Сделать домашней|Добавить в избранное
 
на правах рекламы

РакIалдещвеял

  • Версия для печати
Добавил(а): istina от 30-05-2016, 10:22

ГIадан хола, гIаданлъи нахъе хутIула. ГIадан ракьулъе уна, лъикIаб иш ракьалда хутIула. Гьединаб буго умумузул аби. Жидер лъикIал ишал ракьалда хутIарал, захIматалъ берцин гьарурал гIадамал гIемер рукIуна дунялалда. Гьединавлъун вукIана, 2016 соналъул 11 февралалда гIумруялдаса ватIалъарав, лъималазе тарбия-лъай кьолаго гIумру арав, директорзабазулги директор МухIамадов Чалаби.

МагIарулазул аби буго, вижараб бакIалда бараб букIунила инсанасул гIамал-хасиятилан. 1937 соналда МухIамад Бекмирзаевасул хъизаналда гьавурав, магIарул махIги яхIги жиндилъ бессарав Чалаби батIияв чилъун лъугьине рес букIинчIо. Заман анагIан камиллъулеб ва бечелъулеб букIана Чалабил мугIалимлъиялъул ва директорлъиялъул хIалбихьи. Гьелъие нугIлъи гьабула 54 соналъ хисичIого директорлъи гьабиялъ ва щварал шапакъатаз.
Гьел саназда, Чалаби МухIамадовасул хIаракаталдалъун, гIемерал хIалтIаби гьаруна школа цебетIеялъе. 1978 соналъул марталда райцентралда хIалтIизе лъугьана 640 цIалдохъанасе бакI бугеб лъабготIалаялъулаб школа. Сверухълъиялда чIана гъутIби, щуго гектаралда школлъималаз росдада цебе бугеб ЦIинабалъ абулеб бакIалда накIкIил гъутIбузул хьон хьана. Гьениб гIун бачIун буго накIкIил рохь. Школалда аскIобго буго гIатIидаб спортивияб зал. ГIуцIун руго физкультураялъул, тарбия кьеялъул ва спортивиял тадбирал тIоритIиялъе шартIал. Чалаби директорлъун хIалтIарал соназда гьоркьохъеб школа лъугIана 1813 цIалдохъанас. Медалазда лъугIизабуна 22 чияс. ТIадегIанаб лъай щвана школа лъугIаразул 93 проценталъе. Рахъана гIелмабазул докторалги, кандидаталги, вузазул проректоралги, ДРялъул Халкъияб Собраниялъул депутаталги. Школа кидаго букIана кадрабазул къебелъилъун. Улкаялъул шагьараздагун росабалъги хIалтIулел руго тохтурзаби, росдал магIишаталъул махщалилал. Гьез мустахIикъаб бутIа лъун буго социалиябгун экономикияб цебетIей росулъ, районалда, республикаялда, Россиялда букIинабиялъулъ.
Школалъул материалиябгун техникияб база щула гьабиялъе гIемераб хIалтIи гIуцIана. Ахирал соназ школалде бачIана гьанжесеб цIалулгун лабораторияб къайи, лъай кьей камилгьабиялъе рес кьолеб буго компьютераз. Гьел руго байбихьул классаздаги, библиотекаялдаги, гIемерисел кабинетаздаги. РукIалиде ккезабун буго электродневникалъул хIалтIи. Лъабго кабинеталда буго интерактивияб доска. ХIалтIулеб буго компьютернияб класс. Интернет буго микьго кабинеталъуб. МелъелтIа гьоркьохъеб школа лъугьун буго социалиябгун культурияб централъун. Дарсаздаса къватIибехун гьабулеб хIалтIулъ гIахьаллъула школлъималазул 70-80 процент. Лъимал хьвадула тIадеги лъай кьеялъул кружоказде, искусствоялъул, лъималазулгун гIолилазул спортивияб школазде.
Бечедаб хIалбихьи буго школалъул цIалдохъабазе рагъулабгун тарбия кьеялъул тадбирал тIоритIиялъулъ. ТIоритIула ВатIан бокьиялъул темабазда конкурсал, рагъулабгун спортивияб хIай "Бергьенлъи" ва цогидалги тадбирал. Библиотекабазул хIалтIухъабазулгун щулияб гьудуллъи букIуна цIалдохъабазул. Районалъул библиотекаялда цониги конференция унаро цIалдохъабаз, учительзабаз, школалъул дирекциялъ гIахьаллъи гьабичIеб.
МелъелтIа гьоркьохъеб школалъул цIалдохъабаз бергьенлъаби росула районалъул, зоналиял, республикаялъулал спортивиял къецазда. Хасго речIчIухъабаз рази гьарула. Гьел ва цогидал тIадегIанал хIасилал росиялъулъ кьучI лъуразул цояв ккола мунагьал чураяв МухIамадов Чалаби. Рехселин гьесие щварал цо-цо шапакъатал. 1978 соналъ мустахIикълъана "Халкъияб лъайкьеялъул отличник", 2001 соналъ - "Дагъистан Республикаялъул мустахIикъав учитель" абурал цIаразе. 2005 соналъ щвана Россиялъул профсоюзаз 100 сон тIубаялъул хIурматалда юбилеялъулаб медаль. Хъизан гIуцIаралдаса 50 сон тIубаялъул хIурматалда, 2012 соналъ кьуна "За любовь и верность" медаль. 79 сон тIубалаан исана Чалаби МухIамадов гьавуралдаса. Гьесул юбилей гьабиялде хIадурлъулел рукIана ниж. Живго директорасдаги ракIалда букIана педколлективгун, школлъималгун дандчIвазе, жиндирго захIматалъулаб хIаракатчилъиялъул, гIумрудул нухалъул ракIалде щвезабизе . Амма халатбахъараб унтуца квалквал гьабуна, тIурачIо анищал, хутIичIо юбилей кIодо гьабизегIан. Гьунар камилав мугIалим, гIамал лъикIав инсан Чалаби МухIамадовасе алжан насиблъаги. Гьесул хIаракатчилъи, сахаб гIамал, гьес нахъа тараб 54 сонил лъайкьеялъул хIалбихьи гIолеб гIелалда ва цадахъ хIалтIаразда кидаго кIочоне гьечIо.

 

Автор: Равзат ХIасанова, МелъелтIа гьоркьохъеб школалъул мугIалим

Газета №: 21, от 28. 05. 2016 Месяц выхода номера газеты. Например января Год выхода номера газеты. Например 2012г.





Уважаемый посетитель, Вы зашли на сайт как незарегистрированный пользователь.
Мы рекомендуем Вам зарегистрироваться либо войти на сайт под своим именем.

Комментарии:

Оставить комментарий

При использовании материалов сайта, активная гиперссылка на сайт Hakikat.Info обязательна!
При использовании материалов сайта в печатных СМИ, на ТВ, Радио - упоминание сайта обязательно!