Сделать домашней|Добавить в избранное
 
Главная » Горянка - МагIарулай » ШигIрияб гьунаралъ угьараб хIухьел
на правах рекламы

ШигIрияб гьунаралъ угьараб хIухьел

  • Версия для печати
Добавил(а): istina от 29-04-2016, 11:51

Манарша ГIисаевалъ магIарул адабияталде гали тIамуна лъебергоялдаса цIикIкIун соналъ цебе. Гьелъул кечI тIоцебе бахъун букIана 1985 соналда "БагIараб байрахъ" газеталда. Хадусел соназда Манаршал гIемерал кучIдул щвана цIалдолезухъе магIарул газетазул ва журналазул гьурмаздасан. Гьей мустахIикълъана Лермонтовасул цIаралда бугеб меседил медалалъе, гъоркьиса гьелъие кьуна "Дагъистаналъул Халкъияй БахIарчIужу" абураб тIадегIанаб цIар, исана кIодо гьаюна "ЗахIматалъул бахIарчилъиялъухъ" абураб Петр ТIоцевесесул меседил медалалдалъун ва дипломалдалъун. Манарша ГIисаевалъул "Тарбиялъул гъалатIал" абураб пьесаялда рекъон, Авар театралъ лъуна спектакль.

Цолъе, магIарулал

Дие бокьилаан, дир магIарулал,
МугIрул гIадин цоцалъ гъункун рукIине.
Миллатал рикьизе гьоркьоб хIалтIулеб
ХIарамаб гъурщие лагълъунгутIизе.
ХIалакараб реццалъ чи учузлъула,
Учузаб рецц-бакъ тун, гIакълу, рокьи кье.
Чиналъе хIелхIеди хIакъирлъи буго,
ХIал лъаларев хIаким кIодо гьавуге.
КIудияб ракьалда гьитIинаб миллат,
МугъчIвалеб кьурулъун лъугьа цоцазе.
Чвантил кIалтIу къараз къо борхуларин,
Къулиги хIелиги гьезда цебе щай?
МугIрул магIил гарал цолъун гIураб гIор,
Гьелъул гучаб чвахи нилъее мисал.
Чвахулел иццаллъун цоцалъ журани,
Жаниб гъанкъиларищ хIиллагун макру.
Нижее цIарилан, нижей боцIиян,
Балъго гулла речIчIун бесдаллъи кьоге.
МагIил лълъар борхизе эмен тIамуге,
Эбелалъул ургьиб цIадул кан лъоге.
Кодоб гъурущ гьечIев хIакъир гьавуге,
ХIалимаб мискинлъи - рекIел ритIухълъи.
Чванта бицатасе бетIер къулуге,
БетIергьан Аллагьас какараб бугин.
Авар каламалъул карамат рагьун,
Ругьун гьаре лъимал росу-ракьалде.
Гьури хIалакани, тIегьги бечIалин,
ТIеренлъун тIагIунел нилъехъ балагье.
ТIолго дунялалъул чIинкIиллъиялда
Ролъул хъат кинигин гьурщараб дир халкъ,
Рокьул тIор тIирщизе, тIегьан барщизе,
Рес бугелщинаца хIал кьуни щибан.
ХIакъикьа къалареб, яхIалъ къунареб,
КъабихIаб жо буго ракъи, мискинлъи.
Миллаталъ къвал жемун, хинлъи бикьани,
Бикъиги хъамиги гIодоб теларищ.
Къуват цолъулъ буго, цолъе, дир миллат,
Цониги хIалихьат вахъунгутIизе.
Тарихалда тараб намусалъул нур
Нилъер наслуялъул гьурмалъ гвангъизе.

Кьуру анищ дун

Данде жаваб кьолеб кьуру анищ дун,
Кьал ахIулеб агьлу къуркьизабизе.
Гъугъалеб зобалъул къуват анищ дилъ,
Къадарлъи тIуркIулеб гьаракь гьабизе.
Гьорол кутак анищ каранда жаниб,
Жагьиллъи, жагъаллъи лъухьун бацIцIине.
Балеб гIазул цIорой дилъ бугеб анищ,
ЦIорозе гьаризе къабихIал чагIи.
Чапулеб цIадалъул чвахи дилъ анищ,
Чорокал ракIалцин чурун телаан.
Чидай хIилла бугел хIарамзадаби,
Зодил къуват босун, къанцIцIун лъелаан.
Бакъул къуваталъул къартI анищ дие,
Дунял бичIчIулезе хинлъи бикьизе.
Бакъан-кечI хIасратаб хIинчIлъун анищ дун,
ХIайранлъи гьурщизе гьаб дунялалда.
Гьурмай цIваки анищ моцIрол гIадинаб,
ГIалам беэдулеб гьими щущазе.
ГIурччинаб их анищ, ургъел чIваразда
Рии цебе букIин бичIчIизабизе.
БакIлъи заманалъул тIад бегаразде
ТIабигIиял нурал риччазе анищ.
Рокьул гьайбатлъигун гьавадул роцIен,
Гьаб халкъалъе кьезе къуват дилъ анищ.

Хирияв мун гуро

Хирияв мун гуро, хвана доб рокьи,
Дун хилиплъун гуро, мун хиянатлъун.
Хабар бицинелъун лъалхъуге аскIов,
АскIоб бараб заман загьрулъун кканин.
Хирияв мун гуро, ана доб асар,
Дир сси бортун гуро, дур асс тIагIун ккун.
ТIогьол квацIи кьоге, кьураб розаялъ,
Ругъун бигъун танин каранда жаниб.
Хирияв мун гуро, доб хIасрат хвана,
Дир хIинкъиялъ гуро, мун хIалихьалъун.
ХIелун гьари баге, хIалимлъи мерхьун,
Мун ана дунги тун, рекIелгъей цIехон.
Хирияв мун гуро, урхъи лъугIана,
Дир яхI тIагIун гуро, дур намус тIагIун.
ТIинкIулеб магIуялъ дир ракI хIеккинищ,
МагIил ралъадги ххан рагIалде щведал.
Хирияв мун гуро, хабар бицун щай,
БухIана дир рии дуда божараб.
Доба нахъа тараб дир гIолохъанлъи,
АхIи балеб буго мун довго вугин.
Хирияв мун гуро, ракI гурхIаниги,
РикIкIад тейин буго гIакълу кIалъалеб.
ГIумру учузлъарав рокьул дирижер,
Дуе диваналъе заман хIалтIана.
Дир гIакъилай эбел

Дицаги ахIилищ дуе кечI, эбел,
Дуниял-гIаламалъ ахIараб гIадин.
Дицаги бицинищ дур гьунаразул,
Гьунарги кIудияй, яхIги камилай.
Букъараб заргIанаб гьитIинаб рекIелъ
Рокьул ралъад къазе къуват гIурай мун.
ГIорцIун кваназеги заман батичIей,
Берцинабги ретIун хьвадизе кIвечIей.

КIудияб хъизанги бакIаб колхозги,
Берцинаб букIана дур хIалтIул хIасил.
Унтарав эменги, гIисинал нижги, -
ГIодизе, угьдизе яхIалъ течIо мун.
Дадал кваранаб квер, нижер мугIалим, -
МугIрулго чIухIила дудаса, эбел.
Дур дарсил курс щварал ниж дур лъималаз
Лъеларо ракьалда рокьул гуреб лъалкI.

Рокьул кваркьи бигъун къвалакье рачун,
КъвакIун ниж куцарай камилай устар.
РалъадгIан гIатIидаб гьеб дур рекIелъе
Адабги хIурматги чвахила нижер.
ГIакъилай, камилай, дир лъикIай эбел
Дур лъикIлъи борцунеб роцен ниж руго.
ГьитIинаб рукъалъул кIудияй хIаким,
ХIелула дур лъимал дур адабалъе.

Дир йигилан гуро еццулей йигей,
Реццалъе хIакълъидал бицунеб буго.
ХIасил дур гIумрудул, дур гьунаралъул -
Дур микьго лъимадул рукъалда сверухъ.

Бокьун буго

Огь, дий бокьун буго гьаб дунялалда
Даимаб рекъелги талихIаб халкъги,
Херазе къулизе, улбул хьихьизе,
Хьихьарал лъималаз иман цIунизе.
ЦIвабзазде цIар арал васал рахъине,
Васазул адаб ккун, ясал хьвадизе.
Адабги намусги гьурмаде цIарай
ЧIужугIаданалъе хIурмат гьабизе.

Гьалаглъун, гьаглъараб гIанчIаб гIелалъе
ГIакъилал дарсазул насихIат лъезе.
Дарсил магIна босун магIарул наслу,
Мунагьалги рацIцIун, роцIарал гIезе.
Мекълъи-тIекълъиялда тIад хIетIе чIезе,
ХIарамзадабазда данде рагъ базе.
РекIкIав инсанасе хIакимлъи къазе,
ХIакъасе, нух рагьун, халкъалъ кверчIвазе.

Хвалий рижараблъи кIочон течIого,
КIудияб рокьул кьо ракьалда лъезе.
Рекъелги талихIги халкъалда гьоркьоб
Гьарзаго чапизе, ихдал цIад гIадин.
ГIадлу загIиплъараб дир ВатIаналда
ГIадилчи ритIухъав халкъалъ вищизе.
ГIисинал гъалатIал гIочIой чIвачIого,
ГIумру битIулеб кьучI наслудай лъезе.

Огь, бокьун бугеб куц, гьал тIадчагIаца,
Чвантил гурониги хIисаб гьабизе.
ХIасратаб анищ дир, гьари-дугIа дир,
Дунял ххан гIорцIичIев хIаким ккогеги.
Бакъуде рагIад цIан, цIадал накIкI гуреб
ЦIоб тараб рагъул кIкIуйтакрарлъугеги.
ГIумруги гIажалги гIорхъода букIин
ГIадам-инсанасда кIочон тогеги.
 

 

Автор: Гьумер хIадур гьабуна МухIамадкамил Гьиматовас.

Газета №: 17, от 28.04.2016 Месяц выхода номера газеты. Например января Год выхода номера газеты. Например 2012г.





Уважаемый посетитель, Вы зашли на сайт как незарегистрированный пользователь.
Мы рекомендуем Вам зарегистрироваться либо войти на сайт под своим именем.

Комментарии:

Оставить комментарий

При использовании материалов сайта, активная гиперссылка на сайт Hakikat.Info обязательна!
При использовании материалов сайта в печатных СМИ, на ТВ, Радио - упоминание сайта обязательно!