Сделать домашней|Добавить в избранное
 
на правах рекламы

Цидул баркала

  • Версия для печати
Добавил(а): istina от 19-06-2015, 11:19
Цо къоялъ цо чIужугIадан йикIанила рохьил рагIалда бугеб жиндирго хурий чIарадулей. Свак чучизе гIодой чIарай гьалда бихьанила, квешал гьаркьалги гьарулаго, жиндаго тIаде рохьосан бачIунеб ци. РакI тIеледухъ хIинкъарай гьай тIуранила росулъехун, цийин абуни гьалда хадуб лъугьанила.
ХIинкъараб хIинкъиялъ гьей гIадан гIодой речIчIанила. ТIаде щвараб циялъ гьелда жиндирго хIатIил квачI бихьизабунила, гьебги бугоанила, зазги къан, гьорозеги гьорон, хьордол цIун. РекIеде ячIарай гIаданалъ цил хIатIидаса, рукIкIеналъ бикIун, заз бахъанила.
КIиабилеб къоялъги гьай йикIанила гьебго хурий чIарадулей. КIиабилеб къоялъги бачIанила ци гьелда аскIобе, мугъзада кIиго чахъуги чIван. Гьей гIаданалда аскIор гIиялъажалги тун, анила гьеб, рохьобехун балагьун, нахъбуссун.

Гьедин баркала кьунила циялъ жиндиего кумек гьабун, хIатIидаса заз бахъарай гIаданалъе.

 

Рагъ ккезе биччалареб сабаб

Бабаги дадаги телевизоралъухъ ралагьун рукIана. Дун дирго расанкIабиги сверун ран, васандилев вукIана. Цо заманалдасан эбелалъул синкъди рагIана дида. Валагьана - бугоха гьелъул бадисан гирун магIу бачIунеб. ВахI, дадацадай дир баба къварид гьаюрай абун ракIалде ккана ва дадахъ валагьана. Гьевги вугоан цIакъ пашманго.
Векерана бабада аскIове. "Мун щай гIодулей, баба? Щиб ккараб?" - ан гьикъана дица гьелда. Гьелъ телевизоралде килищ битIана: "Валагье, дир вас, дой ясалъул буго гIицIго кIиго лъагIел. Гьей лъукъана. Квешал чагIаз гьелъул эбел-эмен чIвана. Тохтурзабаз жийгоги хвасар гьаюна", - ян абуна гьелъ дида.
- Щай, баба, гьелъул бабаги дадаги чIварал? Щиб гьез гьабураб?
Бабаца магIу бацIцIунаго жаваб кьуна:
- Дозул улкаялда, Украинаялда рагъ унеб буго, дир вас.
- Щиб жо кколеб рагъ?
- Аллагьас гьеб дуда лъазе хъван батугеги, дир канлъи! 74 соналъ цебе цо вахIшияв чияс - гьесда цIар букIана Гитлер - ва гьесул къокъаялъ - гьезда абула фашисталин - байбихьана рагъ. Гьезие бокьун букIана батIи-батIиял миллатал жидее мутIигI гьаризе. ГIемерал гIадамал чIвана гьез.
Доб заманалда нилъер улкаялда Советияб Союзилан абулаан. Рагъалдаги цIар лъуна КIудияб ВатIанияб рагъилан. ВатIаниябин абиларищха, тIолабго халкъ ватIан цIунизе бахъиндал. Гъункараб, вацлъи-рекъел хирияб советияб халкъалъ фашистазда тIад бергьенлъи босана. Дуда ракIалда бугищ, доб дица бицараб жул бекиялъул хабар? Цо-цоккун щибаб гIучI бекани, бигьаго бекун бачIуна гьеб, амма цадахъго жул бекизеян лъугьани, лъихъаниги бекун бажаруларо. Гьеб жул гIадин цолъараб, гъункараб букIана тушманасде данде рагъде бахъараб миллатал гIемераб советияб халкъги.
Араб кIочене бегьуларо. Гьеб кIочон тана Украинаялда. Гьале гьанже рагъулъ буго гьеб улка: гIадамал чIвалел руго, халкъ гъурулеб буго.
- ГIадамал чIвалел яги цогидазе гьел чIвайилан буюрухъал кьолел жалго чIвазе бегьуларищ, баба?
- Квешлъиялде данде квешлъи гьабизе бегьуларо, дир дарман. Цин цогидал къагIидабиги ратун, рекъел гьабизе жигар бахъизе ккола.
- ВахIшиял, жагьилал ва квешлъи бокьулел гIадамаздаса гIакъилал ва лъикIал лъугьинарулеб дару-сабаб ургъизе бегьуларищ, баба?
- Мунго кIудияв гIедал, дуца ургъе, дир вас, гьединаб дарман.
- Ургъила, баба. ТIокIалъ рагъ хIан кьвагьдезеги гьечIо дун. Амма нилъер улкаялде кверщел гьабизе тушманас хIалбихьани, дунги вахъине вуго гьеб цIунизе! 

 

Автор: ФИО или фамилия и инициалы автора

Газета №: 23, от 19. 06. 2015 Месяц выхода номера газеты. Например января Год выхода номера газеты. Например 2012г.





Уважаемый посетитель, Вы зашли на сайт как незарегистрированный пользователь.
Мы рекомендуем Вам зарегистрироваться либо войти на сайт под своим именем.

Комментарии:

Оставить комментарий

При использовании материалов сайта, активная гиперссылка на сайт Hakikat.Info обязательна!
При использовании материалов сайта в печатных СМИ, на ТВ, Радио - упоминание сайта обязательно!