Сделать домашней|Добавить в избранное
 
Главная » Ваши письма - Нужер кагътал » «РекIел ахIиялъул» хIасил
на правах рекламы

«РекIел ахIиялъул» хIасил

  • Версия для печати
Добавил(а): istina от 30-09-2016, 10:20
"Лъай кьеялъул министерствоялъул нухмалъулел! Щай школалде унел лъималазе цIалул тIахьал эбел-инсуца росизе кколел? Цо тIехьалъул багьа буго 400-500 гъурущ ва жеги цIикIкIунги. Школалде унеб кIиго-лъабго лъимер бугони ва щибаб лъимералъе ункъо-щуго тIехь босизе кколеб бугони, хIисаб гьабе, кигIанасеб гIарац унебали. Дир буго кIиабилеб классалде унеб лъимер, хIалтIул тетрадалъухъ ва кIиго учебникалъухъ кьуна 3200 гъурущ, росизе ккола жеги тетрадал ва тIахьал. Портфелалъул бицинчIого, цо тетрадалъул багьа буго 420 гъурущ. ТIадежоялъе, босизе ккола школалъулаб формаги! Гьеб кинабго дица босизе ккола, дие моцIрое щолеб 10 азарго гъурщихъ. Нилъер "мискинаб" пачалихъалда ва республикаялда кIолеб гьечIо школалда цIалдохъабазе цIалул тIахьал чIезаризе. Суал буго гьадинаб: гьеб кинабгоги босун, пачалихъалъ дун гIадиназул тIалаб гьабулареб мехалда, кин дица налогал кьезе кколел? Лъазе бокьилаан улкаялъул киналго субъектаздайищ гьедин бугебали яги нилъер республикаялдайищ?"
Гьаб суалалъе жаваб кьуна ДРялъул Лъай кьеялъул ва гIелмуялъул министерствоялъул хIалтIухъан ГIисаева Эльмираца:

- 2016-2017 цIалул соналда ДРялъул Лъай кьеялъул ва гIелмуялъул министерствоялъ 237 миллион гъурущги харж гьабун, тIоцебеселдаса анлъабилеб классазде щвезегIан цIалдохъабазе росана гьезул программабазде дандекколел цIалул тIахьал. Гьел церего школазде щвезаруна ва цIалдохъабазе рикьун рукIине ккола. СМСалда школалъул адрес бихьизабун букIарабани, гьениб бицунеб кIиабилеб классалъул цIалдохъаналъе учебникал  щвечIолъиялъе бугеб гIилла лъазабилаан. 2-5-абилел классазул цIалдохъаби араб соналъго росун рукIарал цIалул тIахьаздалъул хьезарун рукIине ккола. Гьел классазул цIалдохъабазе школазул библиотекабаздаса къваригIунел цIалул тIахьал кьеялъе квалквал гьабулеб бугони, гьеб ккола закон хвезаби ва гIарзгун ине ккола прокуратураялде.
7-11-абилел классазул цIалдохъабазе тIахьал кьезе ккола школалъул библиотекаялъул фондалдасан.
Гьединалго гIарзал нижехъе гIемерал рачIунел руго. Гьединлъидал,  ДРялъул Лъай кьеялъул ва гIелмуялъул министерствоялъ гьеб масъала тIубазабиялъул мурадалда гIуцIун буго  хIалтIулаб къокъа,  школалъул учебниказул ва цIалул пособиязул  экспертизаби гьари цIияб къагIидаялда тIоритIизе руго, хIадуризе руго электрониял учебникал, гьединго хис-бас гьабизе буго школалъул учебниказул федералияб сияхIалъулги.
ХIукуматалъ цIалул тIахьаздалъун хьезарула 1-6-абилел классазул цIалдохъаби, тIасияб соналда цIалул тIахьал кьезе руго анкьабилеб классалъул цIалдохъабазе, хадусеб соналъ - микьабилеб классалъул цIалдохъабазеги.
ПалхIасил, исана 7-11 классазул цIалдохъабазе школалъул библиотекаялдаса щвечIел тIахьал эбел-инсуца жидерго гIарцухъ тукабаздаса росизе ккола.
Школайин абуни цIалул тIахьаздалъун хьезабизе ккола районалъул лъай кьеялъул управлениялъ.

Газета №: 39, от 30. 09. 2016 Месяц выхода номера газеты. Например января Год выхода номера газеты. Например 2012г.





Уважаемый посетитель, Вы зашли на сайт как незарегистрированный пользователь.
Мы рекомендуем Вам зарегистрироваться либо войти на сайт под своим именем.

Комментарии:

Оставить комментарий

При использовании материалов сайта, активная гиперссылка на сайт Hakikat.Info обязательна!
При использовании материалов сайта в печатных СМИ, на ТВ, Радио - упоминание сайта обязательно!