Сделать домашней|Добавить в избранное
 
Главная » Общество - ЖамгIият » Къварилъи чияр букIунаро
на правах рекламы

Къварилъи чияр букIунаро

  • Версия для печати
Добавил(а): istina от 8-08-2016, 13:40
Гъуниб район кидаго букIана цебетIураблъун. Республикаялда лъикIаб рахъалдасан гурони гьелъул цIарги рехсолароан. Щайха жакъа районалда "квешаб унтиялъул" гIаламатал гIемерлъулел ругел? Щиб гьабизе бугеб гьеб "унти" сах гьабизелъун? Гьел ва цогидал суалазе  жавабал кьуна районалъул бетIер Пахрудин МухIамадовас. 

-Нижерго хIалтIуе нижецаго къимат кьей рекъон букIинаро, амма ахIвал-хIал хIалуциналъе аслияб гIиллалъун кколин абизе бегьула районалда изну гьеч1ого яргъид гIуцIаразе кумек гьабулел  камулел гьечIолъи. Гьеб къокъаялда вукIана лъабго чи. Законал цIунулел идарабазул жигарчилъиялдалъун гьеб къокъа биххизабуна. 2010 соналдаса нахъе микьгояв чIвана. Экстремизмалъул ва терроризмалъул рахъккурав ва ярагъ батарав анкьгояв тамихIалде цIана. Гьедин бугониги ахIвал- хIал хIинкъи бугеблъун хутIулеб буго, - ян бицана П. МухIамадовас. 
-Районалда гьеб "унти" баккиялъул республика бахун къватIибехун бухьен бугищ?  
-КъватIисел пачалихъазул исламиял цIалул заведениязда цIалулев вуго районалдаса лъабго чи. Сириялда вагъулев вукIана анлъгояв. Органазул хIисабалда вуго 23 чи. Гьеб кинабгоги хIисабалде босун, районалда гIадамазул хIинкъи гьечIолъи цIуниялъе гьабулеб хIалтIи цIикIкIинабулеб буго. ОМВДгун ва УФСБгун цадахъ районалъул щибаб росулъ гIадамазда гьоркьоб гьабулеб буго бичIчIикьеялъул хIалтIи. Изну гьеч1ого яргъид гIуцIарал ракълилаб гIумруялде тIадруссиналъе тадбирал гьарула. ДандчIваязде ахIун рукIана гьединазул гIагарлъиги. Районалъул администрациялда гIуцIун буго гьединал гIолилазда  гьоркьоб хIалтIи гьабулеб комиссия. Гьелъул аслияб масъалалъун ккола терроризмалъул ва экстремизмалъул идеологиялдаса гIолилал рикIкIад гьари. ЦIакъго ахIвал- хIал хIалуцарал росабалъе щола, дандчIвала росабазул бутIрулгун. БичIчIизабула гIолилазда гьоркьоб гьабулеб хIалтIулъ гьезул бугеб кIваралъул. Гьединалго дандчIваял  тIоритIула росабазул жамагIатазулгун. 
-ГIадамазда гьоркьоб бичIчIикьеялъул хIалтIи гьабиялъул хасаб программа бугищ?
-Буго. Районалда терроралда данде къеркьеялъул комиссиялда цебе гIуцIун буго гIадамазда гьоркьоб терроризмалда ва экстремизмалда данде къеркьелъул хIалтIул жаваб кьолеб хасаб къокъа. Гьелда гьоркьоре уна психологал, социалиял хIалтIухъаби, низам цIунулел идарабазул хIалтIухъаби, рухIиял церехъаби, росабазул жамагIатазул вакилзаби. ХIадур гьарун руго тIоритIизе ругел тадбиразул план ва график. Росабазул киналго бутIрузухъги буго гьеб программа ва жидеца кIвар кьезе кколел гIадамазул сияхI. Гьабунщинаб хIалтIул, тIоритIарал тадбиразул бицуна "Гъуниб" газеталдасан, "Дагъистан" РИАялдасан, Интернеталдасан,  районалъул хасаб сайталдасан. Исана гьеб темаялда хъван буго  46 макъала. Гьелго макъалаби лъуна Интернеталдаги. Гьединго тIобитIана 138 данделъи. Амма гьеб хIисабкьей гуребха нижее аслияб. Пикру буссинабулеб буго хIалтIул рахъиналде. ГIолилазда ва цIалдохъабазда гьоркьор тIоритIула батIи-батIиял конкурсал, спортивиял хIаял. Гьеб киналъего квербакъула районалъул лъай кьеялъул, культураялъул, гIолилазул ишазул рахъалъ политикаялъул отделаз. Гьединго терроризмалда ва экстремизмалда данде къеркьеялъул хIалтIулъ кIудияб бутIа лъола  росабазул учительзабаз, имамзабаз, жамагIатазул вакилзабаз. Исана тIобитIун буго 85 тадбир. Гьезда гьоркьоса спортивиял - 50, рекIелгъеялъулал - 20, гIолилазда гьоркьоб иш гьабиялъул - 15. ГIадатлъун лъугьун буго гIолилазул ва цIалдохъабазул район машгьур гьабурал  спортсменазулгун, тренеразулгун, рухIиял церехъабазулгун, гIалимзабазулгун дандчIваял тIоритIи. Гьез гIолилазда бичIчIизабула квешал ишаз лъикIлъиялде рачунареблъи, кире кканиги районалъул къиматги къадруги цIунизе кколеблъи, хасго терроризмалъул ва экстремизмалъул пикрабаздаса рикIкIалъизе кколеллъи. Районалъул гIолилал гIахьаллъула Россиялда ва Дагъистаналда тIоритIулел гIолилазул ва студентазул форумазда ("Селигер", "Каспий" "Машук"). Исанаги  гIахьаллъизе вуго: "Селигералда" - кIиго чи, "Каспиялда" - анцIго чи, "Машукалда" - микьго чи. Араб соналда гIахьаллъана 20 гIолилав,  щвана кIиго грант.  ГIолилазда гьоркьоб тарбия кьеялъул тадбирал тIоритIула районалъул ва росабазул библиотекабазда, музеязда. 
-Россиялъул цогидал регионаздаго гIадин республикаялдаги к1одо гьабула терроризмалда данде къеркьеялъул къо. Гъунибги гьеб къо тIобитIулеб батила...
-Лъабабилеб сентябрь лъазабун буго терроризмалда данде къеркьолеб къолъун. Гьеб къоялъ Гъуниб районалдаги тIоритIула батIи-батIиял тадбирал. Хасго гьелде кIварбуссинабула МохIоб росулъ - Совет Союзалъул кIиго БахIарчиясул ватIаналда. Районалъул щибаб росулъ  тIоритIула халкъазул гьудуллъиялъул бицунел тадбирал. Гьеб къоялда хурхун цереги районалда тIобитIулеб тадбиралда гIахьаллъизе ахIун  рукIана Совет Союзалъул БахIарчи  МухIамад  ХIажиевасул цIар кьураб Гаджиево шагьаралдаса вацал МухIамад ва Шамил ХIажиевал. Гьез хъулухъ гьабулеб буго Россиялъул северияб флоталда.  МухIамад ГIумарович ккола  "Верхотурия" лъеда гъоркьан хьвадулеб атомалъулаб гамил командир, Шамил ГIумарович  хIалтIулев вуго лъеда гъоркь рукIунел къуватазул штабалда. Гъуниб гьоркьохъеб школалъул цIалдохъабаз бихьизабуна "Къварилъи чияр букIунаро" абураб литературияб композиция. 
-Терроризмалда данде къеркьеялъул ишалъулъ диниял идарабаз гьабулеб гIахьаллъи кинаб бугеб?
- Гъуниб районалда  буго 25 мажгитги ичIго мадрасаги. Гьез кIудияб хIалтIи гьабула гIолилазда гьоркьоб, гIемер тIоритIула дандеруссинал. Диниял хIаракатчагIаз кIвар кьолеб буго гIун бачIунеб гIелги гIолилалги мекъаб нухде риччангутIиялде. Амма ракIалда гьечIо гьабуралда гIей гьабун чIезе. Камулел гьечIелъулха гIолилазул пикраби риххизарулелги. Гъуниб ккола дунялалдаго машгьураб росу. Гьелъул буго бечедаб тарихги бахIарчиял гIадамалги. Гьеб буго Дагъистаналъулго чIухIи. Камулел гьечIо гьеб чIухIиялдаги бахIарчилъиялдаги рогьоялъул тIанкIал лъезе хIаракат бахъулел. Районалде гIемер щола республикаялъул терроралда данде къеркьеялъул комиссиялъул членал. Гьел дандчIвала районалъул батIи-батIиял идарабазул вакилзабигун. Бицуна районалда бугеб  ахIвал-хIалалъул, церечIарал масъалабазул, гьарурал ва гьаризе ругел ишазул. Комиссиялъул членазул малъа-хъваязда  рекъон, щибаб рузманкъоялъ мажгитазде рачIарал гIолилазе  гьарула насихIатал, бицуна экстремизмалъул ва терроризмалъул кьогIал дарсазул, берцинаб гIумруялда гьез лъолел ругъназул, кьучIдасанго биххизабулеб талихIалъул. Районалъул нухмалъиялъги хIаракат бахъулеб буго жиндехунго гIадамазул божилъи цIикIкIинабизе. Халкъалдаги тIалъиялдаги гьоркьоб кIудияб манзил бугони, гьабураб хIалтIул хIасил кколаро. Районалъул гIадамазул хIинкъи гьечIолъи цIунизелъун, киналго цадахъ рекъон хIалтIулел руго. Гьабураб хIалтIул лъикIал хIасилалги кколел ругин абизе бегьула.



Автор: Зикрула ИЛЬЯСОВ

Газета №: 31, от 5. 08. 2016 Месяц выхода номера газеты. Например января Год выхода номера газеты. Например 2012г.





Уважаемый посетитель, Вы зашли на сайт как незарегистрированный пользователь.
Мы рекомендуем Вам зарегистрироваться либо войти на сайт под своим именем.

Комментарии:

Оставить комментарий

При использовании материалов сайта, активная гиперссылка на сайт Hakikat.Info обязательна!
При использовании материалов сайта в печатных СМИ, на ТВ, Радио - упоминание сайта обязательно!