Сделать домашней|Добавить в избранное
 
Главная » Образование - Лъай кьей, мактаб » Щивасул гIумруялда лъалкI толев инсан
на правах рекламы

Щивасул гIумруялда лъалкI толев инсан

  • Версия для печати
Добавил(а): istina от 7-10-2016, 11:42
Щивасул гIумруялда лъалкI толев инсан
Школалде инчIев чи къанагIат гурони вукIунаро. 
ГIумруялъго рекIее асар гьабулев учительги щивасул ватула

 

Гьединайлъун ккола 56 соналъ лъималазе лъайгун тарбия кьурай Лаваша районалъул Кутиша росулъа байбихьул школалъул учительница ГIалиева Марям.

1953 соналда Буйнакскиялъул педучилищеги лъугIизабун ячIана ГIалиева Марям росдал школалда хIалтIизе. "Нижер росуцоязда гьоркьоб профессионалияб лъай щварай тIоцеесей махщелчIужу йикIана дун. Шагьаралда цIализе унин рагIараб мехалда росуцоял релъанхъулаан дида, батIи-батIиял махсараби гьарулаан", - ин ракIалде щвезабула гьанже Марямица.
Махасараби гьарулел кутишдерил гIадамалги тун, гIолохъанчIужуялъ жигар бахъана ва лъикIаб лъайгун, камилаб махщелгун росулъе тIадюссана. Малъулаан лъималазда хIарпал, слогал цоцада рекIинарун, текст цIализе. Куцалаан гIадамазда гъорлъ рукIине, кире щваниги, унго-унгояв инсанлъун хутIизе. Цадахъго цIалдолаан Марям жийгоги: махщел камил гьабиялъул гIорхъи букIунарин абулаан гьелъ кидаго. Школалда гьелъул цIалдохъаби церехъабазул кьерда рукIунаан. Бажари-гьунар бугей учитель хIисабалда гьелъухъе кьуна чIахIиял классазда рахьдал мацIалъулгун адабияталъул дарсалги. Кьезе кколаан музыкаялъул дарсги. Гьелдаго тIадкъана школалъул библиотекарасул хIалтIиги. 
2013 соналда хIурматияй учительницаялъ хIалтIи тана. 56 соналъ росуцоязе дарсал кьуна гьелъ. Гьелъул хIалтIуе мустахIикъаб къимат кьуна районалъул ва республикаялъул лъай кьеялъул нухмалъиялъ. "МустахIикъаб захIматалъе гIоло" медаль кенчIана гьелъул каранда. Кьуна "ЗахIматалъул ветеран" медальги, "РФялъул гIаммаб лъай кьеялъул мустахIикъай хIалтIухъан" хIурматияб цIарги. ЧанцIулго гьей йищана росдал собраниялъул депутатлъунги.
Дагьалъ цебе ГIалиева Марямил 80 сонил байрам кIодо гьабуна. Гьелда байрам баркизе ракIарана анкьабго лъимер (росги хун, гIезаруна гьел Марямица), гьезулги лъимал ва рикIкIун хIалгIоларел цIалдохъаби. Лъималазеги кьуна гьелъ тIадегIанаб лъай. Гьезул щивав жакъа республикаялъул цебетIеялъул мурадалда батIи-батIиял хъулухъазда хIалтIулел руго. Киназдаго батулеб букIана гьелда абизе хIеренаб рагIи, баркалаялъул калам. РукIана ракIалдещвеялги, кополал лъугьа-бахъиназул харбалги. Амма киназго гьелъие гьарулеб букIана сахлъигун талихI ва рохелгун аваданлъи.
Нужеца тIаса бищана бигьаяб гуреб, амма къадруяб махщел – нилъер гIолеб гIелалъе лъаялде нух бихьизаби, ритIухълъи, лъикIлъиялде ва берцинлъиялде рокьи гьезулъ куцай. КиналгIаги методикабаз ва дарсил алатаз хисуларо учителасул хIеренаб калам ва рекIел хинлъи. ЦIалдохъанасе гъваридаб лъай кьеялда цадахъго гIумруялъул битIараб нух тIаса бищизе, ритIухълъигун берцинлъи цIунизе, цеветIурав инсан вахъиналъе кумек гьабула унго-унгояв учителас.
Нилъер лъималазул ва пачалихъалъул букIинеселъул жавабиял руго нилъ киналго. Ахирал соназда лъай кьей цебетIезабиялде кIвар кьолеб буго республикаялда: рагьула цIиял школал ва ясли-ахал, камиллъизабула педагогазул махщел, лъай кьеялда хIалтIизарула гьанжезаманалъул технологиял, цIалул идарабазда гIуцIула санагIатал шартIал, школазе кьола автобусал. РФялъул президент В. В. Путинил тIадкъай тIубазабулаго, пачалихъиял ва бакIалъул нухмалъиялъ учительзабазул харжал цIикIкIинариялъе жигар бахъулеб буго. Учителасул къадру цIикIкIинабизе, гьесул гIумруялъе ва хIалтIуе мустахIикъал шартIал гIуцIизе хадубккунги хIаракат бахъизе буго.
Гьарула нужее Дагъистан ва Россия церетIезариялъе гьабулеб хIалтIулъ бергьенлъаби!
Рамазан ГIАБДУЛАТIИПОВ, 
ДРялъул бетIер


Автор: Кавсарат Сулейманова

Газета №: 40, от 7. 10. 2016 Месяц выхода номера газеты. Например января Год выхода номера газеты. Например 2012г.





Уважаемый посетитель, Вы зашли на сайт как незарегистрированный пользователь.
Мы рекомендуем Вам зарегистрироваться либо войти на сайт под своим именем.

Комментарии:

Оставить комментарий

При использовании материалов сайта, активная гиперссылка на сайт Hakikat.Info обязательна!
При использовании материалов сайта в печатных СМИ, на ТВ, Радио - упоминание сайта обязательно!