Сделать домашней|Добавить в избранное
 
Главная » Ваши письма - Нужер кагътал » Баркалаялъе мустахIикъал
на правах рекламы

Баркалаялъе мустахIикъал

  • Версия для печати
Добавил(а): istina от 15-02-2016, 13:28
Даруялде черх ккогеги, чияр цIобалде рукъ

ккогегиян абула магIарулаз

Инсан вижун вуго загIипавлъун ва унтуларев чи вукIунаро. Хасго батIи-батIиял гIузраби гIемер рукIуна ригь арал, херал гIадамазул. Цогидазе гьарулел дарабазде тIадеги, гьезие хIажалъула хасаб хъулухъги, тIалаб-агъазги, букIине ккола рахIмуялъулаб бербалагьиги.

Хас гьабун рагъул ва захIматалъул ветераназе сах гьариялъулгун диагностикаялъулаб хъулухъ гьабулеб, Дагъистаналда цого-цо бугеб медицинаялъул гIуцIи ккола республикаялъул медицинаялъул централде гъорлъе унеб ветераназул госпиталь. Гьенире сах гьаризе рачIуна тIолабго республикаялдаса хараби. Гьаб заманалъул технологиязда рекъон, унтаразе тIадегIанаб даражаялда хъулухъ гьабизе госпиталалда руго хIажатал шартIал.
Унтаразулгун гара-чIвари гьабулаго, киназго рехсолеб хIужа букIана ришватчилъи гьечIолъи. КигIанго гьедин букIине кколеб жо бугониги, хIажатав чиясда "нах бахун гурони" кибго хъулухъ тIубалареб гьаб заманалда гьебги гIадатияб гуреб ишлъун бихьулеб буго. Гьединаб куцалда госпиталалъул хIалтIи букIинаби бараб буго 1996 соналдаса нахъе гьелъие нухмалъи гьабулев РФялъул мустахIикъав тохтур Ибрагьим Ибрагьимовасул хIаракаталда.
КиналгIаги техникиял цIилъабаз хисуларо унтарасдехун тохтурасул хIалимаб бербалагьи. Гьединал хIалтIухъабазда гьоркьор рикIкIине бегьула госпиталалъул урологиялъул отделениялъул заведующий Сиражудин СагIидов, тохтурзаби МухIамад Амаев ва Башир ГIабдулаев, медсестраби Умайгьанат, ГIайшат ва Луиза, сестра-хозяйка Гулжанат. Цо хъизан гIадаб гъункараб гьеб коллектив релълъуна найил тIалаялда, гьелъул нухмалъулев Сиражудинин абуни, лъикIав найихъанасда.
Хасаб реццалъе мустахIикъав вуго тохтур-уролог Темирлан АхIмадов. Гьев вуго хIакъикъаталдаги тохтурлъиялъе вижарав инсан. Гьев жаниве лъугьарабго палатаялъубе батIияб нур рещтIунин, гьес рагIи абилелдего кигIан унтарасулги гьанта рекъолин ва унти кIочонин абула гьенир регун ругез.
Госпиталалда жидерго хIалтIиги лъикI лъалел, унтаразул хIалги бичIчIулел, гьезие кумек гьабизеги кидаго хIадурал специалистал, унго-унгоял тохтурзаби хIалтIулел рукIин бихьула гьенире жидерго сахлъи щула гьабизе рачIарал унтаразул пикруялъухъ гIенеккидал.
- ГIемерал бакIазда вегизе ккана дун, - ан бицана Хунзахъ районалъул ГIебутIаса МухIамад МухIамадовас, - амма гьадинаб бакI жеги дандчIван букIинчIо. РакIалде ккана дун къватIисеб пачалихъалдециндай кканаян. Ниж гIадал херал гIадамал дагьал захIматал рукIуна, кIодолъидал гIамал-хасият хисулелъул. Госпиталалъул хIалтIухъабазин абуни, гьелъухъ балагьичIого, эбел-инсул гIадаб тIалаб гьабула гьанир регаразул.
Кутакалда рази вугоан госпиталалъул хIалтIухъабаздаса терапиялъул отделениялда вегун вукIарав Хасавюрт районалъул ИчичIалиса Гъайирбегов ГIалиги.
- Араб соналъул ахиралда тIоцеве вегана дун ветераназул госпиталалда. Къокъабго заманалда лъалеб сахлъи чорхоеги лъугьун, дун кутакалда разилъун, тIадвуссана гьениса. Бокьун буго, тIоцебесеб иргаялда, Ибрагьим МухIамадовичасе, гьединго тIолабго коллективалъе ракI-ракIалъулаб баркала кьезе, - ян абуна гьес.
Гьединабго пикру буго урологиялъул отделениялда регун рукIарал захIматалъул ветеранал Кьадалиса КъурамухIамадов Идрисил, Гъонохъа Ахкубегов МухIамадбегил, Табасаран районалдаса Саидов Жамалил ва гIемерал цогидазулги.
"Тохтур тохтурлъун вукIунаро гьесулъ унтарасдехун рокьиги рекIелъ гурхIелги гьечIони. Госпиталалда гьеб буго ва унтаразги нужер хIалтIуе лъикIаб гурони къимат кьолеб гьечIо. Гьединаб хIал цIунизе нужехъа бажарана республикаялда тохтурзабазул къадру-къимат гIодобе кколеб заманалда ва гьелъ бицуна гьаниб хIалтIи гIуцIун бугеб куцалъул", - ан абуна Р. ГIабдулатIиповас госпиталалъул цIияб корпус рагьулеб тадбиралда. Гьеб ккола госпиталалъул коллективалъул гIемер соназул ракIбацIцIадаб хIалтIуе ва махщалие ритIухълъиялъе республикаялъул нухмалъулез кьолеб мустахIикъаб къимат.
М. ХIАЖАГIАЛИЕВ

Гьабуни хIалтIи лъугьуна

Шамил районалъул Могьохъ росдал бегавуллъун вугелдаса гIемераб заман гьечIо ГIумаров МухIамадил. Амма гьабураб хIалтIул хIасилал лъикIал руго. Масала, росулъ бана мадраса, кверкьолеб бакI, ФАПалъул пункт. Росдал щибаб авалалде бачана лъим, гьабуна канализация. БоцIи гьекъезе 17 раса гьабуна ва гьел лъуна хIажалъи бугел бакIазда. Чанго колоде рахъана нухал. Росулъе рачIунеб нух букIана квешаб хIалалда. Гьеб къачIана ва бана кьо. Росулъ гьабулеб буго футбол хIалеб майдан. Дица гьаниб гIиси-бикъинаб хIалтIи рехселаро, амма гьев вачIаралдаса росулъ лъугIана цIогь, рагъ-кьал, гьечIо наркотикал хIалтIизарулев чи.
КIалбиччанкъоялъ росулъе щведал, дун гIажаиблъун хутIана. Росулъ бугеб берцинлъиги, хъил тIурал къватIалги, берцинго рарал минабиги рихьидал лъикIаб асар гьабуна. ГIолохъабиги ругоан спорталде руссун.
Бегавуласда ракIалда буго жамагIаталъе жеги-жеги хайир бугел хIалтIаби гьаризеги.
О. Будунов

ХIалбихьиялъул майдан

Ахираб кIиго-лъабго соналда жаниб гIемер бицунеб буго МахIачхъала шагьаралда буголъи бикъа-хъамиялъулги ракьал талавур гьариялъулги. Шагьаралъул администрациялъул ихтияразул управлениялъул начальник Айдемир ИсмагIиловасул баяназда рекъон, хIилла-рекIкIалъул документазул кьучIалда, законалъул тIалабалги хвезарун, хасал чагIазул ихтияралде кьурал сурсатал муниципалияб ихтияралде нахъруссинаризе рагIула. Гьес бицухъе, судалъул ва цIех-рехалъул идарабазда рагIула законги хвезабун кьурал 1300-гIанасеб ракьул участок, 3000 гьересихIукмаби гьарурал "зеленкаби". Амма, щаялиго, законал цIунулел гьеб иш гьабизе гIедегIулел гьечIо. Кинха гьелги МахIачхъалаялъул администрациялъул нухмалъулелги гьелде регIилел чIечIого гьарулел хиса-басиял ругони.
Ахираб лъабго соналда жаниб шагьаралъул администрациялъул лъабго-ункъо нухмалъулев хисана ва щакаб жо буго гьанжесесги гьениб гIемераб заман базе букIин. ХIисаб гьабидал, МахIачхъала хиса-басиязул хIалбихьиялъул майданлъун лъугьун гьечIодайин кколеб буго. МахIачхъала цогидал шагьаразда релълъинабизе бегьуларо. КIоченеги бегьиларо МахIачхъала республикаялъул тахшагьар гуребги, гьелъул гьумер кколеблъиги.

 

Автор: ФИО или фамиГIиса ХIасанов, захIматалъул ветеран лия и инициалы автора

Газета №: 6, от 12. 02. 2016 г.





Уважаемый посетитель, Вы зашли на сайт как незарегистрированный пользователь.
Мы рекомендуем Вам зарегистрироваться либо войти на сайт под своим именем.

Комментарии:

Оставить комментарий

При использовании материалов сайта, активная гиперссылка на сайт Hakikat.Info обязательна!
При использовании материалов сайта в печатных СМИ, на ТВ, Радио - упоминание сайта обязательно!