Сделать домашней|Добавить в избранное
 
Главная » Горянка - МагIарулай » Рихьизе рокьула лъикIал гIадамал
на правах рекламы

Рихьизе рокьула лъикIал гIадамал

  • Версия для печати
Добавил(а): istina от 7-10-2016, 11:32
Цебегоялдаса бокьун букIана СагIадатилгун лъай-хъвай гьабизе. Гьей ккола дир классцояв, мунагьал чураяв ХIажил яс. Цо къоялъ кIалъан ячIарай СагIадатил эбел Асиятица дун гьоболлъухъе ахIана. Гьел рукIана, Ростовалдаса бергьенлъиги босун, лъабабилеб нухалда боксалъул рахъалъ Россиялъул чемпионкалъунги яхъун, СагIадат Дагъистаналде ячIарал къоял. Дица цеечIезаюлей йикIана, суратаздаго гIадай, спортсменка СагIадат. Амма гьей ятана тIубанго батIияй - дагьайги берцинай, хIеренаб каламалъул, гьурмада сабураб дангъва чIвазабулеб гьимиялъул яс. РекIелъе цо кинабалиго чIухIиги бачIана дир, чIухIиялдаго цадахъ, кидаго гIадин, магIуги бачIана - жакъа ясалъул бергьенлъабиги тIанусдерил рохелги бихьизе эмен чIаго вукIараванийилан кколеб букIана. СагIадатица дун тIамуна тIатIала юссун инсул бицине. Гьесул цIар бахъарабго кенчIолел гьелъул бераз бицунеб букIана инсуде букIараб кIудияб рокьул. Гъира-шавкъалда бицунеб росуцоялъул хабаралъ дун пана гьаюн йикIана, ва ботIролъеги рачIунел рукIана гвангъарал, рохарал пикраби. 
Унго-унгоги гьитIинабго дир росулъ ругелщинал машгьурал гIадамал. Гьезул щивасул буго жиндирго цIва, цIваялъулги буго жиндирго борхалъи. Буго цохIо жийго бетIергьанаб цIва СагIадатилги. Бергьенлъиялъул куркьбаздаги рекIун, гьей йоржуней йиго жиндирго цIваялъул борхалъуде. КIудияб хIасратгун ва таваккалгун. Асиятица бицана я жиндие, я ХIажие бокьун букIинчIила ясалъ спорталъулаб нух тIаса бищизе. ДГУялъул культураялъул факультеталде лъугьуней СагIадатие битIккечIо. Ва гьей яхъана ДГПУялъул психологиялъул факультеталъул студенткалъун. Гьениб байбихьана СагIадатил цIваялъ жиндирго роржен. Гьелъ бокс тIаса бищиялдасаги рази рукIинчIо ХIажиги Асиятги. Асиятица елъулаго бицана жинца ясалда, къун рокъое ячIани, тIокIалъ тренировкабазде йиччаларин лъазабулаанила. СагIадатицаги абуна, тIоцебе битIккечIеб мехалъ, дагьабги гъира кканила тренировкабазде инейилан. 
СагIадатил бергьенлъабазул гIемер хъвана газетазда. Бокьун гьечIо такрарлъизе. Бицине бокьун буго СагIадат-магIарулалъул, росуцоялъул хIакъалъулъ. Хасго боксерал-ясал церечIезарула бихьиназда релълъараллъун, залималлъун, мутIигIлъи-мукIурлъи щиб жояли лъалареллъун, ччорбалъанги риццаталлъун. Амма гьеб пикру мекъаб букIин бичIчIана, СагIадат йихьидал. Дида гьей цIарлъуралдаги релълъун йихьана. КIудияй СагIадат кколаан гьитIинай СагIадатил инсул кIудияй эбел. Гьелъул цIаралда бухьараб дирго лъимерлъудал кепаб лъугьа-бахъинги ракIалде щвана. КIудияй СагIаца зама-заманалдасан мугь бикьулаан росулъ. Гьеб къоялъги СагIал могьоде хьулги лъун рукIана, эбел-эменги шагьаралде ун, нижго хутIарал дунги кIиявго вацги. ЦIакъгойищ ракъун рукIаралали, гьелда лъалареб хIалалъ, ниж лъабалго батIа-батIаго ана,  мугь базе гъудрулги росун. Ниж цIакъго рохун рукIана, гьелда лъачIиланги абун. Амма гьелъ лъачIеб ххвел гьабун букIун бугоха. КIиго къоялъгIаги гIуна нижее мугь. СагIал цIар кьурай СагIадатги ятана  гIаданлъиги бугей, гIадамалги рокьулей яс. КIодолги бицун релъизаруна дица СагIадатида бергьенлъи баркизе рачIарал гьелъул гIагарлъиялъул ясал. Тренировкабазда свакарай СагIадатги урхъун йикIун йиго нижер аваданаб горсвериялъухъ. Гьелъги бицана нижее жиндирго гьудул-гьалмагълъиялъул, спорталъул, спортсменазул. РикIкIадаб Москваялда гьей урхъун йикIуна Дагъистаналъухъ, гIагараб росдахъ, росдал гIадамазухъ, Шагьрудинилги, МухIулги, академик Шамилилги, Афгъаназул рагъул бахIарчи Шамил ГIалихановасул цIвабзазда аскIоб бугеб гьанжего гьанже кунчIун бачIараб жиндирго цIваялъухъги. 
ТIануси росу машгьураб буго волейболистаздалъун. Дунялалдаго цохIо гьениб батила волейболалъул таргIие бараб памятникги. Руго ТIанусиса эркенаб гугариялъул рахъалъ дунялалъул чемпионги правилаби гьечIеб рагъул кунчIун бачIунеб бугеб цIваги. ТIанусдерил спортивияб тарихалъул тIехьалда цIияб гьумер рагьана нижер СагIадатицаги. КунчIана, гвангъана гьелъулги цIва. ГьабсагIаталда СагIадатица гIумру гьабулеб буго Москваялда. ЦIалулейги йиго Москваялъул педуниверситеталда, магистратураялда. Гьей хIадурлъулей йиго  кватIичIого Болгариялда тIобитIизе бугеб боксалъул рахъалъ Европаялъул чемпионаталде. 
Нух битIаги дуе, СагIадат, дурго цIваялъул борхалъуде йоржине.

Автор: Гьумер хIадур гьабуна Шамай Хъазанбиевалъ.

Газета №: 40, от 7. 10. 2016 Месяц выхода номера газеты. Например января Год выхода номера газеты. Например 2012г.





Уважаемый посетитель, Вы зашли на сайт как незарегистрированный пользователь.
Мы рекомендуем Вам зарегистрироваться либо войти на сайт под своим именем.

Комментарии:

Оставить комментарий

При использовании материалов сайта, активная гиперссылка на сайт Hakikat.Info обязательна!
При использовании материалов сайта в печатных СМИ, на ТВ, Радио - упоминание сайта обязательно!