Сделать домашней|Добавить в избранное
 
Главная » Спорт » ГIахьаллъизе руго СКФОялъул чемпионаталда
на правах рекламы

ГIахьаллъизе руго СКФОялъул чемпионаталда

  • Версия для печати
Добавил(а): istina от 2-02-2016, 10:23

22-24 январалда Хасавюрталда тIоритIана гIолилазда гьоркьор эркенаб гугариялъул къецал. Гьел рагьиялъулъ гIахьаллъи гьабуна ДРялъул хIукуматалъул председатель ГIабдусамад ХIамидовасги. Гьесда цадахъ рукIана ДРялъул транспорталъул, энергетикаялъул ва бухьеналъул министр Сайгидпаша ГIумаханов, физическияб культураялъул ва спорталъул министр МухIамад МухIамадов, "Хасавюрт шагьар" МОялъул администрациялъул бетIер Зайнудин Окъмазов ва цогидалги официалиял гIадамал.

Дагъистаналъул бетIер Рамазан ГIабдулатIиповасул цIаралдасан ГIабдусамад ХIамидовас цIалана къецазул гIахьалчагIазде, гIуцIарухъабазде, гьалбадериде хъвараб баркиялъулаб кагъат.
"ХIамид МустIафаевич ХIамидов вукIана жиндирго ВатIаналъул унго-унгояв патриот. Гьес гIемераб хIалтIи гьабуна тIаде гIолеб гIелалъе тарбия кьеялъе, хIаракатаб гIахьаллъи гьабулаан республикаялда физическияб культура ва спорт цебетIеялъе гьабулеб ишалъулъ. Эркенаб гугари Дагъистаналда буго бищунго машгьурал спортивиял тайпабазул цояб. ГIолилазда гьоркьор эркенаб гугариялъул гьал къецал тIоритIулел руго къоабилеб нухалъ. ГIемерал машгьурал спортсменаз гьал къецал тIоритIизе байбихьаралдаса нух рагьана кIудияб спорталде. Европаялъул, дунялалъул чемпионатазда ва Олимпиялъул хIаязда гьезие щвана 300-гIан медаль".
Турнир тIадегIанаб даражаялда гIуцIаралъухъ ГIабдусамад ХIамидовас баркалаялъул рагIаби абуна ДРялъул транспорталъул, энергетикаялъул ва бухьеналъул министр Сайгидпаша ГIумахановасул ва "Хасавюрт шагьар" МОялъул администрациялъул бетIер Зайнудин Окъмазовасул цIаралда.
Цинги байбихьана къецал. Кидаго хIалуцараб къеркьей букIуна республикаялда кIиго аслиял - МахIачхъалаялъул ва Хасавюрталъул гугариялъул школазда куцарал спортсменазда гьоркьоб. Гьаб нухалдаги тIоцебесеб кIиго къоялъ кIудияб тIокIлъигун бергьана Хасавюрталъул спортшколаздаса гугарухъаби. Анкьго меседил медаль гьезие щвана. Лъабабилеб къоялъ - 24 январалда МахIачхъалаялдаса Муса МухIамадов (69 кг) 4:12 хIисабгун къуна Каспийскиялдаса МухIамадэмин Ибрагьимовасдаса. 100 кг цIайиялда меседил медаль щвана Каспийскиялдаса цойги гугарухъан Шарап ГIалихановасеги. КIиго меседил медаль щвей ккола каспийскиялъулазул кIудияб бергьенлъи.
ХутIараб кIиго финалалдаги ургуялде рахъана МахIачхъалаялдаса гугарухъаби. 85 кг цIайиялда Рамазан Шабановас 9:1 хIисабгун ракIчIараб бергьенлъи босана Каспийскиялдаса ГIабдулкъадир Мамаевасда тIад. 120 кг цIайиялда Ислам Абуев, дандчIваялъул аслияб заман лъугIилелдего баллаздалъун бергьана Избербашалдаса Бадрудин МухIамадовасдаса.
МахIачхъалаялъул "Динамо" спортобществоялдаса Абуевасе араб соналдаги гьединалго къецазда щун букIана меседил медаль. Исанайин абуни, Ислам ункъабго дандчIваялда бергьана бихьизабураб аслияб заман лъугIилелдего.
Къецазул чемпионазе ва призеразе кьуна гIарцулал сайгъатал - тIоцебесеб бакIалъухъ - 10 азарго, кIиабилелъухъ - щуазарго ва лъабабилел бакIал ккуразе лъабаза-азар гъурущ. Щуаза-азар гъурущ кьуна чемпионазул тренеразеги.

 

Грэплинг

ГьитIинго лъадарана черх

Грэпплингалъул рахъалъ дунялалъул чанцIулго чемпион

Нилъер пачалихъалъ кIудияб кIвар кьолеб буго гIун бачIунеб гIел спорталдехун рокьи бугеллъун куцаялде. Гьелъ квербакъула гIолилал квешал ишазде машгъуллъичIого рукIиналъе. Нилъ рохизе ва чIухIизе ккола жакъа нилъер росабалъаги, районаздасаги дунялалдаго машгьурал гугарухъабиги, боксералги ва цогидал тайпабазул спортсменалги чемпионаллъун рахъиналдаса. Гьединазул цояв ккола Шамил районалъул ГIасаб росулъа ГIисаев ГIабдуллагь. Киналго спорталъул болъабиги нахъа тун, жакъа гьев ккола грэпплингалъул рахъалъ чанцIулго Россиялъулги дунялалъулги чемпион.

ГIабдуллагь цин ХIебда, хадув ГIасаб школазда цIалулаго хьвадана эркенаб гугариялъул секциязде. Гьенив тIоцеве вахъана районалъул бетIер М. МухIамадзагьидовасул призазе гIоло къецазда чемпионлъун. "Амма кидаго гуро битIги кколеб, бергьенлъабиги щолел. БукIана дирги судьяяс мекъал ишалги гьарун анкьалъ квен тараб мехги", - ян ракIалде щвезабуна ГIабдуллагьица. Школазда каникулал ругел къоязги гьев хьвадана Хасавюрталъул спортшколалде тренировкабазде. Школа лъугIигун батIияб мурад гьесул букIинчIо, гьениб бугеб олимпиялъул резервазул училищеялде лъугьин гуреб.
Гьенив цIалулаго ГIабдуллагь вахъана Дагъистаналъул чемпионлъун, эркенаб гугариялъул спорталъул мастерлъун, Югалъул федералияб округалъул чемпионлъун. Эркенаб гугари тейгун гьев хьвадана грэпплингалъул ва Бразилиялъул джиу-джитсуялъул ругьунлъабазде. Анлъго нухалда вахъана грэпплингалъул рахъалъ Россиялъул чемпионлъун. 2013 соналда ОАЭялъул Абу-Даби шагьаралда тIобитIараб чемпионаталда вахъана дунялалъул чемпионлъун. Араб соналъул октябралда Турциялъул Анталия шагьаралдаги грэпплингалъул къецазда гьев вахъана дунялалъулго чемпионлъун.
Жиндир гIумруялъул талихI бугин абула ГIабдуллагьица 2004 соналдаса нахъе Хасавюрталъул олимпиялъул резервазул училищеялде, гьениб машгьурал тренеразул, хасго Сайгидпаша ГIумахановасул къайимлъиялде ккейги.
"Цогидазул гIадин, къецазде унелъул дир рукIинчIо спонсаралги ресалда ругел эбел-эменги. Дица кидаго баркала кьола Сайгидпашае. Щибаб къецалдаса тIадруссун рачIиндалги гьес ниж кIодо гьарулаан сайгъатаздалъун", - ан бицана гьес. ГIабдуллагьие ракIалдаса унареблъун хутIана 2014 соналда Минск шагьаралда миксфайталъул ругьунлъабазда гIахьаллъизе щвей. Гьенир ругьунлъабазда тренераллъун рукIана дунялалдаго машгьурал тренерал Федор Емельяненко ва Бразилиялдаса, Америкаялдаса, Голландиялдаса, Грузиялдаса ва цогидал улкабаздаса тренералги.
ГIабдуллагьил спорталде бугеб рокьиялъул бицунаго ракIалде щвезабила гьадинаб ишги. Дагьал соназ цебе гьесул мугъзагьодалъе жагъаллъи ккана. Кинав тохтурасухъе щваниги, гьесда абулеб букIана спорталъулгун къолъикI гьабизе кколилан. Ахиралда цо тохтурас абуна спорт рехун течIони, сахлъизеги бегьулин. Гьеб рагIиги гIураб букIана ГIисаевасе сахлъизе хьулгун щибабкъойилаб лъадариги тохтурасул малъа-хъваялги тIуразарун ва цIидасан спорталъул нухде лъугьине.
ГIумруялъул 25 сон бугев, 96 кг цIайиялда цеве вахъунев гьев рикIкIуна республикаялдаго машгьурал спортсменазда гъорлъ. Гьелъие нугIлъи гьабула Хасавюрталъул спорталъул нухмалъулездаги, тренераздаги, журналистаздаги гьоркьоб тIобитIараб цIех-рехалъул хIасилалда бищунго лъикIав 10 спортсменасда гьоркьов гьевги вукIиналъ.
ГьабсагIат кинал къецал рукIине ругелан гьикъидал, гьес абуна кватIичIого правилаби гьечIеб рагъул рахъалъ дунялалъулго чемпионат букIине бугилан.
Мурад буго гьесие, районги республикаги дунялалдаго рагIизабулев, кIвахIги, хIалхьиги лъаларев спортсменасе икъбалги, талихIги, чIахIиял бергьенлъабиги щвей.

 

Автор: Сайпула ГьитIинамухIамадов

Газета №: 4, от 29. 01. 2016 г.





Уважаемый посетитель, Вы зашли на сайт как незарегистрированный пользователь.
Мы рекомендуем Вам зарегистрироваться либо войти на сайт под своим именем.

Комментарии:

Оставить комментарий

При использовании материалов сайта, активная гиперссылка на сайт Hakikat.Info обязательна!
При использовании материалов сайта в печатных СМИ, на ТВ, Радио - упоминание сайта обязательно!