Сделать домашней|Добавить в избранное
 
Главная » Горянка - МагIарулай » Дой ана Адабияталъул сонгун
на правах рекламы

Дой ана Адабияталъул сонгун

  • Версия для печати
Добавил(а): istina от 15-01-2016, 10:21

Амма бокьун буго дий, божизе дир рухIалъул хIинчI лъугьинин, гьеб боржун, зобалазде инилан

Адабияталъул соналъулгун къо-лъикI гьабулел лахIзатаз, ЦIияб соналде каву къирулел минутаз рагIана авар адабият ва маданият бокьулел магIарулал пашман гьарураб хабар.
Пиридул хехлъиялъ тIибитIана гьеб магIарухъги шагьаралдаги - гьечIо тIокIалъ нилъер Фазу. ГIадамалги хирияй, гIадамазеги хирияй хIикматай Фазу.
Свана гIумру. СвинчIо шагIиралъ доба адабияталъул борхалъуда бакараб канги гьенибго кунчIараб цIваги. Ана Фазу Адабияталъул сонгун абадияб рокъое.
Цее ячIуней йиго хундерил тIалъуда, гIагараб Гиничукь росдада аскIой районцояз, гIагарлъиялъ, гьудул-гьалмагълъиялъ сверун ккурай Фазу. Гьале циндаго жиндирго гIажаибго хIикматаб кьурдигун Фазуца роржен босана Саба Меседо гIунарай ГIакаро магIарде. Гьелъул тIогьийги рещтIун, кIиябго кверги зобалазде битIун, шагIиралъ ахIулеб бугин ккола:

ВатIан, мун бокьизе тIоцебе дида,
Лъицадай малъараб
гьаб дунялалда?
Лъица абадиялъ, унареб хIалалъ,
ХIасратаб дир рекIелъ
бикIараб дур цIар?

ВатIаналдеги, халкъалдеги, йижараб ракьалдеги рокьи долъ нилъехъе кьун тана жиндирго асаразда цадахъ.
Лъабго анкьалъ цебе дица Фазул хIакъалъулъ хъван букIана гьанжесеб заманалда. Бихьулищха гьанже "йикIаниланги" абун бицине кколеб буго. ЦIидасанги ракIалде щвезаризе рокьун руго шагIиралъул рагIаби:
- Дун хвараб мехалда, дир хабада рижизе ругел тIугьдулги херги нахъе ретIуге. Гьел руго дица нужеде битIулеб салам.
Хабада гурониги, жиндир гIумруялдаги рекьана гьелъ тIугьдул. Гьел тIугьдузул махIлъун Фазу йокьулейщиназул ракIазулъ хутIила гьелъул асаралги чIужугIаданалъул нургIан берцинаб сипатги. ШагIиралъул свин гьечIеб гIумру хутIила гIадамазе кумек гьабиялъул кIудияб мисаллъун.
Щиб лъалеб, нилъер гъасдаги чанги рещтIине батила Фазул рухIалъул хIинчI. Нахъеги шагIир ячIуней йиго цее:

Гьари буго, гIадамал,
Гьеб хIинчI рагъида чIани,
ГIинтIаме гьелъул кочIохъ,
Гьин рехуге гьеб кквезе.

Гьеб хIинчI эркенлъуда те,
Эркенлъи гьечIонани,
Дир рухIалъул хIанчIица
Нужей кечI ахIуларо.

Фазул рухIалъулги лъугьун батула хIеренаб хIинчIги ва гьелъ гIадамазе ахIизе руго хIайранал кучIдул. Берал къанщаралго цебе бачIунеб буго Фазул рухIалъул гIурччинаб кьер бугеб хIинчI:

Воре, хIанчIазул тIелал,
Гьеб хIинчI гъорлъе бачIани,
ХIеренго кIалъай гьелда,
Гьеб цIакъ хехго лъукъула.

Дун ялагьун йиго шагIиралъул гIумруялъул матIуялъуе:

Гьеб цIорол матIуялъул
ТIадегIанаб борч буго:
БитIараб жо кидаго
Киназдаго бицине,
Щивасул гьумералде
Цо бералъ балагьизе.
Бадибе рецц лъаларо,
ХIелхIеди букIунаро,
ХIакъикъат рагьун кьола
Балагьаралщиназе.

ГIумруялъул матIуялъги жибго гIумруялъги бадибчIвай гьабизе гьечIо доб гIурччинаб хIанчIие. Гьеб хIинчIги букIина жийго шагIир гIадаб бацIцIадабги, роцIарабги, берцинабги.
Хундерил тIалъуда квачараб декабралда бижараб, тIегьараб тIогьол гIумру лъугIана квачараб январалда. Ахираталъул рокъое гьей нухарегIана хъахIаб гIазул рацIцIадал хIулабаз.

Дун гьанже йихьарал,
дун гьанже лъарал,
Дие бокьилаан даим гIумруялъ
Нужеда йихьизе
дилъ дой мугIрул яс,
МагIарул намусгун,
росдалго яхIгун.

Гьеле гьединайлъун хутIила лъалелщиназе шагIир Фазу ГIалиева.

 

Автор: Шамай Хъазанбиева

Газета №: 2, от 15. 01. 2016 г.





Уважаемый посетитель, Вы зашли на сайт как незарегистрированный пользователь.
Мы рекомендуем Вам зарегистрироваться либо войти на сайт под своим именем.

Комментарии:

Оставить комментарий

При использовании материалов сайта, активная гиперссылка на сайт Hakikat.Info обязательна!
При использовании материалов сайта в печатных СМИ, на ТВ, Радио - упоминание сайта обязательно!