Сделать домашней|Добавить в избранное
 
Главная » Новости - ЦIиял харбал » Нилъецаго гьабураб гурони батуларо
на правах рекламы

Нилъецаго гьабураб гурони батуларо

  • Версия для печати
Добавил(а): Musa от 22-01-2013, 10:42
Ахираб 15-20 соналда жаниб "ХIакъикъат" газеталда анцI-анцI макъала бахъана магIарул мацI цIунизе, школазда, гIолеб гIелалда гьеб малъизе ккеялъул хIакъалъулъ. Халкъалъул мацI - гьеб ккола халкъалъул рухI, миллаталъул цIар. МацI гьечIони, гьечIо миллатги. МагIарулазул тарих рехсон, адабияталъулги маданияталъулги бицун ва мацI цIуниялъе гIоло гьабулеб хIалтIулъ ниж сваказе, тархъизе гьечIо. Гьеб буго ва хадубккунги букIине буго редакциялъул аслиял рахъазул цояблъун.

  

Амма пашманлъизе ккараб жо буго миллаталъул цого-цо бугеб республикаялъулаб газеталъул хIалтIухъабаз гьабулеб ракIунтараб жигарчилъиялъул цо-цо магIарулаз гьабулеб гьечIеб адаб тей бихьидал.

  

Кинаб къимат кьелеб цо миллион чи вугеб магIарулазулги, масала, нилъедаса дагьаб къадаралъул лезгиязулги газеталъул подписка цого роцада букIиналъе? Гьебги, республикаялъул цогидал миллиял газетазул хIалтIухъабазгицин мукIурлъун абухъе, лъикIаблъун рикIкIунеб "ХIакъикъат" газета.

 

 

Хириял магIарулал! Газеталда хIалтIулел нижер мухбирзабазул моцIрое щолеб харж буго анцIазарго гъурущ. Гьеб гIемерищ, дагьищ бугебали, гьаб заманалда, бицинего ккеларо. Гьел руго лъайги бажариги бугел, бокьараб бакIалда хIалтIунги бажарулел, лъикIал харжал щвезе ресги бугел чагIи. Амма гьел унел гьечIо цогидаб иш-пишаялде. Щай? Щайгурелъул, гьел руго гIагараб миллатги, мацIги, гьелъул тарихги бокьулел, букIинеселъул ургъелги гьабулел, бакIвалиялъубе тIамулелдаса ТIадегIанас нилъей насиб гьабураб гьайбатаб магIаруллъиялъул рухIияб цебетIеялъе жидехъа бажарараб гьаби берцин бихьун, гьелъие ниятги гьабун хIалтIулелчагIи.

 

 

МацI цIунизе ккеялъул гIадада бицунеб хабар гуро. Дагьабниги пикру гьабулев чиясда бихьулеб бугелъул кинаб рахънибехун унеб бугеб мацIалъулги миллаталъулги ишали. Гьале, цIияб соналда цебе Россиялъул Пачалихъияб Думаялъ къабул гьабуна школазда миллиял мацIал малъи тIадаблъун гьабулареб хIукму. Гьеб хIукму къабул гьабулелъул цо чIинкьи бахъинчIо, Пачалихъалъул Думаялде нилъеца рищанин абулел Дагъистаналдаса депутатазул кIудияб къапилаялъул цонигиясулги.

 

 

Миллиял мацIазул рахъалъ законги къабул гьабичIого къехIун чIун букIараб нилъер республикаялъул парламенталъги, гьайгьай, гьелдаго рекъараб къотIила хIукму.

 

 

ГьанжегIаги берал рагье, кантIе, магIарулал! Депутатазги хIакимзабазги нилъер мацIги цIарги цIуниялде хьул лъоге - цIакъ кIодолъун буго гьездаги гIадатияб халкъалдаги гьоркьоб бугеб кьватIел.

 

 

Нижеца хьул ва божилъи гьабула гьаб тIадехун рехсаралъул дагьабниги пикруги гьабун щивав магIарулас "ХIакъикъат" газета хъвалин, цIалилин ва гIагараб магIарул мацI наслабазе цIуниялъулъ жидерго бутIа лъелин.

 

П. ПАХРУДИНОВ

 

 

ХIаракаталъул баракат камуларо

  

Газетазе подписка гьабулеб заманалда дун щвечIеб росу къанагIатги хутIун батиларо Шамил районалда. Хасго бухьен гьабуна школазул нухмалъулезулгун. Киналгоязде гIунтIун нухмалъулез газеталъе подписка гьабилин рагIи кьуниги, подписка гьабизе ккедал, кьураб рагIуе хилиплъаралги ккана.

  

Амма лъикIаб мисал бихьизабуна Гьандихъ росдал школалъ (20 "ХIакъикъат"), Гьолокь росдал школалъ (20), ТIасабакълъухъ росдал школалъ (20), ГIасаб росдал школалъ (20), Ругъелда росдал школалъ (16) газета хъваялдалъун. Гьебго заманалда камичIо "ХIакъикъаталъулгун" гьудуллъи кквезе бокьичIелги. Масала, 40 учитель хIалтIулеб ХIебда росдал школалда магIарул газета хъван буго 3 чияс, ХIотода росдал школалъул учительзабазда гьоркьоса - 2 чияс.

Районалъул КЦСНалъул коллективалъе буго кIудияб баркала. Гьезул 40 чи вугеб коллективалъ 30 газета хъвана.

Гьединго, баркалаялъе мустахIикъал руго ТIелекь росдал больницаялъул ва ХIебда росдал ясли-ахалъул коллективалги.

ХIебда росулъ бугеб хIалалъул бицани, исана газета хъвалезул къадар дагьлъана. Масала, цересел соназда 260 газета хъвалеб букIун батани, исана ХIебде бачIине буго 168 "ХIакъикъат".

 

 

Цогидал бакIаздаго гIадин Шамил районалдаги газеталъе подписка гьабулезул къадар дагьлъиялъе гIилла ккана почалъул хIалтIулъ реформаби гьарулел рукIин. ХIебдаса почтамтги Шамилхъалаялде бахъулеб букIиналъ, почалъул хIалтIухъабазулги абизегIанасеб гъира букIинчIо цересел соназда гIадин хIалтIи гIуцIизе. Гьеб гуребги, цебе рес букIана газета хъваразухъа гIарац хадуб бакIаризеги. Исанайин абуни гьединаб ресалдаса почалъул хIалтIухъаби махIрум гьаруна.

 

Газеталъе подписка гьабизе ккеялъул бицун аскIоре индал, цо-цояз гьеб басмаялдаса жидерго разилъи гьечIолъиги загьир гьабуна. Масала, гIемерисезе къабуллъулеб гьечIо магIарул мацIалда бахъулеб газеталда жаниб гIурусалъ кьолел гьурмал рукIин. Цогидаз гIайиб чIвана росабазул гIумруялде кьолеб кIвар дагьаб бугилан, лъикI хIалтIулел, жидеца мисал бихьизабулел магIишатазул биценго гьабуларила. Гьединго, газеталдаса рази гьечIезул пикруялда рекъон, "ХIакъикъаталъ" кIвар кьолеб рагIуларо хъамалчагIазул, ришватчагIазул бициналде ва гIумруялъулъ дандчIвалел гIунгутIабазул суалал рорхиялде. Бищунго квеш ккараб жо бугила газеталда бахъараб макъалаялъул хIасил кколеб гьечIолъи.

  

Кин батаниги, газеталъул коллективалъги заманалда цадахъ гали тIамизе хIаракат бахъулеб буго. Гьайгьай, гIунгутIаби камун гьечIо. Хьул буго исана "ХIакъикъаталъ" росдал гIумру бихьизабиялде кьолеб кIвар цIикIкIинабилин ва рехсарал гIунгутIаби лъугIизаризе хIаракат бахъилин абураб.

 

 Сайпула ГЬИТIИНАМУХIАМАДОВ



РЕДАКЦИЯЛЪУЛ РАХЪАЛДАСА:

Цересел соназде дандеккун цо-цо районазда "ХIакъикъат" хъвалезул къадар дагьлъаниги, гIамм гьабун босани, исана газеталъул тираж гIемерго цIикIкIана. Гьелъул къадар бахана 14 азаргоялдасаги цIикIкIун экземпляралде. Гьединаб тираж гьаб ахираб 5-10 соналда жанибцин букIинчIин абизе бегьула. Почалдасан газета хъваразул къадар 8704 чиясде баханиги, редакциялдасан хъвалезул къадар бащалъана щуазаргоялдасаги цIикIкIун чиясде. Гьелги ккола, аслияб къагIидаялъ, гIодоблъиялда гIумру гьабун ругел гIадамал. Гьединазухъе нижецаго газетал щвезарулеб къагIида билълъанхъизабулеб буго ва, хадубккун рес рекъани, гьединабго хIалалдаса пайда босизе хIаракат бахъила мугIрузул районаздаги. Амма цересел соназда лъикIал хIасилал рихьизарулел рукIарал Гъуниб районалда исана подписка гьабун буго 386 чияс, ЧIарада районалда - 173 чияс, БежтIа участок ва ЦIунтIа район дандекъан - 60 чияс. Цересел соназда гIадинал лъикIал хIасилал гьечIониги, мадар гьабуна Шамил районалъ (803), ЦIумада районалъ (787), Болъихъ районалъ - (761), Хунзахъ районалъ - (729), Гумбет районалъ (676), Казбек районалъ - (668), Унсоколо районалъ - (542), ГIахьвахъ районалъ - (461), Хьаргаби районалъ - (457), Лаваша районалъ - (370), ЛъаратIа районалъ - (364). Редакциялдасан газетал хъваразул къадарин абуни бахана 5345 чиясде. Гьединго, МахIачхъалаялда газета хъван буго 463 чияс, Гъизилюрталда - 241 чияс, Гъизляралда - 256 чияс, Буйнакскиялда - 95 чияс. "ХIакъикъаталъе" подписка гьабуразе баркала буго ва ракIалде ккола миллияб газета хъвалел гIадамал жеги рукIинин. Бокьараб мехалда рес бугелъулха газеталъе подписка гьабизе.

Газета №: 2, от 18 январь 2013г.





Уважаемый посетитель, Вы зашли на сайт как незарегистрированный пользователь.
Мы рекомендуем Вам зарегистрироваться либо войти на сайт под своим именем.

Комментарии:

Оставить комментарий

При использовании материалов сайта, активная гиперссылка на сайт Hakikat.Info обязательна!
При использовании материалов сайта в печатных СМИ, на ТВ, Радио - упоминание сайта обязательно!