Сделать домашней|Добавить в избранное
 
на правах рекламы

Хабар

  • Версия для печати
Добавил(а): istina от 25-04-2016, 10:30
Цо нухалъ гIагараб росдал кваранаб рахъалда бугеб ахил рагIалчIван вачIунев вукIана дун. Бакъ лъикIаланго эхеде бахун букIана. Ахикь гъутIби тIогьодаса руссун рукIана. Жибго гIурччинлъиялъ буччараб ахги цIакъ беричго бихьулеб букIана. ГъутIбузда тIасан рахъ-рахъалде роржунел рукIана милъиршаби. Ахикь жанир гIаркьалидаса гIаркьалиде кIанцIулел рихьулаан чаргъудул. Ахил рагIалда рижарал хъархъазулъ къудкузул чIирчIириги рагIулаан. Бищунго ракI тIаде цIалеб асар гьабулеб букIана ахил рагIалда бижараб борхатаб гIечул гъотIол каралъ, талихIаб кечI ахIулеб букIараб, мукъур багIараб гьитIинаб хIанчIица.
Циндаго гьаваялдасан бахъараб хьурхьуриялъ гьеб хIанчIил кечI гьоркьоб къотIизабуна. Бугоха гучал куркьбалги дандекъан, гьаваги хъвалхьулаго, гулла гIадин, битIахъе хIанчIиде тIаде щолеб хъантIараб хъарчигъа. ХIанчIида гьеб тушман кватIун гурони бихьичIин ккола. Амма хIанчIие заман гIуна гъотIодаса анцIго галиялъ лъарал рагIалдехун рукIарал гъутIби кIурун, данде гьабураб, гIаркьалабазул гъоноде гъорлъе кIанцIизе.
Хъарчигъайин абуни, гьеб гъонода тIад тIиритIун куркьбалгун, бигъун хутIун букIана жиндирго чан балагьулеб. ХIинчI гъонол гъварилъуде лъугьун букIун батизе ккола, гуребани гьелъ гьеб бакIалдаго тIутIун балаан. Дун векерун тIаде щолаго, хъарчигъа гьаваялде тIаде бахъана. Дица гьелда хадуб гьаваялде дирго тIагъур рехана. Циндаго ахикь жанисан чIиргъи-хъуялда хъарчигъаялда хадур, тIел гьабун, ана чаргъудул. Росдал рагIалдасан милъиршабазул тIел тIаде гIунтIана. Моччлол гохIдаса гьанибехун кIиго чIегIергъедоги баккана. Лебалго ва гIамал кIодого ахида тIад тIавап гьабулеб букIараб хъарчигъа киназго сверун ккуна.
Гьоркьоса къотIиго гьечIеб ццидалаб чIиргъи-хъуялъ сверухълъиго цIуна. Киназдаго гьоркьоса цо чIегIергъадица хIаракат бахъулеб букIана хъарчигъаялъул рачI кквезе. Кин бугониги, хъарчигъаялда кIвана гъудузулги милъиршабазулги гурулъа борчIизе. Хадуб гьелъ бакътIерхьул рахъалде тIуризе къасд гьабуна. Ахирги хъарчигъа мегIер бахун добехун хъамуна.
Гьеб ахил кочIохъаналъул кинаб къисматдай ккарабан дун лъарал рагIалдегIан ун валагьун чIана.

Автор: ХIасан ХIабибов

Газета №: 16, от 22. 04. 2016 Месяц выхода номера газеты. Например января Год выхода номера газеты. Например 2012г.





Уважаемый посетитель, Вы зашли на сайт как незарегистрированный пользователь.
Мы рекомендуем Вам зарегистрироваться либо войти на сайт под своим именем.

Комментарии:

Оставить комментарий

При использовании материалов сайта, активная гиперссылка на сайт Hakikat.Info обязательна!
При использовании материалов сайта в печатных СМИ, на ТВ, Радио - упоминание сайта обязательно!