Сделать домашней|Добавить в избранное
 
на правах рекламы

Маргьа

  • Версия для печати
Добавил(а): istina от 2-09-2015, 15:14
ВукIанила, вукIинчIила, вукIинего вукIинчIила цо мискинав гIолилав. Гьесда цIарги букIанила Сахрат. Бекьизе хур гьечIев, бокьоб боцIи гьечIев Сахратица бетIербахъи гьабулеб букIанила хъазал хьихьун, гьезул ханал, хIули бичун. Цо пуланаб къоялъ хъазал кваназаризе щварав гIолиласда гIурул рагIалда хъархъалъ гудраца ккураб цер батанила. ТIасаги бахъун гьалъул цIоко бичани бечелъила дунанги абун, вохарав Сахрат тамашалъанила. Бугилаха живго инсанасул гьаркьидалъун гьасда кIалъалеб цер. Гьелъ абунила, жибги хъун бахъараб цIакихъ дуе гIемер гIарац щвеларин. Амма чIвачIого тани, чIаго алжаналъуве ккезавилин жиндица мун. Божанила Сахрат царада. БатIа гьабун гудрадасагун биччанила гьес цер. Гьелъ гIолиласда гьаранила жиндие цо хъазги кьейин гьанже. Кьунила хъазги, анила церги. Хъазал хьихьизе Сахратги лъугьанила.
Анила цер, анила гьеб…. Ахирги щванила цо ханасул кIалгIаялде. Хважаинас дуе сайгъаталъе гьаб хъазги босун битIанин жибан абунила цараца ханасда. Ханас хъаз босанила. Амма кIварго гьабичIого царада нух бихьизабунила. Нилъер мегIер цо тун, чияр мегIер кIиго тун, щванила цер рохьобе. Гьениб цо хIохьода гIодобги чIун, кечI ахIизе лъугьанила. КватIичIого гьелда сверун ракIаранила гIемерал гIанкIалги бакьучалги. Гьез царада абунила гьаракь биччан ахIугейин кечI. Гьеб рагIун гIадамал рачIине бегьулин. Цараца тамашалъараб ххвел гьабунила. Ва абунила жиндица гIумру гьабулеб улка-ракьалда гIадамаз гIалхул хIайваналъе квалквал гьабуларин, гьелде квер борхуларин. Жидееги бокьилаанин гьединаб бакIалда яшав гьабизе, рачейин жалги гьениреян гьаранила гьез царада. Разилъанила цер.
Рачанила цараца гIанкIалги бакьучалги, рачанила. Щванила довго ханасул кIалгIаялде. Гьале, бетIерчIахъаяв хан, къабул гьаре дир хважаинас дуего ритIарал сайгъаталин кIалъанила цер. Гьаб нухалда ханас цер кваназабунила, квенги кьун берцинго нухда лъунила. Цер цебехун анила. Ахирги щванила рорхатал мугIрузде. Гьанибги байбихьанила цараца кечI ахIизе. Заманго иналде сверун ракIаранила ритIучIалги, бисалги, гIалхул цIцIаниги. Гьезги абунила царада дур хIинкъунгутIи щибан. Цощинаб тIаде чанахъан вачIани, чIван рехилагури гьесан. Тамашалъараб ххвелги гьабун, гьимулаго кIалъанила цер, гьедингийищин букIунебан. Бицанила гьелъ жиндир улка-ракьалда гIадамаз гIицIго бацIазде гурони чан гьабуларин. РитIучIазеги бисазеги гьениб хасало херги кьолин, кIалцIиги балин. Божанила гIалхул хIайванал царал харбида. Гьаранила гьез жалги рачейин гьеб лъикIаб улка-ракьалде. Доба киназего бакI гIелиланги абун, цадахъ гьелги рачун, билълъанила цер, билълъанила. Ахирги щванила довго ханасул кIалгIаялде. Гьаб нухалда хан рази-ракиго дандчIванила царада. РикIкIен гIемерал ритIучIаздасаги бисаздасаги вохарав гьес царада цIеханила хважаинасул ахIвал-хIал. Цараца бицанила гьев вугин балагьун бер гIунтIулареб улка-ракьалъулги цIакъго гIемераб гIи-боцIулги бетIергьан. Амма цо гIайиб бугин гьесда жеги хъизан гьабун гьечIолъиян лъугIизабунила гьелъ хабар. Ригьнаде кьезе гIурай яс жиндирги йигин, амма мустахIикъав чи щвезегIан тун йигин бицанила ханас. Цинги гьес царада гьаранила гьалгощинал сайгъатал жиндие ритIарав гIолилавги гьоболлъухъ вачун бачIине айин. Боха-хинлъун ханасулгун къо-лъикIги гьабун, къокъанила цер хъазал хьихьулев васасухъе. Абунила гьелъ Сахратида рукIаралъур хъазалги тун, ханасухъе вилълъайилан. Гьаб тIутIураб ретIелгун вилълъине рекъон гьечIилан чIанила вас. Ахирги цараца гьев мукIур гьавунила ва цадахъ вачанила. Унаго, унаго щванила ханасул кIалгIа бихьулеб бакIалде. Лъалхъанила гIурул рагIалда хIухьбахъизе. Цараца Сахратида абунила тIаса тIири течIого ретIелги бахъун, гIурулъе чвердезе лъугьайилан. Сахрат чвердезе лъугьаравго, цараца гьесул ретIел гIурулъе реханила ва "гъанкъулев вуго дир хважаин, гъанкъулев вуго дир хважаин!" анги ахIдолаго кIалгIаялде бекерун анила. Вихха-хочун лъугьарав ханасда цараца бицанила жиндир хважаинасул чу-ярагъги анин гIоралъ босун, дуе сайгъаталъе хулжал цIун босун букIараб месед-гIарацги анин хъамун. ХIала-балалъ хвасар гьавизе кIварав жиндир хважаинги хутIанин ретIине парталцин гьечIого.

(Хадусеб букIине буго)

Автор: ФИО или фамилия и инициалы автора

Газета №: Только число, без пробелов и др.символов. Например 43, от Число месяца выхода номера газеты. Например 12 Месяц выхода номера газеты. Например января Год выхода номера газеты. Например 2012г.





Уважаемый посетитель, Вы зашли на сайт как незарегистрированный пользователь.
Мы рекомендуем Вам зарегистрироваться либо войти на сайт под своим именем.

Комментарии:

Оставить комментарий

При использовании материалов сайта, активная гиперссылка на сайт Hakikat.Info обязательна!
При использовании материалов сайта в печатных СМИ, на ТВ, Радио - упоминание сайта обязательно!