Сделать домашней|Добавить в избранное
 
Главная » Общество - ЖамгIият » Унго, цо ток букIарабани…
на правах рекламы

Унго, цо ток букIарабани…

  • Версия для печати
Добавил(а): istina от 26-10-2015, 11:58
Росаби чIунтулел, гьениса гIадамал гIатIиракьалде гочунел рукIиналъул бицуна гIемер. Гьелъие гIиллабиги киназдаго лъала. Амма унго-унгояб къагIидаялда гьелъул ургъел бугев, гьеб рахъалъ ахIвал-хIал роцIинабизе къваригIарав чи ватулев гьечIо. ХIатта цо-цо мехалда ракIалде ккола рикIкIада росабалъ ругел гIадамал нухмалъиялдагицин кIочон тун ругин абун. Руго гIемерал программаби росаби церетIезариялъул мурадалда къабул гьарурал. Амма хIасил кколеб гьечIолъиялдалъун щаклъизе бачIунеб буго масъала тIубазабиялъе гIоло гурел гьел хIакимзабазул чванта биццалъизабиялъе ургъарал рукIиналда. Гьелъул хIакъалъулъ гIемераб бицине ва хъвазе бегьула. Амма нилъеца тIадчIей гьабила цо хIужаялда. Чанго сон буго Шамил районалъул Гьандихъ росдал Хъазар абулеб бакIалда МухIамад Макъсудовас ва МухIамад Мухтаровас фермерлъиялъул магIишат рагьаралдаса. ГIезегIан хIалтIи гьабун буго гьез магIишат цебетIезабизеги. Амма руго гIемерал гIунгутIабиги. Гьезул ва магIишаталда бугеб ахIвал-хIалалъул нижер мухбирасе бицана МухIамад Макъсудовас.
- Колхоз биххаралдаса нахъего рехун тарал ракьал рукIана гьал. 2004 соналда дида ракIалде ккана гьанивеги вахъун фермерлъиялъул магIишат гIуцIизе. Гьединаб пикругун щвана росдал бегавул НурмухIамад ХIажиевасухъе. Гьес жамагIаталда дандги бан, дие нух рагьана. МагIишат гIуцIизе захIмалъизе букIин бичIчIулеб букIаниги, 49 соналъул болжалалда ижараялъ босана Хъазар абулеб ракь. 2004 соналда гьаниб киналгIаги шартIал ялъуни пайдаяб гъветI-хер букIинчIо. ГьабсагIаталдайин абуни нужеда бихьулеб буго гьаниб бугеб ахIвал-хIал. Куракул, гIечул, ахбазаналъул ва цоги-цоги пихъазул гъутIби руго, рохь гIун бачIана. Гьеб кинабго буго дицаги, Мухтаров МухIамадицаги, нижер хъизан-лъималазги гьабураб хIалтIи. Ах гIезабизе ккани, лъим къваригIуна, амма аскIосан гIор чвахулеб букIаниги гьаниб лъадал рахъалъ къварилъи букIана. Гьенисан насосалъ кьабизе бегьилаан лъим, амма ток гьечIолъиялъ ва кинго гьеб бачине ихтияр щунгутIиялъ малъкъосинабун буго. Гьедин бугеб заманалда, ах бакъвазе тезе бегьуларелъул, щибаб гъветI гIорцIизегIан лъим баччизе ккана гIурухъа. Ток бачинегIаги кумек гьабеян гьарун щвана районалъул администрациялде. Гьениб дир хабаралъул кIудияб кIварго гьабичIо. Росдал бегавулас кьолеб букIана къачIазе кколеб трансформатор. Амма, гьеб къачIазе дир рес букIинчIо. Дица гьелдаса инкар гьабуна. Токги лъимги бугони, гьаниб магIишат тIегьазабизе кIола. Рес буго тIадеги гъутIби чIезе, хур-хер гьабизе, наял хьихьизе…
- Дуе пачалихъалъул рахъалдасан кумек щун гьечIо, амма налогал кьолел ратила...
- Абула депутатаз законал рахъулин жидеего рекъонкколел ва мискинхалкъ гъанкъулел. Гьеб пикруялда разилъизе кколел руго. Щайгурелъул, фермерлъиялъул магIишат рагьун букIана дица ва гьелъухъ лъабго соналъул налогалинги абун тIад къотIун батана 100 азарго гъурущ. Гьеб гIарац киса кьелеб дун гIадинал фермераз. Цо соналъ бачIин лъикIаб щвани, нахъисеб соналъ гъутIбуз дагьаб гурого пихъ кьоларо. Гьединал хIужаби хIисабалде росизе ккеларищ закон тасдикъ гьабулеб заманалдаги. Пенсиялда тIаса ккола гьеб гIарац щибаб моцIалъ. Гьеб гIиллаялъе гIоло къана фермерлъиялъул магIишатги. ГьабсагIаталда гьаб ккола жибго жиндаго чIараб магIишат.
- Гьаб буго тахшагьаралдаса райцентралде унеб шагьранухда ва гьанисан гIемерал хIакимзабиги хьвадулел ратила. Цеберехараб, бер речIчIулеб бакIалда бугелъул дур магIишат, щиб хIажат бугебин абун, магIишаталъул ахIвал-хIал цIехон цогIаги чи аскIове вачIанищ?
- РачIана чанцIулго. Амма дие хIажаталъул гьикъизе гуребха, хIакимзабазул кортежал нухдасан иналде гъутIбузул рохтиял рохьейилан лъазабизе.
- Рехун тараб ракьалдеги вачIун гьаниб магIишат цебетIезабиялдаса пайда бугищ? Бокьарав чиясухъа бажарулищ гьеб хIалтIи гьабун?
- Кинаб пишаялде жуваниги, щиб гьабизе байбихьаниги, тIоцебесеб иргаялда, букIине ккола сабур. Гьеб бугони, бокьараб жо бажарула ва гьабуралдаса пайда-хайир ккечIогоги букIунаро.
- БачIин гьарзаго щварал соназ пихъ бичиялъул къварилъи букIунищ?
- Исана ахбазан-курак гIемер букIана. Амма пайда щиб, бакIалдаго бичун унаро. ГьечIелъул гьанир къанагIат гурого консервабазул заводалги, пихъил батIи-батIиял нигIматал гьарулел бакIалги. Шагьаразде ун бичизейилан лъугьани, гьенибги полициялъ тIагIам толаро. БукIаралъуб пихъги тун нахъе унеб хIалалде ккезарула гьезул хабаралъги тIалабазги. ПалхIасил, ахихъанасда цIакъ захIмалъула гIакъубаги бихьун гIезабураб пихъ чIобого кьезе ккараб заманалда. Амма биччанте гьеб садакъалъун букIине.
Араб гIасруялъул 90-абилел соназдаги щун рукIана ниж Хъазар абулеб бакIалде. Доб мехалда тIубанго чIунтун букIараб бакIалда жакъа цIияб ахги бахчаги бихьидал, рекIее асар гьабуна. ХIалтIулев чиясул къимат гьабулареб заман гьаб бугелъул, жужахIалъул гIакъубаги бихьун магIишат гьабулел чагIазда хIукуматалъ кверчIвалебани, гьайгьай, росдал гIадамазе пайда букIинаан. ГIезегIан ресал руго гьениб магIишат гьабизе, хIатта ччугIа гIезабизецин. ЦохIо пихъ гIезабиялде гуребги, кIиявго МухIамадица гьениб бекьун бугоан помидор-охцерги, цогидал овощалги, хIатта цIибилгицин. Амма ток гьечIолъиялъ гьабизе бегьулебщиналъул бицунел хутIун руго. М. Макъсудовас бицана районалъул росдал магIишаталъул управлениялъ гIезегIан кумек гьабулин, чIезе гъутIби кьолин, аскIове ани кIвараб кумек гьабичIого толарин. ГIадатияв росдал чи, фермер пачалихъалъ гьарулел кумеказда хадув лъугьун вукIунарелъул, хадув лъугьине заманги букIунарелъул, иш лъалез гьеб рахъалъ бажарараб кумек гьединазе гьабуни, цо чанго хъизангIаги магIишаталде буссун хутIизехъин буго. Гьединлъидал хьул буго Хъазаралде ток бачиналъе ва гьениб гьитIинабго бугониги трансформатор лъеялъе районалъул идарабаз кумек гьабизе батилин.

Автор: Темирхан ХIасанов

Газета №: 41, от 23. 10. 2015 Месяц выхода номера газеты. Например января Год выхода номера газеты. Например 2012г.





Уважаемый посетитель, Вы зашли на сайт как незарегистрированный пользователь.
Мы рекомендуем Вам зарегистрироваться либо войти на сайт под своим именем.

Комментарии:

Оставить комментарий

При использовании материалов сайта, активная гиперссылка на сайт Hakikat.Info обязательна!
При использовании материалов сайта в печатных СМИ, на ТВ, Радио - упоминание сайта обязательно!