Сделать домашней|Добавить в избранное
 
Главная » Молодежь - ГIолохъанлъи » Гьекъон къеч хьолареб лъимерлъудал ицц
на правах рекламы

Гьекъон къеч хьолареб лъимерлъудал ицц

  • Версия для печати
Добавил(а): istina от 13-05-2016, 10:44
Лъимерлъи - гIумруялъулги хIикматаб маргьа, гьелъул магIна, аслу. Доб мехалда бичIчIулароан щай гьеб гIумруялъул бищунго талихIаб бутIалъун рикIкIунебали.
Амма гьеб унго-унгоги букIун буго талихIалъулги талихIлъун.
Лъимерлъиялъул лахIзатал гIемер ракIалде щола ихдал, тIабигIаталъ талихIалъул бакънал рачунеб заманалда. Цинги, цо магIарул кочIолъ ахIухъе, "рекIел анищазул щенон балеб цIадалъ цIалтун йиччизаюла". РакIалдещвеял… ракIалдещвеял...
Гьезул куркьбаздаги рекIун, дун йоржуна гIагараб росулъе ва тIавап гьабула гьелъул мугIрузул жеги гIазу биинчIел тIогьазда, щола хъачIал кьурабалъе ва хъитIахъе, цинги рещтIуна тIанусдерил балалъул тIогьий. Гьеб борхалъудасан гIагараб росдаде тIадеги къулун, бокьун буго ахIизе:
- ГIага-ра-ра-б-б ТIануси! Дир лъимерлъиялъул къин гьечIеб ицц. Гьале дун жакъаги щвана духъе. Доб кидаялиго лъимерлъуда гIадин, дур авлахъазда хъахIилал, хъахIал, тIогьилал тIугьдул ретIулей йиго.
ГIуртIа майданалда екерахъдилей йиго. Гьале доб ТIанусиса ГIободе ГъардикIкIалахъан унеб сухъмахънух. Гьеб чанги бокIкIинабуна дица, эбелгун цадахъ гьелъул росулъе унаго. Гьеб нухалде тIаде балагьараб кьурул гIус ккола нижер сапаразул нугIлъун.
Гьелда гъоркь хIухьбахъизе гIодой кIусизе дун хIинкъулаан, гьанже гуреб гьанже биххун бачIинилан кколаан. Дун жиндаса хIинкъулей йикIараб кьурда бугеб кьватIел гьанже дагьабги кIодолъун, гIатIилъун буго. Гьенисан гъоркье лъугьунаго, батула Гъардиицц. Гьениса гьекъараб цIорораб лъеца дун гIорцIулароан - гьекъанагIан гьекъезе бокьулаан. ЦIакъ бокьулаан гIенеккизе эбелалъ ахIун бачунеб зикруялъухъ. Жеги бокьулаан ялагьизе мугIрул цIумалъул рорженалъухъ. ГьитIинай диеги бокьун букIана цIумалдаги рекIун, дунял сверизе.
Гьале НацIигохIги. Дица росдал харабаздаги гьикъулаан гьеб цIаралъул магIна, амма гьанжеги лъаларо дида гьелъул магIна. Гьенир гIодор чIун рукIунаан, бачал рехъадаса рачIинегIан. Лъарахъе щвезагIанги унаан гьезда хадур. Лъарамухъккун эхере унаан тIугьдул ретIизе. Хьиянире унаан мучари бакIаризе. Гьелъул гулал гьарулаан. ГIуртIе рахунаан, бетIараб мучариги жубазабун, гулал киналго ясазе ращад кколеб хIалалъ къалаан.
Гулазда гьоркьосан раккизарун, бакI-бакIазда тIугьдузул квацIабиги рукIунаан.
Хьияниб буго тIину гьечIеб хIорги. Гьенире аскIорегIан къазецин хIинкъулаан ниж, хьуцIалги муцIиги рукIана хIор сверун. Къецбан нижго рукIунаан гьеб хIоралъул къисаби ургъулел, цо-цо рагъизеги рагъулаан, къацандулаан. Гьелъухъцин чIалгIун йиго...
Гьале росдал хIор. Гьанже гьечIо гьанир доб мехалда рукIарал кIудиял цIвакарал къанал. Гьезда тIад черолаан. Елъизеги бачIуна цо-цо мехалда - чуризегицин гьечIеб парталги босун, унаан хIортIе черезе. ХIатIида гIицIго къанабазда черолеб мехалда, букIунеб букIараб лазат!
Цоцазде лъим чвалхиги гьабулаан, бакъалда парталги бан, гьеб бакъвазегIан гьенирго чIолаан. Чуризе жо гьечIониги, дун цо-цо рекIелгъеялъеги унаан гьение. Гьенисан бихьула ГIебелаги. КIудиял тургьбиги росун, мичIчI бетIизе унаан, гIурабго нух нахъаги тун. Баладе тIаде рахаралго, батулеб расалъиялда, букIунаан гIемераб мичIчI. Гьеб бетIулелъулги гьабулаан цоцазе кумек.
Цадахъго цIамги босулаан, МичIчIил къакъуцIал кунаан, тIаде цIамги щван. Дагьабго мичIчIги босун, гьеб лъикI, сок бачIинегIан кIвекIун, тамах гьабулаан. Гьелда нижеца къакъуцIилан абула. БукIараб тIагIамаб квенха гьеб, хасго гIемер нухги нахъа тун, свак чучизе гIодор чIараб мехалда.
Бакъвазабизеги бетIулаан мичIчI. Гьелъул гьарурал цIурачадал, пурщаби, хинкIалги росун, цоцазухъе унаан. Дица гьаруразда гьедигIан тIагIамгойищ букIунареб букIарабали, амма дун йохизе дир хинкIал цIакъго цIакъ реццулаан. Гьединал, хIикматаб рухIияб берцинлъиялъул гIадамалха нижер тIанус ругел!
Гьанже гьеб ракIалдещвараб мехалъ, гIажаибаб гьогьен чIвала рекIеда.
Магьал раччулеб заман цебечIезабулелъулги, кIаркIарун елъизе бачIуна. Хасалихъе гъира букIунаан бакъвараб харил магьал цIезе ва раччизе. Гьебги цадахъ гьабулаан. Цоцазул ссаналги ххан, магьал цIезе кумек гьабулаан. Магь цIезеги дир цо кIудияб махщел букIинчIо. Гьебги киназулгоялдаса гьитIинаб букIунаан. Магьил ункъабго рахъалдасан тIугьдулги лъолаан дие эбелалъ. БукIунеб букIараб чIухIиха, магьги баччун унеб мехалда. Данде ккаралги релъулаан дида, магьил кIодолъиго щибиланги абун. Дицаги жаваб кьолаан дун эбелалъул цохIо йигей яс йигилан. Дидаги абулебгIаги рагIун букIун батилаха. Цо-цояз абулаан дида:
- Эбелалъул цого жо - царгъиний кIетIолей жо, - йилан. Гьелъул магIна бичIчIулароан дида. Йохулей йикIараб куцха, лъица бугониги Шамай,- бикайилан абураб мехалдаги.
Ецаризегиха дида лъалеб букIараб. ХъандирогIанасеб харицелги гъежда лъун харибакIалде унелъул, дандеккаразе цIакъ кеп щолаан. ГьедигIанабго хадироги букIана. КIалкквезе байбихьаралдаса нахъе КIалбиччанкъо щвезе къоялги рикIкIунаан. Гьеб къоялде кIодоэбелалъ букъараб таргьаги букIана дир. Свакаралго гIодорги чIун, лъие щиб щварабали рикIкIунаан, чан сапун, щватаби, одеколон. Конфеталцин рикIкIунаан лъил гIемер ругелали. ЦIакъго нижее рекIее гIураб жо кьураб бакIалде, лъачIеб ххвелги гьабун, кIиабизеги унаан. Лал тIамулеб гIужалда, накку баччизеги цоцазе кумек гьабулаан. Накку баччулеб гьегьги дир, магьго гIадаб, киназулгоялдаса гьитIинаб букIана. Наккуги гьегь бакьулъе щвезегIан гурони балароан.
ЯсикIодул берцинаб къайиги букIана дир. ЯсикIабазул бертинги гьабулаан, берталъе ясалги ахIулаан, квен-тIехги нижецаго гьабулаан. АхIулаго кечIгун, бертадул нахъисеб къоялъ бахIарайги ячун лъадаеги унаан.
Ихдал, авлахъалдаса гIазу биунеб заманалда, дерец тIугьдул ралагьизеги унаан. Нижеца гьел ретIулароан. Амма цоцаздаса цере ккезе хIаракат бахъулаан, бищун цебе дерец бихьарай яс бищунго талихIай йикIунин, тIоцебе гьеб бихьарабго, гьелда нилъерго мурад шуризе кколилан.
Дида киданиги бищун цебе тIегь батулароан. Гьанжеги, дерец баккулеб гIужалда, ракIалъ росулъе цIала. Щиб лъалеб батизе бегьула гурищ дида дерец. Дица гьелда гьарилаан билараб талихI балагьизе кумек гьабейилан. Диего гьимулаго, дица берал къанщана - жеги гIазу биинчIеб авлахъалда гIазулъанги баккун дие гьимулеб буго хъахIилаб дерец. Ва дица гьелда щурулеб буго…

Автор: Шамай Хъазанбиева

Газета №: 19, от 13. 05. 2016 Месяц выхода номера газеты. Например января Год выхода номера газеты. Например 2012г.





Уважаемый посетитель, Вы зашли на сайт как незарегистрированный пользователь.
Мы рекомендуем Вам зарегистрироваться либо войти на сайт под своим именем.

Комментарии:

Оставить комментарий

При использовании материалов сайта, активная гиперссылка на сайт Hakikat.Info обязательна!
При использовании материалов сайта в печатных СМИ, на ТВ, Радио - упоминание сайта обязательно!