Сделать домашней|Добавить в избранное
 
Главная » Религия - Дин ва гIумру » Рамазаналъул хиралъи
на правах рекламы

Рамазаналъул хиралъи

  • Версия для печати
Добавил(а): istina от 19-06-2015, 10:59

ТIадегIанав Аллагьас Къуръаналда абулеб буго (магIна): "Ле, иман лъурал чагIи, нужеда тIадаблъун гьабун буго Аллагьас кIал кквезе, нужеда цере рукIарал умматазе гьабун букIарабго гIадин, нуж мунагьаздаса цIунун хутIизелъун". ("Бакъарат", 183). 

Абугьурайратица бицана: "Рамазан бачIарабго свалат-салам лъеяв аварагас асхIабзабазда рохел бицунаан ва абулаан: "Нужеде тIаде бачIун буго баракатаб моцI, жиндилъ кIал кквезе Аллагьас нужее паризаяблъун гьабураб ва къаси тIаде рахъун сордо чIаго гьабизе суннатаблъунги гьабураб. Рамазан моцI бачIарабго алжаналъул каваби рагьула ва жужахIалъул нуцIби къала. Гьеб моцIалъ шайтIаби рухьуна ва рамазаналъулъ буго азарго моцIалдаса хирияб цо сордоги", - абун.
ТIадегIанав Аллагьас рамазан моцIалъе гьарун руго гIемер хаслъаби: гьеб гьабун буго баракатаблъун, къадру цIикIкIараблъун, гьелъулъ гьабун буго цо сордо азарго моцIалдаса жиб хирияб. Щив чи вугониги цо лъикIлъи гьабун, гьев релълъуна цоги заманалда лъабкъоялда анцIго паризаяб гIамал гьабурасда. Рамазан ккола сабру гьабиялъул моцI, сабруялъул жазаян абуни ккола алжан. Рамазан ккола гIадамаз цоцазе боцIудалъун кумек гьабулеб, муъминчиясул ризкъи цIикIкIунеб моцI. Рамазан моцIалъ гьабизе лъикIаб буго ункъо пиша: кIигояб - нилъедаса Аллагь разилъулеб, кIигояб - нилъее чара гьечIого къваригIунеб. Нилъедаса Аллагь разилъулеб кIиго гIамал ккола шагьадат битIиги, истигъфар гьабиги. Нилъее чара гьечIого къваригIунеллъун ккола БетIергьанасда алжан гьариги, жужахIалдаса цIуни гьариги.
Хирияв аварагасул хIадисалда буго: "Щив чи вугониги рамазаналъ кIал ккун Аллагьасдаги божун, гIицIго Гьесие гIоло, Аллагьас гьесул церехун аралги хадур гьаруралги (гьитIинал) мунагьал чурула", - ян. Абугьурайратица бицараб хIадисалда буго: "Нужер БетIергьанас абулеб буго: "Адамил лъимералъ гьабулеб кинабниги лъикIлъи цIикIкIинабула анцIгоялдаса анкьнусгоялде щвезегIан, кIал хутIун. КIал буго Дие ва Дица жаза гьабула гьесие. Гьес тола жиндиего бокьараб жо Дие гIоло", - ян. "КIал буго жужахIалдаса цIунулеб къолден, кIал ккурасул кIалдиса букIунеб махIги Аллагьасда аскIоб цIикIкIун лъикIаб буго мискалдасаги. Нужер цонигияс кIал ккураб мехалда чорокал, хъубал рагIаби абуге, шаргIалъул гIорхъабиги рахунге. Цониги чи вагъулев яги хьандолев вугони, гьесда абе дица кIал ккун буго", - ян (Тирмизи).

Рамазаналъул адабал

Рамазан моцIалъ лъикIаб буго Къуръан цIалун, Аллагь рехсон, рес букIун щуябго как жамагIат гьабун мажгиталъуб бан рукIине. Пайда гьечIел пишабазда заман гIадада хвезабунгутIизе. Аллагьасул салам лъеяв аварагасул хIадисалда буго: "Рамазан моцIалъ гьабураб суннатаб гIамал кириялъул рахъалъ Аллагьас паризаяб гIамалалъул даражаялде бахинабула", - ян. Рамазан моцIалъ таравихIалъул какде хьвадизеги кIочене бегьуларо.
Аллагь разилъаяв ГIумар-асхIабас абун буго: "КигIан лъикIаб бидгIаха таравихIазул какал разе хьвади бугеб", - ан. Аллагьасул салам лъеяв аварагасул хIадисалда буго: "КIал ккурав чиясул кири хвезабулеб щуго пиша буго. Гьел ккола гьереси бицин; чияда нахъасан кIалъай; мацI гьаби; гьереси бицун гьеди; шагьваталдалъун чияр чIужуялде балагьи".
Рамазан моцIалъул адабалдасан ккола батIаго лъикIал-тIокIал тIагIамал чIезаризе лъугьинчIого, гIадатлъун батараб кванда гIей гьабун чIей. Гьаб моцIалъ хирияб буго цебехун как хутIарав, гьекъелалъулгун хурхен букIарав, зулму гьабурав, зина гьабурав, хъалиян бухIарав чияс тавбуги гьабун гьездаса инкар гьаби ва гьелги гьел гурелги квешал пишабаздаса ракIбухIун тавбу гьаби. Рамазан моцIалъ, хасго кIал биччалеб мехалда гьабураб дугIа нахъчIваларин буго хирияб хIадисалда.
Рамазан моцIалъ рукъалъул агьлугун воха-хинлъун, ракI гIатIидго вукIине, гьезие сайгъат-салам гIемер гьабизе, гьезие бигьалъаби гьаризе лъикIаб буго. Гьединго, унтаразухъе ваккизе ина, эбел-инсул, хириял чагIазул зияратаздеги хьвадила. Рамазаналъул адабаздасан ккола радакь вахъун кванай. Гьелъул хIакъалъулъ хIадисалда буго: "Цоги кваназе жо батичIони яги бокьичIони, цо нухалда лъим къулчIунги, цо чамасдак квананги кванай", - абун. Радакь кванаялда жаниб баракат цIикIкIун букIуна.

Рамазаналъул хиралъиялъул хIакъалъулъ цо-цо хIадисал

"Ле, гIадамал, нужеде тIаде щвана цIакъ къадруяб, кIудияб ва баракатаб моцI, жиндилъ азарго моцIалдаса хирияб сордоги бугеб, къад кIал кквезе тIадаблъун бугеб ва къаси сардал рорчIизе беццараб моцI. Гьеб моцIалъ гьабураб суннатаб гIамал цогидал моцIаз гьабураб паризаяб гIамалалда бащалъула ва гьеб моцIалъ гьабураб паризаяб гIамал, цогидаб мехалъ гьабураб 70 гIамалалда бащадаб букIуна. Гьеб буго сабруялъул моцI ва сабруялъулъ щолеб мухь - алжан буго. Гьеб буго ращалъиялъул ва гурхIел загьир гьабиялъул моцI". АсхIабзабаз абурабила аварагасда: "Я Аллагьасул Расул, киназулго гьечIо рес кIалккурав чиясе тIагIам кьезе".
"Гьаб моцI буго жиндир авал гурхIеллъун, бакьулъ бакI мунагьал чурилъун ва ахир жужахIалдаса тархъанлъилъун бугеб моцI. Нужеца гьеб моцIалъулъ дугIаялда тIадчIей гьабе, гьезул кIигоялъ Аллагь рази гьавула ва кIигояб гьечIого рукIине нужее рес гьечIо. Аллагь рази гьавулеб кIиго гIамал буго: шагьадат битIи ва истигъфар гьаби, гьечIого гIолареб кIиго пиша буго алжан гьариги жужахIалдаса цIуни гьариги".
"Нужеде тIаде щвана рамазан - баракаталъул моцI, Аллагьас нуж тIерхьинарула рахIматалъулъ, рацIцIуна нужер хатIаби, жаваб гьабула нужер дугIабазе, балагьула кин нужеца лъикIлъи гьабиялъулъ къец гьабулеб бугищали. Аллагь чIухIула нужедалъун малаикзабазда цеве. Гьединлъидал, нужеца бихьизабе Аллагьасда нужерго напсазул рахъаздасан лъикIлъи… ХIакъикъаталдаги, талихIкъарав чи вуго гьаб моцIалъулъ Аллагьасул рахIматалдаса махIрумлъарав чи".  

 

Автор: ФИО или фамилия и инициалы автора

Газета №: 23, от 19. 06. 2015 Месяц выхода номера газеты. Например января Год выхода номера газеты. Например 2012г.





Уважаемый посетитель, Вы зашли на сайт как незарегистрированный пользователь.
Мы рекомендуем Вам зарегистрироваться либо войти на сайт под своим именем.

Комментарии:

Оставить комментарий

При использовании материалов сайта, активная гиперссылка на сайт Hakikat.Info обязательна!
При использовании материалов сайта в печатных СМИ, на ТВ, Радио - упоминание сайта обязательно!