Сделать домашней|Добавить в избранное
 
Главная » Образование - Лъай кьей, мактаб » Жакъасеб къоялъул къваридаб сарин
на правах рекламы

Жакъасеб къоялъул къваридаб сарин

  • Версия для печати
Добавил(а): istina от 25-12-2015, 14:20
Дагъистаналъул халкъазул мацIал цIуниялъул бицана ДРялъул ЖамгIияб

палатаялъ Гьудуллъиялъул рокъоб

Гьелда гIахьаллъана ЖамгIияб палатаялъул ва Миллияб политикаялъул министерствоялъул вакилзаби, депутатал ва республикаялъул СМИязул журналистал. Кин цIунилел рахьдал мацIал? Гьеб букIана аслияб суал.

Дандеруссин нухда бачана ЖамгIияб палатаялъул председатель ХIамзат ХIамзатовас. "МацI цIунизе кколеблъи бичIчIуларев ва гьелде дандечIарав чиго ватуларо. Амма гьелъие гIоло гьарулел ишал рихьуларо. Нилъеда цебечIараб аслияб масъала буго лъималазе мацI бокьизабиялъе нух бати. Эбел-инсуе бокьун гьечIо рахьдал мацI лъималазда малъизе. Кин жамгIияталда, гьединаб ахIвал-хIал букIаго, мацIалде рокьи куцан бажарулеб ва гьеб цIуниялъе кинал нухал ратилел? Кин умумузда ва пачалихъиял идарабазда, жамгIиял институтазда рахьдал мацI лъазе тIадаб букIин бичIчIизабилеб?" - ан суалал лъуна гьес.
Рахьдал мацIал школазда малъиялъул масъалабазул бицана ДРялъул Халкъияб Собраниялда бугеб лъай кьеялъулгун гIелмуялъул ва культураялъул комитеталъул председатель ГIабдулхIалим Мачаевас. Аслияблъун гьес рехсана школазда цIалул тIахьал гIолел гьечIолъи ва лъица-кин къватIире риччаралали лъаларел тIахьал базаралда ричи. "Школазул библиотекабазул халгьабуна депутатаз. Цо-цо классазул цIалул тIахьал гьезего гьечIо. Гьел къватIире риччазе гIарацги кьолеб буго бюджеталдаса, масала, исана 142 млн гъурущ букIана биччан. Кибе гьеб харж гьабурабали лъаларо, амма школазда цIалул тIахьал ратулел гьечIо", - ян абуна ГIабдулхIалим Мачаевас.
Рахьдал мацIазе зарал гьабулел ишаллъун гьес рикIкIана батIи-батIиял миллатазул вакилзабазулгун ригьнал гьари. Гьединаб хъизамалда я инсул, я эбелалъул мацI малъуларин абуна гьес. МацIазул масъалаби тIуразариялъулъ миллиял театрал ва миллиял мацIазул СМИял гIахьал гьаризе кколин абураб пикруги загьир гьабуна.
ЖамгIияб палатаялъул миллатазда ва диназда гьоркьосеб рекъел цебетIезабиялъул комиссиялъул гIахьалчIужу ХIабибат ГIазизовалъ абуна рахьдал мацIал цIуниялъул жавабчилъи миллиял газетазулгун журналазул редакциязда тIалъулин. "Маданияталъул гIатIилъиги тарихалъул бечелъиги бугеб халкъ ккола миллияб мацI цIунараб халкъ. МацIалъул бацIцIалъи цIуни, гьеб машгьурлъизаби миллиял СМИязда тIадаб буго", - ян кIалъана гьей.
Миллиял СМИязул редакциязул ресаздаса пайдаги босун, рахьдал мацIал малъиялъул курсал гIуцIизе кколин абуна рехсараб комиссиялъул гIахьалчи ГIумар Жавтаевас. "Шагьаразда гIемерлъун руго ингилис мацI малъулел курсал. Амма рахьдал мацIал малъизе ахIулел курсазул дида бицунебго рагIичIо. Гьел рагьизе ккелин ракIалде ккедал, кир гьел гIуцIилелин суал бачIана. Гьел гIуцIизе бегьилаан миллиял газетазул редакциязда", - ян абуна ГIумар Жавтаевас.
Жидер редакциялда гьединал курсал рагьун ругин бицана даргиязул газеталъул мухбир МухIамадмухтар МуртазагIалиевас. "Амма сундуего гIадин, миллиял газетазул редакциязеги гIарцул рахъалъ кумек хIажат буго. Исана газетазул бюджет г1емерго дагь гьабуна. Газетазул гьурмазул къадар дагьлъизабуна. Гьеб рахъалъ пачалихъияб кумек щвечIони, мацIал цIуниялъе гIицIго редакциязул хIаракаталъул къуват гIоларо", - ян абуна М. МуртазагIалиевас.
Къогониги соналъ гIахьаллъулей йиго дун мацIазул къисматалъул бицунел дандеруссиназда. Къоябго соналъ бицунеб буго цIалул ва методикиял тIахьал гIунгутIиялъул, пачалихъияб кумек хIажалъиялъул, рахьдал мацIазда гьитIичазе маргьабигун мультфильмал хIадуризе, рахьдал мацIазул учительзабазе кумекалъе сайтал гIуцIизе ккеялъул… Иргадулаб дандеруссиналдаги гьелго хIужаби рехсана. Бицана миллиял театразда лъималазе спектаклял рукIине ва гьенирго ясикIабазул спектаклялги хIадуризе ккеялъул. Ахирал соназда загьирлъана бищунго рекIее захIмалъулеб пикру: росабазул школаздацин цIалдохъабазул эбел-инсуе эбелалъул рахьдада цадахъ щвараб гIагараб мацI жидерго лъималазда малъизе бокьун гьечIо. Гьеб мацIалъул ОГЭ ва ГИА кьезе кколарелъулха. Ингилис мацI гIадин, вузалда гьеб хIажалъуларо.  

 

Автор: Кавсарат Сулейманова

Газета №: 50, от 25. 12. 2015 г.





Уважаемый посетитель, Вы зашли на сайт как незарегистрированный пользователь.
Мы рекомендуем Вам зарегистрироваться либо войти на сайт под своим именем.

Комментарии:

Оставить комментарий

При использовании материалов сайта, активная гиперссылка на сайт Hakikat.Info обязательна!
При использовании материалов сайта в печатных СМИ, на ТВ, Радио - упоминание сайта обязательно!