Сделать домашней|Добавить в избранное
 
Главная » Горянка - МагIарулай » 5 декабрь - шагIир гьаюраб къо
на правах рекламы

5 декабрь - шагIир гьаюраб къо

  • Версия для печати
Добавил(а): istina от 8-12-2015, 10:20


"Фазу - йиго Фазу! Гьей лъидаго релълъарай гьечIо, цохIо жиндаго гурони.
Гьеб релълъунгутIиялъулъ буго Фазул асаразул тIадегIанлъи, тIокIлъи" 

Гьедин абуна ХIамзатил Расулица Фазу ГIалиевалъул хIакъалъулъ. Гьединай йигин жийилан абулеб буго жиндирго тIехьалъул жилдалдасан киеялиго рикIкIаде ялагьун чIарай Фазуцаги.

Гьале бегулеб буго Фазул "Эбелалъул хъахIаб шал" абураб иргадулаб тIехь:

Дир кIиго гъветI буго, гъутIбузул кьалбал,
Анкь-анкь гъатал рихъун ракьулъе арал.
Дир инсул тухумалъ борхана намус,
Эбелалъул кьибил гьебги ккун чIана.

Гьадинал ункъжугьабаздасан байбихьулеб буго шагIиралъул тIехь. Гьенир ругел асарал цIаланагIан, бокьун буго гьей йихьизе, гьелъулгун гара-чIвари гьабизе. Фазул ункъжугьабалъ руго гIумруялъул дарсал, рокьи, ццин, гIадамал, гьезул гIунгутIабигун тIокIлъаби:

Месед-гIарацалъул гIорал щваниги,
ГIадан талихIавлъун вукIине гьечIо.
Гьаб дуниялалъул берцинлъи, тIокIлъи,
ТIокI гьабун рекIелъе цIазе лъачIони.

***
АнцIго рукъи бараб гурдида гъоркьги,
ДунялгIан гIатIидал ракIал рукIуна.
Барахщун течIого, гьез бикьун кьола,
Рокьиги канлъиги гIадамазухъе.

Фазу - чIужугIадан, эбел. Гьелъул шигIрабалъ рессун руго чIужугIаданалъул рекIел бухIи, эбелалъул магIу, шагIиралъул жакъасеб гIумруялъул хIакъалъулъ пикраби:

Ралъад тIаде гьулчун тIиндейищ араб,
БукIараб ритIухълъи Дагъистаналъул.
МугIруца, тIадги чIун, чIинтIунищ лъураб,
Мунагьакьа хIинкъи, рекIелъ букIараб.
***
Аллагь, кантIизабе тIасан ккараб гIел,
ГIолохъаби чIвазе нахъе къаларел.
Цо тохлъун абураб рагIуе хIукму, -
РекIелъ гулла речIчIун, къисас босулел.

ХIикматай Фазу. Гьедин абула гьелда гьей лъалелщиназ. ШагIиралъул цIар бахъарабго, цее чIола Гиничукь росдада тIадехун бугеб майданалда росуцоязул, районцоязул горсвериялъулъ кьурдулей унго-унгояй магIарулай. Гьелъул кьурдиялъ пана гьаюна - квералги зобалазде ритIун, намусалъул тIадегIанлъиялде йоржуней йиго гьей, жиндирго цIваялъеги цIаралъеги ритIухъайлъун даимго хутIарай Фазу.

ЦIарккун гьикъаразде бадий ялагьун,
Бицине лъалареб хабар бицинчIо.
Харбазул лълъурдул ккун, гьезул рачI цIацIан,
Меседил замана зурун рехичIо.

***
ГIакъилал кидаго хIинкъизе ккола,
Балагь бачIинилан цIодорлъи гьабун,
Жиндаго речIчIизе къачIарал ганчIал,
РикIкIадасан рихьун, мерхьине кIвезе.

Фазул щибаб ункъжугьаялъулъ бихьулеб буго шагIиралъул шигIрабазул гъварилъиги, анищазул роцIенги, гIумруялъул гвангъиги. Гьей тIадегIанай йиго нилъер гIумру кваналел гIамалаздаса.

Дун гIакъиллъиялъул кьалбазда гIуна,
Кьурабалъ гьабураб гьитIинаб росулъ.
Гьениб щибаб рокъоб къадру борхулеб,
Бечелъи букIана ракIалъ хутIулеб.

Жакъасеб гIумруялъул ритIухълъи гьечIолъиялъ Фазу цIидасан цIалей йиго рорхатал мугIрузухъе, мугIрузул тIокIкIарал иццазухъе, иццалгIан рацIцIадал гIадамазухъе:

Дун гьитIинаб мехалъ, БетIергьан Аллагь,
Дуца кьун букIараб гьайбатаб гIумру.
Гьереси лъаларел, рекIкI бичIчIуларел,
Рагьарал ракIазул гIадамазда гъорлъ.

ШагIир рази йиго жиндирго гIумруялдаса, гьеб тIамун бажарараб куцалдаса. Гьей киданиги хилиплъичIо мугIрузул законазе:

Дун ялагьун йиго херлъарай Фазухъ,
Херлъиялъулъ бугеб борхалъиялъухъ.
Беразулъ кенчIолеб рацIцIалъиялъухъ,
РоцIен жеги свинчIеб сабурлъиялъухъ.

Фазул сабураб гьумералъухъги гIакъилал беразухъги ялагьун йигей дида рагIулеб буго ургьисан бачIунеб ахIиги, бухIиги, угьиги:

Къасиги ургьимес соролеб буго,
Сири бан, тIолго черх квачалеб буго.
ГIакъилаб Дагъистан, гIарцуцайищ мун
ГIадамал чIваялде тIамулеб бугеб?

Фазул хIакъалъулъ абизе берцинал рагIаби гIолел, ратулел гьечIо - гьел киналго абуна. Такрар гьабизе бокьун гьечIо. ШагIиралдеги гьелъул шигIрабаздеги бугеб рокьи загьир гьабизе бокьун буго жийго шагIиралъул ункъжугьаялдалъун:
КечI хъваравщинав чи шагIирги гуро,
ГамачI бикIанщинав устар кколаро.
Цо кечIалъ, цо хатIалъ хвел гьечIеб гIумру
ГIадамасе кьола, гьунар бугони.

ЦохIо "МугIрузул закон" гIела Фазул хвелгьечIолъиги гьунарги борцине.

КIиго гIумруялда йиго гьанже дун,
Цо гIащикълъиялда дунял гIуцIулей.
Цо ахираталде ине хIинкъиялъ,
Мунагьал чуреян дугIа гьабулей.

Буйнакскиялда, чед бежулеб заводалда хIалтIулей йикIана дир эбелалъул яц. ГIемерал соназ иргаялда йигониги, щуго бесдал лъимер хьихьарай гьелъие рукъ кьолеб букIинчIо. Хъизамалъул анлъго чи хIебтIун вукIана гьитIинабго рокъоб. Цинги эбелалъ хъвана Фазу ХIамзатовнаялъухъе. МоцIида жаниб ункъгIалалъе рукъ щвана. Гьеб батила шагIиралъ гьабураб лъикIлъиялъул гьитIинабго хIенехI.
Кинаб заманалда босаниги, инсан ракьалде вачIунаго, гьесда цадахъ рещтIуна ракьалде хIалихьалъиги.
Цо-цояз абула гIадан хисун вугилан. Кидаго рукIана квешалги. Гьез кидаго "босана гIужие берцинлъиги гьунарги":

Лъабго кьер батIиял гIадамал руго,
ГIумруялда дида дандчIварал, лъарал,
Цоял ракIбацIцIадал, цоял ракI хъубал,
Лъабабилел ццидалъ руцун гьарурал.

Дица цIалана цо журналалда Фазуца хъвараб. Гьелъ абулеб букIана жинца киданиги лъие бугониги бадибчIвай гьабичIила. Гьелъги батила Фазул тIадегIанлъи жакъаги жиндирго цIваялда аскIоб, доба борхалъуда бугеб.

Азарго тIегь буго дир рекIел ахикь,
Аза-азар тIугьдул букIдузулъ къарал.
Гьезул щибалдаги, шапакъат гIадин,
Щубил горал руго даим гиргилел.

Жакъаги руго Фазуца рекIел тIугьдул гIаламалъе рикьулел:

Дица дунялалъул тIогьийги яхун,
ТIолго гIаламалде ахIулеб буго:
Эркенлъи зоб бугин, рекъел бакъ бугин,
Рукъ-рукъалъ къадругун къабул гьабеян.

Фазул цIар бахъарабго, цебе бачIуна 2012 соналда ГIурус театралда гьелъ гьабураб кIалъай. Щаялиго, гьелъул пикру гьабидал, магIуги хулула бадиб:

- Цо-цояз бецула хабада бижараб тIегь-хер. Амма дир хабадаса щибго бецуге. Гьенир рижарал тIугьдул риччай тIегьазе. Гьел тIугьдул руго дир рекIелъан гIаламалъухъе бачIунеб рокьи. Гьеб киданиги бечIазе гьечIо. Хабада бижараб гIурччинаб херги ккола чIаго ругездаги дидаги гьоркьоб букIине бугеб рокьул кьо.

ГIурччинаб рухI буго гIурччинаб харил,
ГIумру берцинлъизе нилъей бикьулеб…

Дуниял бокьиги бокьун хIалтIиги,
ХIакъаб шартI - тIансалъун талихI бессулеб,
Рокьанщинал кьерал накъищалъги лъун,
ЛъикIлъи гьабулаго гIумру тIамизе.




 

 

 

Автор: Шамай Хъазанбиева

Газета №: 47, от 4. 12. 2015 г.





Уважаемый посетитель, Вы зашли на сайт как незарегистрированный пользователь.
Мы рекомендуем Вам зарегистрироваться либо войти на сайт под своим именем.

Комментарии:

Оставить комментарий

При использовании материалов сайта, активная гиперссылка на сайт Hakikat.Info обязательна!
При использовании материалов сайта в печатных СМИ, на ТВ, Радио - упоминание сайта обязательно!