндирго хаслъи буго гьелъул. Амма тIадкъай букIине кколин рикIкIуна цIалдохъабазул эбел-инсуца ва учительзабаз. ГIицIго тIадкъаязул къадар мухIкан гьабизе кколин абула гьез. Масала, Рио-де-Жанейроялъул жалго бетIергьанаб колледжалда батIи-батIиял дарсазул анкьие кьолел тIадкъаязул къадар бахуна 90-ялде. Гьел тIуразарулаго, цIалдохъанасул къойилго уна кIиго сагIатгун бащдабгIанасеб заман. Гьеб хIалуцараб ишлъун рикIкIунаро бразилиялъулаз. Гьелдаго цадахъ, цIалдохъабазул сахлъиялъе зарал ккунгутIиялъул мурадалда, Бразилиялъул школазда аслияблъун гьабизехъин буго лъабго дарс: ингилис ва португал мацIалги, математикаги. ХутIарал дарсал цIалдохъанас жиндиего бокьун тIасарищизе тезехъин руго. Рокъобе хIалтIиги букIине буго гIицIго аслиял дарсазул.



Автор: ХIадурана Сулейманова Кавсаратица. Макъалаялда хIалтIизаруна "Российская газеталъул" сайталдаса (https://rg.ru/) баянал

Газета №: 43, от 27. 10. 2016 Месяц выхода номера газеты. Например января Год выхода номера газеты. Например 2012г.





Уважаемый посетитель, Вы зашли на сайт как незарегистрированный пользователь.
Мы рекомендуем Вам зарегистрироваться либо войти на сайт под своим именем.

Комментарии:

Оставить комментарий

При использовании материалов сайта, активная гиперссылка на сайт Hakikat.Info обязательна!
При использовании материалов сайта в печатных СМИ, на ТВ, Радио - упоминание сайта обязательно!