Сделать домашней|Добавить в избранное
 
Главная » Спорт » Олимпиялъул чемпионасул призазе гIоло
на правах рекламы

Олимпиялъул чемпионасул призазе гIоло

  • Версия для печати
Добавил(а): istina от 15-02-2016, 13:24

Эркенаб гугариялъул рахъалъ Дагъистаналъул чемпионаталда гIахьаллъана 250 спортсмен

6-7 февралалда Каспийскиялда ГIали ГIалиевасул цIаралда бугеб Спортивияб кIалгIаялъуб тIобитIана Северияб Кавказалда тIоцевесев Олимпиялъул чемпион Загъалав ГIабдулбеговасул призазе гIоло эркенаб гугариялъул рахъалъ Дагъистаналъул чемпионат. Араб соналъул декабралда машгьурав спортсменас тIубана 70 сон. Гьеб юбилеялда бан З. ГIабдулбеговасе кьезе бихьизабун букIана "Дагъистан Республикаялъул цере гьарурал тIокIлъабазе гIоло" орден. Гьеб заманалда сах гьавизе ун вукIиналда бан, Мюнхеналъул Олимпиялъул хIаязул чемпионасе гьеб кьун букIинчIо. Исана чемпионат рагьиялъул тадбиралда гIахьаллъарав ДРялъул бетIер Рамазан ГIабдулатIиповас гьеб орден Загъалав ГIабдулбеговасухъе кьуна.

Чемпионат рагьиялъул тадбиралда гIахьаллъи гьабурав республикаялъул бетIерас тIадегIанаб къимат кьуна З. ГIабдулбеговасул спортивияб хIаракатчилъиялъе. "Загъалас гIемерал соназ нухмалъи гьабуна "Динамо" стадионалъе. Гьес гIемераб хIалтIи гьабуна Дагъистаналда спорт цебетIеялъе. Дуца дунялалдаго машгьур гьабуна нилъер республика. Гьеб буго дур захIматалъул тIадегIанаб хIасил", - ан абуна Рамазан ГIабдулатIиповас.
Чемпионаталда гIахьаллъи гьабуна микьго цIайиялъул категориязул 250 гугарухъанас.
Къецал тIоритIараб тIоцебесеб къоялъ медалазе ва СКФОялъул чемпионаталде путевкабазе гIоло къеркьолев вукIана 136 гугарухъан. Бищунго цIикIкIун гугарухъаби рукIана 61 кг цIайиялда. Ургуялде вахъана гьеб цIайиялда 56 спортсмен.
57 кг цIайиялда ургуялде вахъана 2014 соналда гIолилазда гьоркьов олимпиялъул чемпионлъун вахъун вукIарав ИсмагIил ХIажиев. Араб соналда гьев вукIана юниоразул кьеразулъ ва Европаялъул чемпионлъун вахъана. Исанасеб Дагъистаналъул чемпионаталдайин абуни МахIачхъалаялдаса И. ХIажиевасе щвана чIахIиязда гьоркьоб меседил медаль. Гьесул букIана щуго дандчIвай, щуялдаго ракIчIун гугарана ва чемпионлъун вахъана.
"Травма ккун букIиналда бан республикаялъул гIолилазул къецазулъ гIахьаллъизе дие рес ккечIо, гьединлъидал хIукму гьабуна Дагъистаналъул чемпионаталда чIахIиязда гьоркьов гугаризе. Киналго дандиял рукIана физическияб рахъалъ къуватал, гьадин захIматго бергьенлъи щвей дида ракIалда гьечIо. ХIисабалде босун буго Р. Дмитриев ракIалдещвеялъе марталъул байбихьуда Якутскиялда тIобитIизе бугеб гIолилазул турниралда, хадуб улкаялъул чемпионаталда гIахьаллъизе. Араб соналда гьел къецазда дун вукIана кIиабилев призерлъун. Гьанже масъала буго гьениб тIоцебесеб бакI кквезе ва дунялалъул чемпионаталда гIахьаллъизелъун гIолилазул тIаса бищараб командаялда гъорлъе ккезе", - ян абуна ИсмагIил ХIажиевас.
61 кг цIайиялда финалалде вахъана Хасавюрталдаса кIиго гугарухъан. Гьеб къеркьеялда 8:1 хIисабгун бергьенлъи босана Халкъазда гьоркьосеб континенталияб кубокалъе гIоло къецазул призер ХIажимухIамад ГIалиевас. Гьев бергьана цебе тIобитIун букIараб республикаялъул кIиго чемпионаталда тIоцебесеб бакI ккун букIарав Шамхал Хизриевасдаса.
65 кг цIайиялда МахIачхъалаялдаса ХIажимурад Мачилаевасдаса финалалда бергьана ва чемпионлъун вахъана Каспийскиялдаса Шамил Рашидов.
97 кг цIайиялда хIалбащадаб къеркьеялда Канзула МухIамадовасдаса финалалда бергьана МухIамадрасул МухIамадов.
Чемпионат тIобитIараб кIиабилеб къоялъ ургуялда къеркьей букIана 70, 74, 86 ва 125 кг цIайиязул гугарухъабазда гьоркьоб.
70 кг цIайиялда чемпионлъун вахъана Хасавюрталдаса Руслан АхIмадов. 74 кг цIайиялда тIоцебесеб бакI ккуна МахIачхъалаялдаса МухIамадхIабиб КъадимухIамадовас. 86 кг цIайиялда бергьана Гъаякент районалдаса ЖабрагIил Шапиев. 125 кг цIайиялда Дагъистаналъул чемпионлъун вахъана МахIачхъалаялдаса МухIамад ТашавхIажиев.
Гьел къецазул хIасилазда рекъон щибаб цIайиялда тIоцебесеб - щуабилеб бакIал ккурал гугарухъаби гIахьаллъизе руго СКФОялъул чемпионаталда.

 

Хасавюрталда - СКФОялъул къецал

Щуабилеб-анлъабилеб февралалда Хасавюрталда ХI. ХIамидовасул цIаралда бугеб Спортивияб кIалгIаялъур тIоритIана 1996 соналда гьарурал гIолилазда - васазда ва ясазда - гьоркьор бакIаб атлетикаялъул рахъалъ Северияб Кавказалъул федералияб округалъул къецал.

Гьезда гIахьаллъи гьабуна РСО - Аланиялъул, Чачан Республикаялъул, Кабардино-Балкариялъул, Карачаево-Черкесиялъул, Ингушетиялъул, Ставрополь краялъул гIолохъанал ясаз ва васаз. Къуватаб команда букIана Дагъистаналъулги. Къецал тIоритIараб тIоцебесеб къоялъ цере рахъана ясал. ЩуазаргогIан болельщикас салам кьуна спортивиял делегациязе, судьябазе, гьединго къецазул хIурматиял гьалбадерие. ХIурматиял гьалбадерида гьоркьор рукIана ДРялъул транспорталъул, энергетикаялъул ва бухьеналъул министр Сайгидпаша ГIумаханов, Россиялъул БакIаб атлетикаялъул федерациялъул вице-президент Александр Коробейников, ДРялъул физическияб культураялъул ва спорталъул министрасул тIоцевесев заместитель Зайнал Салаутдинов, 1996 соналъул Атлантаялъул олимпиялъул чемпион, дунялалъул ункъцIул чемпион ва рекордсмен, Европаялъул анлъцIул чемпион Андрей Чемеркин.
Къецал рагьулаго Хасавюрт шагьаралъул бетIер Зайнудин Окмазовас абуна: "ГIадада гуро Хасавюрт шагьар тIаса бищараб гьадинал тIадегIанаб даражаялъул къецал тIоритIизе. Спортивиял бергьенлъабаздалъун цебегоялдаса нахъе машгьураб нижер шагьаралда ахирал соназда ракIчIарал галаби тIамулел руго бакIаб атлетика гIадаб гьадинаб "бихьинчияб спорталъул" рорхалъабазде рахиналъе. Шагьаралъул бакIаб атлетикаялъул ункъо спортивияб школалде хьвадула батIи-батIияб ригьалъул 200-ялдаса цIикIкIун спортсмен. Хасавюрталъулал, соналдаса соналде жидерго бергьенлъабазул хIасилалги лъикIлъизарулаго, кидаго рукIуна гьеб спортивияб тайпаялъул батIи-батIиял чемпионатазул ва турниразул бергьаразул ва призеразул кьеразулъ".
БакIаб атлетика бокьулезде хитIаб гьабулаго Россиялъул БакIаб атлетикаялъул федерациялъул вице-президент Александр Коробейниковас абуна Хасавюрталда гьал къецал Сайгидпаша ГIумахановасул хIаракатчилъиялдалъун тIоритIулел ругилан.
Хадуб Сайгидпаша ГIумахановас ракIалдещвеялъе сайгъатал кьуна Александр Коробейниковасе, Андрей Чемеркиние ва Хасавюрт шагьаралъул ХIурматияв гражданин Владимир Туривненкое.
Хадур тIоритIана юниоразда гьоркьор къецал. Къецазда бищунго лъикIал хIасилал рихьизаруна Дагъистаналдаса, Ставрополь краялдаса ва Северияб Осетиялдаса спортсменаз. Гьел къецазул чемпионаз ва призераз гIахьаллъи гьабизе буго март моцIалда Владимир шагьаралда тIоритIизе ругел Россиялъул къецазда.

 

 

 

Автор: ФИО или Гьумер хIадур гьабуна ГIабдула Хазамовас

Газета №: 6, от 12. 02. 2016 г.





Уважаемый посетитель, Вы зашли на сайт как незарегистрированный пользователь.
Мы рекомендуем Вам зарегистрироваться либо войти на сайт под своим именем.

Комментарии:

Оставить комментарий

При использовании материалов сайта, активная гиперссылка на сайт Hakikat.Info обязательна!
При использовании материалов сайта в печатных СМИ, на ТВ, Радио - упоминание сайта обязательно!