Сделать домашней|Добавить в избранное
 
Главная » Молодежь - ГIолохъанлъи » Рокьукълъи бижизабулеб лъугьа-бахъин
на правах рекламы

Рокьукълъи бижизабулеб лъугьа-бахъин

  • Версия для печати
Добавил(а): istina от 11-04-2016, 10:16

Жинцаго гьарурал ва батIияб миллаталъул дин хIакъир гьабулел ишазул суратал рахъана спортсменас ва социалиял сетазда лъуна. Хадубккун гьев кIиго моцIалъ эркенлъиялдаса махIрум гьавуна.

Дагъистаналъул гугарухъабазул къокъа Элистаялде ун рукIана къецазда гIахьаллъизе. Гьезда гъорлъ вукIана СагIид ГIусмановги. Къецаздаса эркенаб заманалда гIолилал щун руго Буддал килисаялде ва гьениб хIакъирлъи гьабун буго. Гьеб киналъулго бахъараб видео Интернеталда лъун буго. Килисаялдаса тIадруссарал дагъистаниял калмыказ сверун ккуна ва СагIид, зулму-хIал гьабун наказдаги чIезавун, тIаса лъугьайилан гьардезе тIамуна. Гьелъулги калмыказ видео бахъана ва Интернеталдаги лъуна. Гьелда бихьухъе, ГIусмановас абулеб буго калмыказе Буддал бугеб асар жинда лъалароанин.
Рехсарал видеокадрабаздасан Интернеталда хIалуцарал бахIсал байбихьана лъабабилеб апрелалда. Социалиял сетазда Элистаялъул гIолохъабаз дагъистаниязе гьабураб "жаваб" ритIухъаблъун рикIкIунеб буго. Квеш ккараб жо буго цо-цоязул жагьиллъиялда бан кIиго батIияб диналъул вакилзабилъун ругел халкъазда, ай Дагъистаналъул бусурбабазда ва Калмыкиялъул буддистазда гьоркьоб рокьукълъи бижизехъин букIин. Дагъистанияз абулеб буго дин хIакъир гьабизе ва гьелдаго цадахъ калмыказул динияб асаралда тIад релъизе лъиданиги ракIалда букIинчIин, СагIидида буддизмалъул хIакъалъулъ щибго лъангутIиялъ ккараб иш бугин гьебилан. Гьелдаго цадахъ, дагъистанияв накабазда чIезави рекIее гIун гьечIо нилъер ракьцоязе. Гьелда бан СагIид ГIусманов цIуничIилан ва калмыказул гIолилаз гьев хIакъир гьавизе танин гIайибчIвалеб буго Калмыкиялъул полициялъул хIалтIухъабазда. БакIалъулаб полициялъ ГIусманов хвасар гьавизе жигар бахъулеб букIана. Гьелъие гIолого тана гьев накабазда чIезавизеги.
Эркенлъиялдаса кIиго моцIалъ махIрум гьавун гьеб иш тIубаларин ракIалде ккола. Диниял ишал тIоритIулеб бакIалда динияб асар хIакъир гьабулел ва жамгIияталъул адаб рехарал ишал рагьун гьариялда бан, ай РФялъул УКялъул 148-абилеб статьяялъул кIиабилеб бутIаялда рекъонкколеб такъсир гьабиялъул гIайиб гIунтIизабулеб буго СагIид ГIусмановасде Элиста шагьаралъул судалъ. ГIадлу-низам хвезабурав чи гьеб статьяялда рекъон лъабго соналъ туснахъ гьавизе бегьула.
Бусурбабазда ва буддистазда гьоркьоб тунка-гIуси Калмыкиялда цебеккун ккечIо. Амма 2006 соналда Дагъистаналъулгун Ставрополь краялъул ва Калмыкиялъул гIорхъода бугеб Прикумский поселокалъул мажгиталда жанибе болъонил бетIер рехун батун букIана. Сундуе гIоло гьеб вахIщияб иш гьабурабали лъицаниги чIезабичIо. Гьеб ишалъулъ буддистал гIахьаллъун рукIанищалиги лъаларо. Калмыкиялъул ракьалда 2014 соналда бухIун букIана как балеб рукъги, амма гьелъие батIиял гIиллаби рукIана.
КIиго халкъалда гьоркьоб жахIда-хIусуд бекьунгутIиялъе гIоло гугарухъанасул жагьиллъиялъ Элистаялда ккараб иш сабаблъун Дагъистаналъул бетIерасул ва хIукуматалъул администрациялъ буддистазда тIаса лъугьаян гьарана ва Калмыкиялъул халкъалде гьадинаб хитIаб гьабуна: "Гьеб лъугьа-бахъиналъ дагъистаниязул ракIал пашман гьаруна. Цо-цо гIолилазе тарбия щунгутIиялъ, гьезул жагьиллъиялъ ва мадугьалзабазул адаб тарал ишаз квешаб гурони къимат кьун бажаруларел лъугьа-бахъинал ккезарула. Гьезул ишал ритIухъ гьаризе кинго кIоларо. Дагъистаналъул ва Калмыкиялъул бутIрул цоцахъе телефоналдасан кIалъана. Элистаялде ун букIана ДРялъул хIукуматалъул председатель ГIабдусамад ХIамидовасул бетIерлъиялда комиссия. Низам цIунулел идарабазги гьеб лъугьа-бахъиналъул цIех-рех гьабулеб буго. ГIолиласул эбел-инсуцаги тIаса лъугьаян гьарана буддистазда. Киналъего ритIухъаб къимат кьезе буго".
Дагъистаналъул бетIер Рамазан ГIабдулатIиповасги калмыказда тIаса лъугьаян гьаранин бицана Калмыкиялъул бетIер Алексей Орловас. "Нижер республикаялдаса чияс Элистаялда гьабураб къабихIаб ишалъул гьеб хабар расги лъикIаб хIужалъун рикIкIунаро Дагъистаналда ва рагIизецин бокьулареб лъугьа-бахъинлъун рехсола гьеб. ТIолалго дагъистаниязул ва дирго рахъалъ нужеда тIаса лъугьаян гьарула дица. Хадубккун гьединал лъугьа-бахъинал ккунгутIиялъул мурадалда хIалтIи гьабила нижеца. Жакъа къоялде гьел спортсменазул тренер хIалтIудаса вахъун вуго, спортсменазе тарбия кьеялъул иш жагъалго теялда бан ДРялъул физкультураялъулгун спорталъул министрасе бадибчIвай гьабуна", - ян абуна Рамазан ГIабдулатIиповас.
Алексей Орлов ва СМИязул вакилзаби ругеб бакIалда гьадин абуна Элистаялде щварав ДРялъул хIукуматалъул председатель ГIабдусамад ХIамидовас: "Нилъер халкъазда гьоркьоб вацлъи-гьудуллъи букIана кидаго. Калмыказда хьолбохъ жакъаги гIумру гьабулеб буго аза-азар дагъистанияс. Цадахъ гIумру гьабула, хIалтIула ва цоцазул адаб-хIурмат гьабула. Гьединлъидал, нижее бокьун буго жагьилав гIолохъанчиясухъа ккараб ишалдаса тIаса лъугьаян гьаризе. Гьеб лъугьа-бахъиналъе букIине кколеб къимат кьела. Цо-цо жагьилал гIолилазул гьединал ишаз республикаялъул къадру хвезабула". Элистаялде спортсменалгун вачIун вукIарав тренер хIалтIудаса вахъанинги абуна гьес.
20 азаргоялдаса цIикIкIун дагъистанияс гIумру гьабула Калмыкиялда. Дагъистаналъул нухмалъиялъ тIаса лъугьаян гьарун хадубниги калмыказда ва дагъистаниязда гьоркьоб хIалуцин ккеларин абураб хьул буго. Макъала хIадурулел къоязда мадугьалихъ бугеб республикаялда гIумру гьабулел дагъистаниязул рахъалъ такъсириял лъугьа-бахъинал ккеялда бан калмыказдасан цониги хитIаб-гIарза гьечIоан. Гьелъие гIилла буго килисаялда ккараб лъугьа-бахъиналъе калмыказ ва дагъистанияз цогояб къимат кьей, ай диниял бакIазда чороклъи гьабизе бегьунгутIи кIиябго рахъалда бичIчIулеб букIин.
Дагъистаналъул Динияб идараялъги гьеб ишалъе къимат кьуна. "Республикаялъул бусурбабазе дарслъун гьеб лъугьа-бахъин букIинин ва хадубккун гьединал ишаздаса нилъ цIунулеб хIужалъун хутIилин хьул буго. Цо улкаялда гIумру гьабулел халкъал цоцалъ гъункун, вацлъиялда рукIине ккола", - ян хъвалеб буго муфтияталъул хитIабалда.
Халкъазда гьоркьоб жахIда ккезабулел ишазул рахъкколаро ДРялъул гIолилазул ишазул министр Арсен ХIажиевасги. "Пуланав чиясул къабихIаб иш халкъазда гьоркьосеб гьудуллъи ва божилъи биххиялъе кьучIлъун букIине бегьуларо. ХIалуцараб рекIел асаралдаса гIакълуги цебе гьабун, сабруялда рукIине ккола нилъ. Цо-цо гIоркьилазухъа рорчIарал гьединал хIужабазул рагIидал гIажаиблъизе бачIуна: мугIрузул яхI-намусалда рекъон гIасрабаз куцалеб халкъалда гьоркьов гьединав вахьна кингIаги ватулев? Амма жакъасеб къоялъул сипатлъун буго гьединал хIужаби рукIин. Гьездаса ратIалъизе жигар бахъизе тIадаб буго нилъеда. Кинаб тамихI гьабизе бугеб гьеб лъугьа-бахъиналъул "багьадурасейин" абун гIемер бицине бегьула. Амма дун нечон вуго ва цо чи сабаблъун аза-азар дагъистаниязул лъикIал ишазде кIудияб рагIад рехана иргадулаб нухалда", - ян абуна министрас.
Калмыкиялда килиса бацIцIад гьабиялъул тадбир тIобитIана. Буддизмалъул дин гьабулел калмыкал дагъистаниясда тIаса лъугьана.
ГIиса Ибрагьимов
Дагъистаналъул гугарухъан СагIид ГIусмановас Калмыкиялъул тахшагьаралда "Буддада" мал бана ва гьеб эхетараб бакI чорок гьабуна


Автор: ГIиса Ибрагьимов

Газета №: 14, от Число месяца выхода номера газеты. Например 12 Месяц выхода номера газеты. Например января Год выхода номера газеты. Например 2012г.





Уважаемый посетитель, Вы зашли на сайт как незарегистрированный пользователь.
Мы рекомендуем Вам зарегистрироваться либо войти на сайт под своим именем.

Комментарии:

Оставить комментарий

При использовании материалов сайта, активная гиперссылка на сайт Hakikat.Info обязательна!
При использовании материалов сайта в печатных СМИ, на ТВ, Радио - упоминание сайта обязательно!