Сделать домашней|Добавить в избранное
 
Главная » Молодежь - ГIолохъанлъи » Пионер - лъималазе мисал
на правах рекламы

Пионер - лъималазе мисал

  • Версия для печати
Добавил(а): istina от 30-05-2016, 10:25

РакIбацIцIадав инсан куцазе ккани, гьев лъикIаб ишалде машгъуллъизавизе ккола 

ТIоцересел галаби

1922 соналъул 19 маялда тIолабго Россиялъул комсомолазул кIиабилеб конференциялда къабул гьабуна киса-кирго пионеразул отрядал гIуцIизе ккелин абураб хIукму. Гьебго соналъул октябралда РКСМалъул щуабилеб съездалда тIадаблъун гьабуна пионеразул отрядал цолъизариялъул иш. 1924 соналда гьеб цолъиялъе кьуна В. И. Ленинил цIар ва 1926 соналда гьеб хисана "В. И. Ленинил цIаралда бугеб тIолабго союзалъул пионеразул гIуцIи" абун.
ТIоцере гIуцIарал пионеразул отрядал хIалтIулел рукIана заводазул, фабриказул, учреждениязул комсомолазул ячейкабазда, гIахьаллъулаан субботниказда, кумек гьабулаан лъавукълъиялда данде къеркьезе.
Пионеразул коллективазда тIибитIун букIана рагъулгун оборонаялъулаб хIалтIи: гIуцIун рукIана гIисинал кьвагьдохъабазул, санитаразул, бухьенчагIазул кружокал, тIоритIулаан рагъулалгун спортивиял хIаял. КIудияб ВатIанияб рагъул соназда гIуцIана тимурилазул хIаракатчилъи. Тимурилаз кумек гьабулаан фронталда ругезул хъизамазе, ракIарулаан даруял хурдул, махх-мачI, танкабазул колонна гIуцIиялъе гIарац, хIалтIулаан ахакьгун хурзабахъ.
Пионераллъун росулаан школазул цIалдохъаби ва пионерлъун вахъин рикIкIунаан къадруяб, коммунистазулаб жамгIияталде тIамулеб тIоцебесеб галилъун.
Пионеразул гIуцIиялъ хIалтIизарулаан берцинал гIаламатал: каранда балеб гIаламат - цIва, багIараб галстук, щибаб школалда букIунаан пионеразул хасаб рукъ. Гьениб дружинаялъул байрахъ, къали, зурма, къадада ран рукIунаан ХIурматалъул грамотаби ва цогидалги шапакъатал.
БитIараб къимат кьолеб бугони, пионеразул гIуцIияз гIемерал ишал гьаруна, хасго инкъилаб бергьарал тIоцересел соназда, бахIарчилъи бихьизабуна КIудияб ВатIанияб рагъда. Гьеб тарих киданиги кIочене бегьуларо.

Пионеразул законал

Аслияб къагIидаялда сундеха буссинабун букIараб пионеразул гIуцIиялъул хIалтIийин абураб суалалъе жаваб щола гъоркьехун кьурал пионеразул законал цIалидал. Пионер ВатIаналъе кидаго ритIухъав вукIуна.
Пионерас хIаракат бахъула рагъул бахIарзазда ва хIалтIул церехъабазда бащалъизе.
Пионерас кIочене толаро рагъда хваразул цIарал ва хIадурула ВатIана цIунизе.
Пионер цIалулъги, хIалтIулъги, спорталъулъги кидаго цеве вукIуна.
Пионерасул сундулъго гIадлу букIуна.
Пионер ккола яхI-намус бугев ритIухъав гьалмагъ.
Пионер - лъикIав гьалмагъ ва октябрятазул цевехъан.
Пионер - ракIбацIцIадав инсан.

ЦIияб тарих, цIияб къисмат

Ункъоялда анцIабилел соназда биххана СССР, кIалагъоркье чIвана пионеразул гIуцIи. КватIичIого улкаялъул тIалъиялда бичIчIана школлъимал цо пикруялде, гIакълуялде, жамгIияталъе пайдаял ишазде руссинаричIого гIолареблъи. Гурони, гьел мекъаб нухдасан ине бегьулеблъи ва гьезие битIараб тарбия кьезе захIмалъулеблъи. ХIалбихьулеб букIана пионеразул гIуцIи цIигьабизе, амма цебе рукIарал гIадал гIолилазул ва лъималазул идараби гIуцIун бажаричIо. ГIуцIана гьелда релълъа-рекъарал лъималазул цолъаби ва гIуцIиял. 1992 соналда гIуцIана лъидаго ва сундаго бачIеб "ЦIияб Цолъи" абураб лъималазул жамгIияб пионеразул гIуцIи.
Жакъа республикаялда школлъималазул гIуцIабазул бугеб ахIвал-хIалалъул бицана ДРялъул Лъай кьеялъул министерствоялъул лъималазе ва гIолилазе тIадеги лъай кьеялъул ва социалияб рахъалъ гьел цIуниялъул управлениялъул начальникасул заместитель Ирина ХIайбулаевалъ.
"2015 соналъул 29 октябралда РФялъул президент В. Путиница гъулбасана "Российское движение школьников" абураб ТIолгороссиялъул жамгIиябгун пачалихъалъулаб лъималазулгун гIолилазул идара гIуцIиялъул указалда гъоркь. Гьеб идара гIуцIиялъул аслияб мурад ккола гIун бачIунеб гIелалъе тарбия кьеялъул мурадалда гьабулеб политика лъикIлъизаби ва лъимер куцай. Исана 15 апрелалда ДРялъул Лъай кьеялъул министерствоялда тIобитIараб конференциялда хIукму гьабуна "Российское движение школьников" абураб тIолабго Россиялъул жамгIиябгун пачалихъияб лъималазулгун гIолилазул идараялъул кьучIалда Дагъистаналда регионалияб отделение гIуцIизе, къабул гьабуна устав. Бищунго гIемерал лъимал гьоркьоре унеблъун рикIкIуна "Ирсилал" абураб жамгIияб идара.
2014-2015 соназда республикаялда букIана 482 лъималазул жамгIияб цолъи. Гьединго, республикаялда гIуцIун буго "Юность Дагестана" абураб лъималазул ва гIолилазул идарабазул федерацияги. Гьелъул буго жидерго гIаламат, атрибутика ва Россиялъулги Дагъистаналъулги байрахъазул цолъиялъул бицунеб ункъкьераб галстук".

Пионеразул байрам

19 маялда республикаялъул гIемерисел районазда гIатIидго тIобитIана пионеразул байрам. Амма республикаялъул даражаялда гьеб байрам тIобитIичIого теялъе ккараб гIиллаялъул гьадин бицана "Лъималазул ва гIолилазул жамгIиял гIуцIабазул" директор Людмила СагIидовалъ:
- Республикаялда гьечIо тIолабго Дагъистаналъул лъималазул жамгIиял гIуцIабазул гIаммаб идара. Гьеб гуребги, районаздаса пионерал гьеб байрамалде рачине гьечIо гIарац. Гьедин бугониги, республикаялъул киналго шагьаразул ва районазул школазда тIоритIана байрамалъулал данделъаби.
Каспийскиялдаги тIобитIана лъималазул жамгIиял гIуцIабазул къоялъе сайгъат гьабураб рохалилаб данделъи. Гьенир гIахьаллъана шагьаралъул лъималазул жамгIиял гIуцIаби, шагьаралъул батIи-батIиял идарабазул вакилзаби.Байрам рагьана шагьаралъул бетIерасул заместитель Людмила Левицкаялъ. Гьелъ бицана шагьаралда ругел лъималазул гIуцIабазул. Гьединаб 12 гIуцIи буго Каспийскиялда, гьезда гьоркьобе уна 4,5 азарго лъимер. Людмила Левицкиялъ баркала кьуна лъималазе ва гьезул гIуцIабазе сундулъго кумекалъе ратулел лъималазул творчествоялъул рукъалъул методист Ольга Мусанабиевалъе, Пайзанат Абачараевалъе, Гюльнара Селимхановалъе. Байрамалъул ахиралда лъималаз бихьизабуна концерт.

 

Автор: Нури Нуриев

Газета №: 21, от 28. 05. 2016 Месяц выхода номера газеты. Например января Год выхода номера газеты. Например 2012г.





Уважаемый посетитель, Вы зашли на сайт как незарегистрированный пользователь.
Мы рекомендуем Вам зарегистрироваться либо войти на сайт под своим именем.

Комментарии:

Оставить комментарий

При использовании материалов сайта, активная гиперссылка на сайт Hakikat.Info обязательна!
При использовании материалов сайта в печатных СМИ, на ТВ, Радио - упоминание сайта обязательно!