Сделать домашней|Добавить в избранное
 
Главная » Культура - Маданият » РухI гьечIел "бахIарзал"
на правах рекламы

РухI гьечIел "бахIарзал"

  • Версия для печати
Добавил(а): istina от 15-08-2016, 10:18

Искусствоялъул цIияб рахъ цебетIезабулеб буго ясикIаби гьарулей устаралъ

Этникияб культураялъул централда гIуцIулеб буго Сакинат ИсмагIиловалъ гьарурал ясикIабазул "Киноялъул ясикIабазул бахIарзал" абураб выставка. Гьеб тIобитIизе буго 24 августалдаса 21 сентябралде щвезегIан. 

Дагъистаналъул фильмаздаса бахIарзазул сипатал рихьизарулел руго устаралъ ясикIабазул кумекалдалъун.  Выставкаялъул мурад ккола ясикIаби гьарулей устар Сакинат ИсмагIиловалъул хIалтIабазулгун ва гьелъул махщалилгун гIадамазул лъай-хъвай гьаби ва декоративияб творчествоялъул гьанжесел цIиургъарал рахъал церетIезари. Выставкаялда лъезе руго миллиял, батIи-батIиял халкъазул, чIартил гьарурал, ракIалдещвеялъе сайгъаталъе кьезе бегьулел, коллекциялъулал ясикIаби.
Дагъистаналъул ва гьединго Россиялъул цогидалги халкъазул ретIел ретIун къачIарал ва батIи-батIиял къагIидаби хIалтIизарун гьарурал ясикIаби рихьизе руго Сакинатил махщалихъ ралагьизе рачIаразда.
ГьитIинаб мехалда Сакинатие цIакъ бокьулаан Расул ХIамзатовасул "МагIарулай" поэма. Дагъистаналда "МагIарулай" фильм бахъулеб заманалда Сакинатица гIахьаллъи гьабун букIана гьитIинай Асиятил роль хIазе киноялъулал хIалбихьиязда. Амма эбелалъ гьей йиччачIо гьеб роль хIазе. Гьелдаса гIемер сонал ун хадуса Сакинатица хIалбихьана цогидаб нухалъ Асиятил хасият-сипат бихьизабизе. Гьаб нухалдайин абуни устаралъ гьеб бихьизабуна ясикIодул кумекалдалъун. Авторалъе гьитIинаб мехалдаса нахъе  анищлъун букIараб Асиятил роль выставкаялда хIазе буго магIарулалъул сипат-сурат бугей ва ретIа-къай бихьизабулей ясикIоялъ. Гьеб хIалтIи бергьана Санкт-Петербургалда тIобитIараб "КуклоГрад" III Фестиваль-конкурсалъул "Шарнирная кукла" абураб номинациялда. 
Сакинат цIалана Санкт-Петербургалъул пачалихъияб культураялъул ва искусствабазул университеталда. Гьей ккола художествиял ясикIаби гьарулей устар, Россиялъул этнографиялъул музеялъул хIалтIухъан. Гьелъул хIалтIаби лъун руго Россиялъул этнографиялъулаб музеялда, Россиялъул миллияб библиотекаялда, Россиялъул халкъазул Гьудуллъиялъул Музеялда, ДГОМаялъул филиалазда. 
2014 соналда "Дагъистаналъул халкъазул гIадатияб ретIел" абураб устаралъул коллекция бихьизабуна Москваялда Пачалихъияб Думаялда. Сакинатил хIалтIаби "ЦIияб Дагъистаналъул" брендлъун, ДРялъул церетIезе рес бугел проектазул цояблъун рикIкIуна. Жакъа авторасулаб ясикIо ккола  - скульптура, живопись, композиция, декор  жинда жанибе бачунеб искусствоялъул цIияб рахълъун. Ахираб заманалда дунялалдаго устарзабаз гьединал ясикIаби гьарулел руго гIицIго расанкIаби хIазе мурадалда гуреб, рукъзал къачIазелъунги, коллекциял данде ракIаризелъунги. 
"Киноялъул ясикIабазул бахIарзал" абураб выставка - гьеб ккола ясикIаби гьарулезе ва гьел гьаризе ругьунлъизе бокьаразе тIобитIулеб творчествоялъул байрам. 
ЯсикIабазул выставкаялда этникияб культураялъул централда 26-27 августалда тIоритIизе руго мастер-классал.  Дагъистаналъул халкъазул ясикIаби квераз рукъун гьарулеб къагIида бихьизабизе бугин бицана Этническияб культураялъул централъул хIалтIухъабаз. Выставка тIобитIулеб буго ДРялъул Культураялъул министерствоялъул ва этническияб культураялъул централъул кумекалдалъун.


Автор: ПатIимат СултIанмухIамадова

Газета №: 32, от 12. 08. 2016 Месяц выхода номера газеты. Например января Год выхода номера газеты. Например 2012г.





Уважаемый посетитель, Вы зашли на сайт как незарегистрированный пользователь.
Мы рекомендуем Вам зарегистрироваться либо войти на сайт под своим именем.

Комментарии:

Оставить комментарий

При использовании материалов сайта, активная гиперссылка на сайт Hakikat.Info обязательна!
При использовании материалов сайта в печатных СМИ, на ТВ, Радио - упоминание сайта обязательно!