Сделать домашней|Добавить в избранное
 
Главная » Культура - Маданият » Машидат Гъайирбеговалъул кочIол гъасда
на правах рекламы

Машидат Гъайирбеговалъул кочIол гъасда

  • Версия для печати
Добавил(а): istina от 2-09-2015, 15:49

Гьеб къоялъ данделъун рукIана магIарулазул шагIир Машидат Гъайирбеговалъул кочIол гъасде. КIаралазда байрам баркизе рачIун рукIана шагIирзаби, хъвадарухъаби, гIалимзаби, республикаялъул батIи-батIиял идарабазул вакилзаби. Тадбир байбихьана Совет Союзалъул БахIарчи МухIамадзагьид ГIабдулманаповасе бараб памятникалда цебе.

Гъайирбегова Машидат - шагIир, хъвадарухъан ва драматург, гьаюна 1927 соналда ГIахьвахъ районалъул КIаратIа росулъ. ЛъугIана А. М. Горькил цIаралда бугеб литературияб институт. ХIалтIана "МагIарулай" журналалъул редакторлъун, Авар театралъул директорлъун. ГIахьаллъана РСФСРалъул Хъвадарухъабазул тIоцебесеб съездалда.
Машидат Гъайирбегова ккола Сулейман Стальскиясул премиялъул лауреат, ДАССРалъул культураялъул мустахIикъай хIалтIухъан. Гьелъие щвана "ХIурматалъул гIаламат" ва ЗахIматалъулаб БагIараб Байрахъалъул орденал, ДАССРалъул Верховный Советалъул президиумалъул ХIурматалъул грамотаби.

Дунялалдаго машгьураб "Къункърабазе" Ян Френкелица хъвараб бакъаналъ цоги нухалда ракIалде щвезаруна рагъулал лъалкIал. БахIарчиясул памятникалда цере тIугьдул лъуна тIаде рачIарал гьалбадерица. Гьенибго КIаратIа гьоркьохъеб школалъул цIалдохъабаз рикIкIана Машидатица МухIамадзагьидиде гьабураб кечI.
Байрамалъул кIиабилеб бутIалъун букIана шагIиралъул музей рагьи. Гьенир кIалъазе рахъана районалъул бетIер ИсмагIил МухIамадшарипов, миллиял ишазул рахъалъ министр Татьяна Гамалей, Дагъистаналъул бетIерасул гIакълучи Денга Халидов, халкъияй шагIир Аминат ГIабдулманапова, "ХIакъикъат" газеталъул бетIерав редактор ГIали Камалов ва цогидалги.
Гьез тIадегIанаб къимат кьуна Советияб Дагъистаналъул тIоцеесей чIужугIадан-шагIир Машидат Гъайирбеговалъул творчествоялъе.
ШагIир Каримат ГъалбацIовалъул жигарчилъиялдалъун гIуцIараб музеялда Машидатил творчествоялъул бицунеб гIемераб материал бугоан: шагIиралъул тIахьал, творческияб нух - суратаздалъун, стендал, шагIиралъе сайгъат гьарурал тIахьал, гьелъул асарал рахъарал къватIисел пачалихъазул журналал, таржама гьабурал асарал, Машидатица хIалтIизарулел рукIарал къайи-къоно, тIагIел-гIучI.
Хадуб зиярат гьабуна имам Шамилил вас Жамалудинил хабаде.
Цинги киналго данделъана районалъул администрациялъул залалда. ШагIирзаби Сабигат МухIамадовалъ, Космина Исрапиловалъ, МахIмуд-Апандица, Аминат ГIабдулманаповалъ рикIкIана жидерго кучIдул.
КIаратIа росдал гьоркьохъеб школалъул цIалдохъабаз бихьизабуна Машидат Гъайирбеговалъул кучIдуздасан гIуцIараб литературияб композиция.
Гьединго рохалилаб данделъиялда бицана КIаратIаса халкъияй шагIир Баху-Меседо Расуловалъул творчествоялъул ва цIалдохъабаз рикIкIана гьелъул кучIдул.
Байрамалъул ахиралда Машидат Гъайирбеговалъул рагIабазда кучIдул ахIана районалъул художествияб хIаракатчилъиялъул гIахьалчагIаз.
Цо гара-чIвариялда академик Шамил ГIалиевас абуна чиясул хIурмат гьев чIаго вукIаго гьабизе кколин, хабада бижараб чIахIие бицараб харбил хIасил букIунарин. КIаралазги жидерго шагIир кIодо гьаюна гьей чIаго йикIаго, жиндир гьабураб адаб гьелда бихьулеб, лъалеб мехалда.
Шамай Хъазанбиева
 

 

Автор: ФИО или фамилия и инициалы автора

Газета №: Только число, без пробелов и др.символов. Например 43, от Число месяца выхода номера газеты. Например 12 Месяц выхода номера газеты. Например января Год выхода номера газеты. Например 2012г.





Уважаемый посетитель, Вы зашли на сайт как незарегистрированный пользователь.
Мы рекомендуем Вам зарегистрироваться либо войти на сайт под своим именем.

Комментарии:

Оставить комментарий

При использовании материалов сайта, активная гиперссылка на сайт Hakikat.Info обязательна!
При использовании материалов сайта в печатных СМИ, на ТВ, Радио - упоминание сайта обязательно!