Сделать домашней|Добавить в избранное
 
Главная » Общество - ЖамгIият » Терроризм - "бахунеб унти"
на правах рекламы

Терроризм - "бахунеб унти"

  • Версия для печати
Добавил(а): istina от 2-08-2016, 10:36
Жакъа республикаялда терроризмалда данде гьабулеб къеркьеялде унго-унгояб кIвар буссинабулеб бугин  абуни, мекъи ккеларо. ТIолабго Дагъистаналда гьабулеб гьеб хIалтIул хIасил, узухъда, бараб буго жиб-жиб районазда, росабалъ   гьелда сверухъ гьабулеб хIалтIуда. 
Гьелъул бицун нижеца гара-чIвари гьабуна редакциялде  гьоболлъухъ  вачIун вукIарав  "Казбек район" муниципалияб гIуцIиялъул бетIер ХI. Мусаевасулгун.

 

- ХIажимурад, кинаб ахIвал-хIал бугеб гьеб рахъалъ нужер районалда?
- ТIоцебесеб иргаялда, нижеца гьеб хIалтIи гIуцIун буго  хасал планазул кьучIалда.  Гьарулел хIалтIаби тIураялъул суал зама-заманалда администрациялъул данделъабазде  босула.  
Исана районалда тIоритIарал аслиял тадбиразда гьоркьор руго: цIалдохъабазда, гIолилазда гьоркьоб исламалъул хIакъалъулъ цIех-рех гьаби. Гьел цIех-рехазда гIахьаллъана 200 чи. Гьединго "Казбекалъулал терроризмалда ва  экстремизмалда данде!" абураб ахIиялда гъоркь росабазул гIолилазда гьоркьор тIоритIана  батIи-батIиял спортивиял къецал. Имам Шамил ракIалде щвезави мурадалда гIуцIарал ишазулъги аслияб кIварбуссинабуна жакъасеб роцIараб гIумруялда мадугьалзабазул, росуцоязул ва гьединго районалъул, гьеб бахун къватIир  ругезулги рахIатхвезаби нижер гIолилазул рахъалдасан букIине бегьунгутIиялде. Дилим росулъ тIобитIана гIолеб гIелалъе рухIияб рахъалъ тарбия кьеялда хурхун ахIараб мажлис. Районалда гьабуна шахматазул хасаб турнир ва гьел гурел цогидалги хIалтIаби. ХIасил хIисабалда абизе ккола, органазул хIисабалда вукIарав чанго гIолилав битIараб нухде вачIинавизе  бажаранин. 

ЦIех-рех ва гьелъул хIасил

- Терроризм баккиялъе гIиллаби киналлъунха рихьизарурал гьабураб цIех-рехалъ?
- Аслияб къагIидаялда терроризм бижиялъе гIиллабилъун рикIкIунел руго жамгIият загIиплъи, гIадамазул ихтиярал цIунулел идарабазде божилъи дагьлъи, диналда жанир лъугьарал рикьалаби. Хадубккун хIалтIи гьабизе буго гьел гIиллабиги хIисабалде росун. Аслияб куцалда гьеб хIалтIи росабалъ гIуцIун буго.

 Хасаб комиссия

- Районалда терроризмалде данде къеркьеялъул комиссия гIуцIун бу-гищ ва кин гьеб хIалтIулеб бугеб? 
- Гьединаб комиссия нижеца цебего гIуцIана. Гьелда гьоркьор руго лъай кьеялъул, культураялъул, гIолилазул ишазул рахъалъ отделазул нухмалъулел, росабазул бутIрул, районалъул газеталъул хIалтIухъаби. Районалда тIобитIана  "Защита" операция. "Салатавия" бакIалъулаб телевидениялдасан  гIемер бицуна  терроралда данде къеркьеялъул мурадалда комиссиялъ гьабулеб хIалтIул.
Гьабулеб хIалтIулъ кIварбуссинабула такъсирчилъиялда данде рагъ балел органазулгун щулияб бухьен букIинабиялде.
 ГIадамаздехун хитIабал гьарун цере рахъуна районалъул прокурор, судья, росабазул мажгитазул имамзаби, полициялъул хIалтIухъаби, администрациялъул вакилзаби. Гьединго лъикIаб хIалтIи  гьабулеб буго "Дун - президентасул кумекчи"  гIуцIиялъул  гIолилазги.

Интернетги кумекалъе ахIун

- Районалъул газеталдасан, телевидениялдасан гьабулищ гьеб рахъалъ хIалтIи?
- БакIалъулаб телевидениялдасан нижеца рихьизарула патриотикиял, Россиялъул бахIарзазул бицунел фильмал. Нижеца бахъана ва бихьизабуна 13 видеороликги. Хасго кIвар кьола районалдаса рахъарал Россиялъул  лъабго бахIарзазул мисалалда гIолилал куцаялде. Гуниялдаса Арзулум Ильясовасул, Ленинаулалдаса Юрий Салимхановасул, Калининаулалдаса МухIамад-Казим Гъайирхановасул   гIумруялъул хIакъалъулъ бицарал передачаби, документалиял фильмал.  Гьезул хIакъалъулъ "Казбекалъулал - Россиялъул бахIарзал" абураб хIадурараб роликги буго. Гьезул биценал  гьарула школазда ва росабазул Россиялъул халкъазул культураялъул кIалгIабахъ. 
Диниял экстремистазул къокъаялде гьоркьоре ккарал гIолилазда гьоркьоб гьабулеб хIалтIул даража кIванагIан  борхизабулеб буго. Интернеталдасан бицуна терроралда данде тIоритIулел  тадбиразул.  ГIолилазда гьоркьор тIоритIула батIи-батIиял конкурсал. Дилималъул лицеялъул цIалдохъаби щвана Бесланалдеги.
Гьединго районалъул нухмалъулелги рахъуна телевидениялдасан, газеталдасан гьеб тематикаялда хурхарал кIалъаялгун. Гьел ва цогидалги терроризмалда данде гьарулел хIалтIаби гIумруялде рахъинаризе харж гьабуна 71.8 азаргогIанасеб гъурущ гIарацги. 
Терроризм халкъалъул бокьараб гъаталде жанибе лъугьунеб унти бугелъул, гьединго нижеца кIвар кьола туснахъалдаса рачIарал районцоязде. Гьединазул жакъа районалда вуго щуго чи. Жидер щакдарияб хьвада-чIади бугелги хIисабалде росизе ккола. Гьезулги районалда вуго 15-гIан чи. Хасаб кIварбуссинабула къватIисел пачалихъазда динияб цIали гьабун рачIарал гIолилазде. Гьезул къадарги 43 чиясде бахуна. ТалихIалъ, аслияб куцалда гьел руго жамгIияталъе квалквал, хIинкъи гьечIеб, бацIцIадаб диналъул гIадамал.
Нижер хIалтIулъ гIунгутIабиги камун гьечIо. Амма ахирал соназда нижехъа бажарана гьеб хIалтIул хIалбихьи бечед гьабизе, гъваридго гъорлъе раккизе. Гьелъ рес щолеб буго ругел гъалатIал дагь-дагьккун ритIизаризе. Дица гьел риччангутIиялъе республикаялъул бетIер Р. ГIабдулатIиповасе рагIиги кьун букIана. РакIалда буго рагIул бетIергьанлъи гьабизе. Нижер район ккола миллатал гIемераблъун. Терроризм бугелъул бахунеб унти, гьелъие дару буго халкъалда гьоркьоб гьудуллъи щула гьаби.



Автор: Гара-чIвари гьабуна Зикрула ИЛЬЯСОВАС.

Газета №: 30, от 29. 07. 2016 Месяц выхода номера газеты. Например января Год выхода номера газеты. Например 2012г.





Уважаемый посетитель, Вы зашли на сайт как незарегистрированный пользователь.
Мы рекомендуем Вам зарегистрироваться либо войти на сайт под своим именем.

Комментарии:

Оставить комментарий

При использовании материалов сайта, активная гиперссылка на сайт Hakikat.Info обязательна!
При использовании материалов сайта в печатных СМИ, на ТВ, Радио - упоминание сайта обязательно!