Сделать домашней|Добавить в избранное
 
на правах рекламы

Чачаналъе зиярат

  • Версия для печати
Добавил(а): istina от 27-11-2015, 11:02

Дагьаб цебегIан Хунзахъ районалъул жамагIаталъ зиярат гьабуна имам Шамилил цIар рагIарав наиб, Хунзахъа Ахъбердил МухIамадил, Чачан Республикаялъул Шатой районалъул Гушкерт росулъ бугеб хабаде.  

Мемориалияб хъарщи лъуна

"ДРялъул искусствоялъул мустахIикъав хIаракатчи", "ДРялъул культураялъул мустахIикъав хIалтIухъан", композитор Майиндур ТIалхIатов ракIалдещвеялъе, гьес гIумру гьабулеб букIараб Гъизилюрт шагьаралъул Гагаринил цIаралда бугеб къотIноб №30 рукъалъул къадада чIвана мемориалияб хъарщи.

ТIалхIат Ахъбердиев

 

Ток ва нухал

 Гьеле магIарухъ гIумру гьабулел гIадамазе хIажатаб жо 

АнцIила щуго соналъ цебе, гьури бахъиналъул хIасилалда канлъи свана БежтIа. Радал хехго ЛъаратIе унаго данде ккарав чияс бицана жидехъги канлъи букIинчIилан. Гьеб хабаралда ниж рукIаго, радал микьго тIубалелде, ЛъаратIасан ваккун вачIана мотоциклалда рекIарав чи. Гьалеха дежурний вачIунев вугин бицана гьалмагъас. АскIове щведал гьес бицана, лъабго дежурниясул бакIалда, подстанциялда, гьанже кIигояв хутIун вугилан. Къаси сагIат анцIгоялдаса радал микьго тIубазегIан гьенив чиги вукIунарилан.
КIиябго районалъул халкъ гьеб сордоялъ бецIлъуда хутIана. Гьебго хIал бугин абизе бегьула Шаури подстанциялдаги. Гьениса канлъи уна лъеберго росулъе. Къаси гьенивги дежурний вукIунаро, дагьабниги гьури бахъани, канлъи уна ва лъеберго росдал гIадамал хутIула токги гьечIого.
АнцIго соналъ цебе «Дагъэнергоялъ» Агъвалиса Шаурибе цIана ЛЭП-110 абураб токалъул мухъ. Гьеб цолъизабуна БежтIаса бачараб ЛЭП-35-гун. КIудияб санагIалъи букIана рикIкIадал мугIрузул росабазул гIадамазе гьеб токалъул мухъ цолъизабуралдаса. "Шаури-Эчеда" шагьранухда хIалтIи гьабулаго, ракь ччукIун бачIун цо-цо бакIаздасан жагъаллъи ккана токалъул мухъазе, кьуру кьвагьизабиялъул хIасилалда кварал тIуна цо-цо бакIаздаса. КIиго соналъ цебе гьеб рукIалиде ккезабулез абулеб букIана щибаб лъагIалида жаниб анлъго вышка лъезе бугин кваралги цIан. Дагьал къояз цебе хабар рагIана Эчедаса эхеде ЛЭП-110-ялда хIалтIи гьабулеб бугинги.
Аваро-Кахетиялъул нухда хIалтIаби гьариялъул хIасилалда канлъи къотIизабула анкьида жаниб лъабго-ункъо къоялъ. Къаси-къаси бецIлъуде кIиго районалъул гIадамал ккей гуребги, тIубанго щущазабун бугин абизе бегьула токалъул идараялъул хIалтIи, къотIула бухьен.
Гьайгьай, къокъабго заманалда жаниб бараб ЛЭП-110 къачIазе гIемераб мех баларин ккола къачIазе тIаделъани. Гьел ЛЭП-110 ва ЛЭП-35 нух кьвагьиялъул хIалтIаби гьарулаго, иргаялда къачIани, квалквал букIинароан кIиябго районалъул идарабазеги, санагIалъи букIинаан кIикъоазаргоялдаса цIикIкIун чиясеги.

ГIиса ГIабдулаев 

 

ЖамагIат разияв начальник

Бокьулеб хIалтIуда вугони, хIасилги букIуна

ХIабибов ГIадилхан ккола ЦIумада районалъул Гьигьалъ росулъа. Гьесул эмен АхIмаднаби хIалтIулев вуго росдал школалда. 1990 соналда школаги лъугIизабун, ГIадилхан ана амиялде ва тIадвуссиндал хIалтIана колхозалда. Гьенисан ГIадилхан ана МахIачхъалаялде ва 1996 соналда тахшагьаралъул УВДялъул ППСМалъул полкалда милиционерлъун хIалтIизе лъугьана. Цадахъго цIалана милициялъул школалда. Гьеб лъугIун хадуб, хIалтIизе вачIана ЦIумада районалъул СОГалде. 2002 соналда ГIадилхан хIалтIизе лъугьана ЦIумада районалъул милициялъул участкаялъулав уполномоченныйлъун. Гьенив хIалтIулаго лъугIизабуна Нальчикалда бугеб Россиялъул МВДялъул юридикияб академия. Хадуб гьесда тIадкъана ЦIумада районалъул УУМалъе нухмалъи гьабизе. 2012 соналдаса жакъа къоялде щвезегIан хIалтIулев вуго Россиялъул ОМВДялъул ЦIумада районалъул ОУУПалъул ва ПДНалъул начальниклъун. ГIадилхан ХIабибовасул хIалтIуе тIадегIанаб къимат кьола районалъул жамагIаталъ, цадахъ хIалтIулез ва нухмалъулез.
1999 соналда Дагъистаналда ккарал рагъулал лъугьа-бахъиназулъги гьес бахIарчилъи бихьизабуна. Гьеб заманалда ЦIумада район яргъид гIуцIарал къокъабаздаса бацIцIад гьабулаго бихьизабураб багьадурлъиялъе гIоло кьураб къиматлъун ккола гьев Владимир Путинил цIар хъвараб сагIтидалъун ва "Багьадурлъиялъе гIоло" медалалдалъун кIодо гьави. Гьединаб даражаялде вахине ва адаб-хIурматалъе мустахIикълъизе ккани, чияс жиндаго тIадкъараб иш ракIбацIцIадго тIубазабизе ккола, гIадамазул гIузраби ричIчIизе ва нахъбахъичIого гьезул мурадал тIуразариялъе таваккал букIине ккола. Гьединазул цебесеб кьерда даим вукIуна ГIадилхан ХIабибов. РакI-ракIалъ баркула гьесда, дагьал церегIан къояз букIараб гьезул махщалилаб байрам ва гьарула хадурккунги хIалтIулъ кIудиял бергьенлъаби, хъизаналъе кидагосеб талихI ва рохел.
Рукъият ГIалисултанова

 

Мухтарилги
ХIусенилги хIаракат

Гумбет районалъул ЧIиркъатIа росулъ гIемер руго цоцазе хIалае рахъине хIадурал гIадамал

Щибаб росдал рукIуна жидеего хасиятал захIмалъабиги къварилъабиги. Гьел тIаса инаризе къеркьолел чагIиги ккола росдал дибир ва бегавул. РукIуна жамагIатазда гьоркьор росдае кумекалъе квербакъулелги.
ЧIиркъатIа ккола бищун пихъ гьуинал ахал ругеб росу. Гьедин бугониги гIолеб букIинчIо ахал лъалъазе лъим. 20 километралъул манзилалда рогIралги лъун бачун букIана мунагьал чураяв ХIажиев МухIамадица лъим, амма цого-цо "Доргъоло" мегъ гурони лъалъазе рес ккечIо. Росулъ ругел ахал лъалъазе лъим гIолеб букIинчIо. Гьелда тIад ургъана жамагIатчагIи МухIамадов Мухтарги Сабуев ХIусенги. Къокъабго заманалда жаниб гьез ралагьана рогIрал, босана насос. Гьев кIиявго чияс, щивго кумекалъе гьечIого, регъана рогIрал ва лъуна кIиго километралъул манзилалда. Жакъа бокьарав чиясе лъалъадизе лъим буго. Аллагь разилъаги Мухтаридасаги, ХIусенидасаги ва гьезие гIарцудалъун кумек гьабураздасаги.
ЧIиркъатIаса Бияхъай

Театралъулаз асир гьаруна

Дие бокьун буго, "ХIакъикъат" газета гьоркьобккун, баркала кьезе Авар театралъул артистазе ва гьелъул директорасе. КIигониги лъагIел сверулеб букIун батила нижер БакьагьечIиб росдал ГIарада гъутаналде культурияб рукъалъул хIалтIухъаби рачIинчIелдаса. Нижее цIакъ бокьула концерт-театр, ихтилат-кеп.
Гьале нижехъе бачIун букIана Авар театр. Къад сагIат кIигоялда гьез бихьизабуна лъималазе "ХIосокъ" абураб театр. Къаси анкьгоялда - чIахIиязе рихьизаруна батIи-батIиял пьесабаздаса бутIаби ва гьоркьо-гьоркьор ахIана кучIдулги. Балагьарал цIакъ разиго хутIана. Кидаго кечI-бакъан хириял бекьечIдерил жамагIат гьеб сордоялъги гьез хIайран гьабуна.
Раисат Пирова 

 

 

 

 

 

Газета №: 46, от 27. 11. 2015 г.





Уважаемый посетитель, Вы зашли на сайт как незарегистрированный пользователь.
Мы рекомендуем Вам зарегистрироваться либо войти на сайт под своим именем.

Комментарии:

Оставить комментарий

При использовании материалов сайта, активная гиперссылка на сайт Hakikat.Info обязательна!
При использовании материалов сайта в печатных СМИ, на ТВ, Радио - упоминание сайта обязательно!