Сделать домашней|Добавить в избранное
 
на правах рекламы

маргIа

  • Версия для печати
Добавил(а): istina от 17-11-2015, 10:39
ЦохIо вукIарав васасдаса ватIалъарав ханас, жиндирго вилаяталда вугевщинав чи чIегIер базе тIамулев вукIанила. Жиндир тахшагьаралда я къвакъвадулеб гIанкIу, я гIегIедулеб хIелеко нахъе толеб гьечIила. Гьаракь борхун кIалъарав чиясда кIигъеж гьабун баччараб гIакIа лъолеб букIанила. Релъа-рохи, махсаро-хочI тIубанго гьукъулеб букIанила.
- БетIерчIахъаяв хан, дур амруги гIадахъ босичIого, цо гIолохъанав чи вуго гьагъава кеп-гIоркьалда, - ян лъазабунила вазирас гьесда. - Щиб рагIи бицаниги, гIин гъос нижехъ тIамулеб гьечIила. Кинаб хIукму дуца гьагъав мунапикъасе къотIилеб?
- Щив гьесул бищун хирияв чи?
- Эмен вугоха гъосул, инсудаса хирияв чи васасе щив вукIинев?
- Батани, ватIа гьаве гьес инсудаса.
Балъго гъоркьан ритIарал гIадамаз тIагIинавула гьесул эмен.
- БетIерчIахъаяв, хъахIлъи балалде эменги вукъун, лъидаго хIалги лъазе течIого, гьагъабго кеп-гIоркьалда вугила гьагъавго чи, - ян лъазабунила ханасда.
- Инсудаги эбелалдаги хадув щив вугев рокъов гьесие хирияв чи?
- Лъади йигоха, бетIерчIахъад, гьей рихарав рос кинав вукIинев?
- Батани, тIагIинае гьесул лъади.
ТIагIинаюла гьесул лъади.
- БетIерчIахъад, чармил батизе ккола гъосул ракI, гьанжеги балъго-гIатIго лъадиги юкъун, гьагъабго жиндирго ихтилаталда вуго. Кинаб хIукму дуца гьанже къотIилеб?
- Нахъе щив гьесул хутIарав?
- Цадахъ гьабураб кIиго лъимер бугоха гьесул - васги ясги.
- ТIагIинаре гьел.
ГIащтIичагIаз лъугIизарула гьел лъималги.
- БетIерчIахъад, нижеда лъаларо щиб магIдан биун тIурав чи гьагъавали. Гьанжеги щибго лъугьинчIеб гIадин, велъа-вохун вуго гьев базаралда. КъотIе цо къвакIараб тамихI, гурони гIадамазда гьоркьобги дудехун гъулгъул багъарулеб буго.
- Кьибил-тухумалда гьоркьов щив хутIун вугев гьесие хирияв чи?
- Кьибил-тухум некIого хабалъе ана гъосул.
- Росулъ гьесие хирияв чигойищха тIокIав гьечIев?
- ЦохIо гьудул вугоха гъосул, бетIерчIахъад, тIокIав чи нижеда лъаларо.
- Батани, тIагIинаве гьесул гьудулги.
Унеб буго анкь, унеб буго моцI, сверун данде щолеб буго лъагIел, амма гьев чи жанив чIарав, тIокIав къватIиве вахъунев гьечIо. Накалде щун буго мегеж, жеги-жеги бадиса бурулеб буго бухIараб магIу. Балъго гъоркьан ритIарал гIадамаз лъазабулеб буго ханасда гьеб ахIвал-хIал. РитIун нукарзабигун ахIулев вуго ханас гьагъав чи.
- Дица мун ватIа гьавуна инсудасаги, эбелалдасаги, лъадудасаги, лъималаздасаги. Дуда гьеб унтичIо, амма ахиралда дица гьудул кодоса вахъараб мехалъ, мун гьеб пашманлъиялде ккана. Гьелъул магIна лъазе бокьун буго дие, - ян абунила ханас.
- Дуца дир эмен чIвана, хан, амма гьев гьадинги ункъо-щуго соналдасан холев чи вукIана, - ян жаваб кьолеб буго гьас. - Эбелалъги бищун цIикIкIун ичIго-анцIго сон балаан. Дуца дир лъади чIвана - гьей цойги ячине бегьулаан. Лъимал дие цIияй лъадуца гьаризе бегьулаан. Амма дуца чIвана дир гьудул. Гьев дир цохIого цо вукIана. Дир тIарамагъадисеб дуца бахъана, дур тIарамагъадисеб дицаги бахъила, - янги абун, тIогъоде щвезегIан ханасул бицатаб чохьолъ къазабуна ханжар.
- Гьанже лъанищ щиб жо гьудуллъияли?

Автор: ФИО или фамилия и инициалы автора

Газета №: Только число, без пробелов и др.символов. Например 43, от Число месяца выхода номера газеты. Например 12 Месяц выхода номера газеты. Например января Год выхода номера газеты. Например 2012г.





Уважаемый посетитель, Вы зашли на сайт как незарегистрированный пользователь.
Мы рекомендуем Вам зарегистрироваться либо войти на сайт под своим именем.

Комментарии:

Оставить комментарий

При использовании материалов сайта, активная гиперссылка на сайт Hakikat.Info обязательна!
При использовании материалов сайта в печатных СМИ, на ТВ, Радио - упоминание сайта обязательно!