Сделать домашней|Добавить в избранное
 
Главная » Горянка - МагIарулай » Выставка-ярмарка
на правах рекламы

Выставка-ярмарка

  • Версия для печати
Добавил(а): istina от 30-09-2016, 10:26
"Нилъеда гьоркьор гIемерал тIахьал цIаланин чIухIун бицунел гIемер дандчIвазе бегьула, амма кигIан гIемер тIахьал цIаланиги гьездаса кинабгIаги пайда щвечIого хутIаралги дагьал ратуларо. КIиго-лъабго тIехьалъ хисизе бегьула щвалде щун жаниб щибго пайда босизе жо батулареб чанги анцI-анцI тIехь. ЦIализе лъикIаб тIехь тIаса бищизе ккани, кIудиязда цIехон халгьабизе ккела. ТIахьазул культура цебетIезабулел гьадинал гIадамал рукIиналдаса ва гьез нилъер жамагIат цебетIезабулеб букIиналдаса рохизе ккола нилъ", - ан абуна ДРялъул бетIерасул гIакълучи Денга Халидовас "Тарки-Тау 2016" тIахьазул выставка-ярмарка рагьулелъул. 
Выставкаялъул тIоцебесеб къоялъ Расул ХIамзатовасул цIаралда бугеб миллияб библиотекаялда тIобитIана "Дагъистаналде кулинарияб сапар" абураб Николай Баратовасул тIехьалъул презентация. 
"Дагъистан" басмаханаялда бахъараб Камил Чутуевасул суратазул альбомазул презентация гьабуна ва суратазул выставка рагьун букIана "Тарки-Тау" лъугIизегIан. Гьенир рукIана ярмаркаялде рачIарал цогидал республикабаздаса ва шагьараздаса авторазул суратазул выставкабиги. 
Выставка-ярмаркаялда тIоритIана Ингушетия Республикаялъул библиотекаялъул презентация, Дагъистаналъул хъвадарухъабигун цадахъ гьез рикIкIана кучIдул. Абизе бегьула "Тарки-Тауялъ" батIи-батIиял республикабазул ва Россиялъул чIахIиял шагьаразул хъвадарухъабазулгун лъикIаб гьудуллъи ккунин ярмаркаялда гIахьаллъарал дагъистанияз.  
"Тарки-Тау" щуабилеб нухалдаги республикаялъул искусствоялъул ва лъай кьеялъул хIаракатчагIазул кумекалдалъун цебе бачунев журналист ва художник Марат ХIажиевас ярмарка лъугIизегIан, гьенире рачIаралгун цадахъ батIи-батIиял тадбиразда гIахьаллъи гьабуна. Гьес бицана исана тIахьазул ярмарка тIобитIанин терроризмалде данде абураб ахIиялда гъоркь. 
Выставкаялдаги хасаб бакI кколеб букIана "Терроризмалде данде къеркьей" абурал игIланаз, Россиялъулго хъвадарухъабазул ва журналистазул терроризмалде данде къеркьеялъул темаялда хъварал асаразул тIахьазул гIуцIун букIана выставка.  
"Кавказский экспресс" абураб терроризмалде данде къеркьеялъулаб тIехь къватIибе биччай кIодо гьабун "Тарки-Тау" выставкаялъул гIахьалчагIаз миллияб библиотекаялъул залалда данделъи тIобитIана. Ярмарка нухда бачунев Марат ХIажиевас гьеб тIехьалъул хIакъалъулъги бицана. Гьенир данде ракIарун руго батIи-батIиял автораз терроризмалъул ва гьелъ гIадамазе гьабулеб бугеб балагьалъул хIакъалъулъ хъварал макъалаби. "Кавказский экспресс" тIехьалда лъурал жидерго харбазул хIакъалъулъ бицана Дагъистаналдаса ва цогидал регионаздаса рачIарал гьалбадерица. ДГУялъул мугIалим Жамила Ибрагьимовалъ бицана жинцаго хъвараб асаралъул хIакъалъулъ. Терроризмалъул вахIшилъиялдаса цIунизе кколин гIолилалин абуна гьелъ.  

ГIолилал 
терроризмалде данде

Гьебго къоялда ДГУялъул студентал-волонтераз библиотекаялъул жанахIалда флеш-моб тIобитIана. Дагьал церегIан къоязда Россиялъул бахIарчиясул цIар кьурав МухIамад НурбахIандовасул хIакъалъулъ жидецаго хъварал кучIдулги цIалана гьез. Цоязул гъваридаб магIнагун хъварал, цогидазул жеги тIад хIалтIизе кколел кучIдузухъ гIенеккулаго бичIчIулеб букIана жакъасел гIолилал гьединал лъугьа-бахъиназ цолъизарун рукIин, гьезул рекIелъ ВатIаналде рокьиги цIикIкIинабулеб букIинги бихьулеб букIана. 
"ХIалтIе, вацал…" абун Россиялъул БахIарчи МухIамад НурбахIандовасул ахирисел рагIаби тIад хъварал хъахIал гурдалги ретIун, гьез киназдаго бихьизе цереги рахъун, щивасул мугъзада чIвараб хIарп дандбан "Ниж терроризмалде данде руго" абун хъвана. 
Выставка-ярмаркаялда волонтеразулгун цадахъ хIалтIи бачарай Елена Гончаровалъ бицана ярмаркаялъул къоязда гьарурал цIех-рехаздаса баянлъанин жакъасел гIолилаз тIахьал цIалулел рукIин ва гIемерисезда гьезда гьоркьоса лъикIал рищизе лъалеб бугин. Гьелъ цIалана ярмаркаялде рачIараз батIи-батIиял тIахьазул хIакъалъулъ тарал лъикIал рагIаби, авторазе гьарурал гьара-рахьиял. ГIуцIарухъабаз бицаралда рекъон, цIалдолезе рекIее гIун руго "Имам ГъазимухIамад", "Дагъистаналде кулинарияб сапар" тIахьал. 
"Тарки-Тау" выставка-ярмарка къалаго Марат ХIажиевас бицана тIахьазул байрам щибаб лъагIалида тIобитIизе бугин, гьабулеб хIалтIи гьоркьоб къотIизе биччазе гьечIин. "Хьул буго республикаялъул бетIерас гьаб тIахьазул выставка-ярмаркаялде кIвар кьелин ва хадусеб соналъгIаги цIалдезе бокьулезул байрамалде вачIинин абураб. Пачалихъалъулаб статус щвани гьаб тадбиралде жеги цIикIкIун гIадамалги рачIинаан, цIикIкIун кIварги букIина", - ян абуна Марат ХIажиевас. 
"Тарки-Тау" ярмаркаялъ тIахьазул цебелъей гьабизе цIакъ лъикIаб хIалтIи гьабулеб буго. ГIелмияб институталъ рахъарал тIахьал цере лъола. Аслияб къагIидаялъ нижеца хIалтIи гьабулел Дагъистаналъул миллатазул мацIазул, адабияталъул, маданияталъул ва фольклоралъул тIахьал рукIуна цере лъун. 1924 соналдаса нахъе жакъа къоялде щвезегIан гьел рахъазулъ гIелмиял хIалтIаби гьарулеб институталъул бечедаб адабият буго гьаниб цебе лъезе. Жакъа къоялде щвезегIан рукIинчIел щибаб миллаталъул ва хъвай-хъвагIай гьечIел Дагъистаналъул халкъазул словарал гIуцIун къватIире риччан руго нижеца. ГIемер гIадамал рачIуна выставкаялде батIи-батIиял миллатазул мацIазул словарал цIехон. Нилъер адабияталъулъ лъугьарал хиса-басиязул хIакъалъулъ гьелъул тарих хъварал тIахьал руго цере лъун. ГIелмияб къагIидаялъ учительзабазе кумекалъе тIахьалги риччала. Словарь цIехон гIемерисеб мехалда рачIуна учительзаби, гIалимзаби. Словарал ругебгIан заманалда мацIги цIунун хутIула", - ян бицана выставкаялда гIахьаллъарай ДНЦялъул РАНалъул ИЯЛИялъул кверзул хъвай-хъвагIаялъул фондалъул отделалъул начальник Мариза МухIамадовалъ. 

ШагIирзабазул ва цIалдолезул накъит

Ярмаркаялъул лъабабго къоялъ библиотекаялъул жанахIалъуб рагIулеб букIана Дагъистаналъул миллиял ва гIурус мацIазда рикIкIунел кучIдул. КучIдул рикIкIине ва гьел гьаризе жидерго бугеб махщел бихьизабуна шагьаралъул школазул лъималаз, студентаз. Цере рахъана шагIирзабиги. РукIана цIалдолезулги шагIирзабазулги дандчIваялги. Масала, ярмаркаялъул тIоцебесеб къоялъ гIисинал цIалдолелгун дандчIвана Дагъистаналъул халкъияй шагIир Аминат ГIабдулманапова. Гьелъ лъималазе бицана жиндирго творчествоялъул, цIалана кучIдул. Лъималазги ракIалдасан цIалана шагIиралъул кучIдул. Ярмаркаялъул кIиабилеб къоялъ рокьулел цIалдолезухъе ячIун йикIана магIарулазул машгьурай шагIир ТубхIат Зургьалова. Лъималазул гъугъалеб хъатчIваялда гъоркь гьурмада хIикматаб гьимигун, гьитIичазде кIудияб рокьигун, жиндирго кучIдулгун гьоболлъухъ щварай шагIиралъ гIисинал цIалдолезе цIалана кучIдул. Лъималазул жаваб кьезе гъира кколедухъ кьолел рукIана гьелъ гьезие суалалги. Берцинго бицине мацI лъаларезгицин хIаракат бахъулеб букIана шагIиргун магIарул мацIалда кIалъазе. ТубхIатица лъималазе рагьана рахьдаал мацIалъул балъголъаби. Гьелъ абуна хьандеялъулгицин берцинлъийила рахьдал мацIалдайилан. ШагIиралъ лъималазе сайгъат гьабуна жиндирго хIикматаб тIехь "Дир гьайбатаб Алипба". 
Исана "Тарки-Тау" тIобитIана цогидал тадбиралго гIадин хIалуцун гIадамазул хъуялъул яги кечI-бакъаналъул гьаркьихъе гуреб, библиотекаялда рукIине кколеб къагIидаялда, гIодобе биччан, амма цIикIкIараб пайдагун ва лъикIаб хIасилгун. 
Ахиралда "Тарки-Тауялъул" бищунго лъикIал тIахьазул конкурсалъул хIасилазул бицана ва бергьаразе шапакъатал кьуна. 
Конкурсалда букIана анлъго номинация. Жюриялда ругел 10 чияс 60 тIехьалда гьоркьоса номинациялда рекъон анлъгояб бищана. Конкурсалда "Тарки-Тауялъул" бищунго лъикIаб тIехь абураб гран-при щвана "Кавказалъул экспресс" тIехьалъе. Лъималазе хъвараб бищунго лъикIаб тIехь, бищунго лъикIаб поэзиялъулгун прозаялъул тIехь, Дагъистаналъул мацIалда бищунго лъикIаб тIехь, бищунго лъикIаб гIелмияб тIехь, "Тарки-Тауялъул" бищунго лъикIав художник-иллюстратор абурал номинациязда бергьарал тIахьазул авторазегун басмаханабазе сайгъаталгун шапакъатал кьуна. 
ЛъугIана тIахьазул байрам. Жеги гIемерлъана тIахьал цIалулелги. Гьезда гьоркьор гIемер рукIана гIолилалги лъималги. Рохизе ккараб хIужа буго миллиял мацIазда хъварал тIахьал цIалулелги соналдаса соналде гIемерлъулел рукIин. Гьелде кIвар кьолеб буго Дагъистаналъул тIахьазул издательствоялъги. Ярмаркаялда рукIана Дагъистаналъул миллиял мацIазда гьелъ къватIире риччарал фольклоралъул тIахьалги.    
ПатIимат СултIанмухIамадова,


Автор: Шамай Хъазанбиева

Газета №: 39, от 30. 09. 2016 Месяц выхода номера газеты. Например января Год выхода номера газеты. Например 2012г.





Уважаемый посетитель, Вы зашли на сайт как незарегистрированный пользователь.
Мы рекомендуем Вам зарегистрироваться либо войти на сайт под своим именем.

Комментарии:

Оставить комментарий

При использовании материалов сайта, активная гиперссылка на сайт Hakikat.Info обязательна!
При использовании материалов сайта в печатных СМИ, на ТВ, Радио - упоминание сайта обязательно!