Сделать домашней|Добавить в избранное
 
Главная » Новости - ЦIиял харбал » Турциялда ругел нилъер мугьажирзабаз къватIибе биччан буго журнал
на правах рекламы

Турциялда ругел нилъер мугьажирзабаз къватIибе биччан буго журнал

  • Версия для печати
Добавил(а): istina от 5-06-2015, 10:03
Гьанжеялдаса 15-20 соналъ цебеги букIана магIарул диаспораялда хIалбихьун гьебго цIаралда гъоркь журнал биччазе. Амма, кIиго номерги басмаялда бахъун, батIи-батIиял гIиллаби сабаблъун, гьеб тIокIаб къватIибе бачIинчIо.
Гьале, гьанже цойги нухалъ Турциялъул магIарулаз хIалбихьулеб буго жидерго басма гIуцIизе. ТIоцебесеб иргаялда гьелъие квербакъаразул, гьелда канлъи бихьизе кумек гьабуразул цIарал рехсезе мустахIикъаблъун бихьулеб буго дида. Гьале гьел: Шигьабудин Озден (бетIерав редактор, шагIир, хъвадарухъан ва таржаман), МухIамад Эркин, Мустапа Йилмаз, Жагьид Йилдирим, Пахрудин Атаман, Рашид Зенгин, ГIали Аваркан ва цогидалги.
"МархIаба" абураб жиндирго цеберагIиялда Шигьабудин Озденица журнал гIуцIиялъул, гьеб биччаялъул мурадалъулги гьелда церечIарал масъалабазулги хIакъалъулъ хъвалеб буго гьадин: "ХIурматиял цIалдолел, къиматал ракьцоял! Дун талихIав вуго "Дагъистан" журналалъул тIоцебебсеб номералдалъун халатаб гьоркьоб къотIиялдаса хадуб нужеда цойги нухалъ мархIабайилан абизе. Нилъер "Дагъистан" журнал гьалдаса хадуб, иншааллагь, нуж, хириял цIалдолезул ва ракьцоязул квербакъиялдалъун, тIокIаб гьоркьоб къотIиларо ва жеги камилаб куцалда къватIибе биччалеб букIина. Нижер мурад буго нилъер бечедаб культураялъул ва тарихалъул цIех-рех гьабун, интересал харбал ва темаби ратун, гьел журналалда рахъи. Щайгурелъул нилъеда бихьулеб буго Дагъистаналъулги дагъистаниязулги хIакъалъулъ темаби гIолеб къадаралда басмаялда рорхулел гьечIолъи. Рорхулезулъги ратула гIунгутIаби, ялъуни мекъаб информация".
Полиграфиялъулги хIасилалъулги рахъалъ бечедго къачIараб журналалда руго Дагъистаналъулги Турциялъулги тематикаялда хурхарал гIемерал сураталги, эбелаб ватIаналъул ва диаспораялъул гIумруялъул, культураялъул, тарихалъул хIакъалъулъ хъварал макъалабиги, баяналги.
Редакторасул каламалдаса хадуб журналалъул цо гьумер цIураб информация буго Дагъистаналъул тIоцевесев имам ГъазимухIамадил хIакъалъулъ, хадусеб гьумералда кьураб "Дагъистан" гьудуллъиялъул жамагIат" абураб макъалаялъ цIалдолезул лъай-хъвай гьабулеб буго гьанжего-гьанже диаспораялда гIуцIараб магIарулазул цIияб жамагIияб гIуцIигун. Журнал цIалулезул умумузул ватIангун лъай-хъвай гьабиялъул мурадалда кIиго гьумералда кьун буго "Дагъистан" абураб информативияб макъала.
Журналалда кьурал материалазда гьоркьор гIемер интересаллъун рихьула Турциялда ругел Акпинар, Гюней, Ешилова, Зиринг, Каялик, Киреч, Ортатепе, Чалбухур, Эсадия, Яйла абурал дагъистаниязул росабазул тарихалъул, культураялъул, рукIа-рахъиналъул хIакъалъулъ макъалаби.
Масала, Кахраманмараш областалъул Гёксун районалда бугеб Киреч абураб гьитIинаб магIарул росу гIуцIун буго ЧIикIаса, Ингишиса, ЦIундиса, МелъелтIаса, Сивухъа ва Кванхидалъа гочарал мугьажирзабаз. Санайил кIудияб хIадурлъиялда гьенир тIоритIула магIарул миллиял тадбирал: "Оцбай" байрамги «ХинкIил» фестивальги. Гьел рохалил тадбиразде данделъула росулъ ругелги росу тун аралги гIадамал, районалдаса, мадугьалихъ ругел росабалъа гьалбал, щибаб хъизам-рукъалъ хIадурула квен, къачIала сурпа ва гь .ц.
Гьебго областалда бугеб цогидаб магIарул росдал хIакъалъулъ бицен гьабулеб руго "Ортатепе росу" абураб макъалаялда. Гьенир кьурал баяназда рекъон, гьеб росулъ гIемерго лъикI цIунун руго рахьдал мацIги, умумузул гIадаталги, миллияб гIамал-хасиятги. Турциялде гочаралдаса нахъе Ортатепе росдал гIадамаз щибаб соналъ тIобитIулеб буго Оцбаялъул байрам ва гьеб тадбиралда гIахьаллъулел руго аскIоса курдазул, турказул, чергесазул росабазул вакилзабиги областалъул нухмалъулелги.
Гьенибго кьун руго 1860-абилел соназда Ортатепе росу гIуцIарал тIоцересел магIарул тухумазул цIаралги: ГIабдулкаримилал, Давутилал, ГIалилал, ХIажимухIамадилал, Рамазанилал, ИсмагIилилал, МухIамадилал, Шамсулал ва цогидалги.
Диаспораялъул авторазул макъалабазда гьоркьоб интересаблъун буго "Имам (шайих) Шамил" абураб хъвадарухъан МухIамад Дагъистанлил макъала. Гьениб хъвараб жоялъул аслияб пикру загьир гьабун буго гьал рагIабазулъ: "Дунялалда бищунго гучаб пачалихълъун букIараб пачая-сул Россиялде данде бетIер борхарав шайих Шамил, гIицIго Кавказалда гуревги, тIолабго дунялалъул инсанияталъе мисаллъун вукIине бегьулезул цояв вуго. ТIолабго дунялалда лъазе ккола, гьадинал гIадамал цIакъ дагьал гурони рахъунареллъи".
Жакъа диаспораялда ругел магIарулазе рахьдал мацI хIажат букIиналъул, гьеб лъикI лъазе ккеялъул суалал рорхулел руго "ЖамагIаталъул гIумруялда мацI ва мацIалъул кIвар" абураб Жагьид Йилдиримил макъалаялда. Масала, авторас баян гьабулеб буго гьадинаб пикру: "Дун цIакъ талихIав вуго гьитIинго дида эбел-инсуца рахьдал мацI малъиялдаса. Гьелъул кумекалдалъун, Дагъистаналде щвараб мехалъ, щибниги къварилъи лъачIо дида. Лъалел ва лъаларел чагIигун эркенго кIалъалаан дун, эркенго ричIчIизарулаан мурадал ва гьединго бичIчIулаан гьез бицарабги гьезие бокьараб жоги".
МагIарул диаспораялда гIумру гьабулев вукIарав пагьмуяв шагIир, рагIул устар Меседул МухIамадил шигIрияб гьунаралъе сайигъат гьабураб буго АхIмад МуртазагIалиевасул "ГохIилазул Меседул МухIамад" абураб макъала.
Гъизилюрталдаса "Сулахъ" абураб лъималазул кьурдул ансамбль Турциялде бачIиналъул бицараб гьитIинабго информация журналалда магIарул мацIалда бахъи дида бихьула лъикIаб, пайдаяб гIадаталъул байбихьиялъе кьучI лъейлъун. Дир хIисабалда, гьеб ккола цIакъ кIвар бугеб хIужалъун, щайгурелъул гьелъ бихьизабулеб буго мугьажирлъиялда рахьдал мацI цIунизе, гьеб цебетIезабизе щулияб нигат букIин.
Берцинал сураталгун цадахъ гIатIидаб информация кьун буго журналалда Дагъистаналдаса вачIарав гьобол, "ХIакъикъат" газеталъул мухбир МухIамад Къебедовасул сапаралъул ва гьес хъвараб "Апарагзаби" абураб тIехьалъул хIакъалъулъ.
Интересал, ракIгъолел макъалабаздегун материалазде тIаде кьурал рекламабаз гъира бижизабула "Дагъистан" журнал кодобе босизе ва цIализе.
Дагъистан диаспораялда цIияб журнал бахъизе байбихьиялъ цойги нухалъ бихьизабулеб буго, халатаб заманалъ, гIасрабаз ватIаналдаса тIун ругониги, нилъер мугьажирзабазулъ жеги миллияб гIамалги, пикруги, тIабигIатги чIаго букIин, жиндир хасаб маданият, адабият ва тарих бугеб цо социалияб жамагIаталъул вакилзаби хIисабалда Турциялъул ракьалда жалго цIунизе гьез хIаракат бахъулеб букIин.
Нилъер хириял мугьажирзабазда, журналалда гIумру бихьизе гIоло квербакъаралщиназда гьеб бергьенлъиги ракI-ракIалъ баркулаго, киналго магIарулазул рахъалдасан бокьун буго цIияб журналалъе ва гьелъул коллективалъе гьаризе халатаб гIумруги, интересал макъалабиги, мугьажирлъиялда ругел магIарулазул мацIги, адабиятги, маданиятги цIунизе ва цебетIезабизе кIудияб хIаракатги!!! Хьул буго "Дагъистан" журналалъ цолъизабилин Турциялда бугеб дагъистаниязул жамагIат, чIаголъизе гьабилин гьелъул миллияб рухIги, магIарул махIги-яхIги, умумуз ирсалъе тараб тарихияб цIарги реццги!!! Нух битIаги дуе, "Дагъистан"!

Теги: АхIмад МуртазагIалиев

Автор: ФИО или фамилия и инициалы автора

Газета №: 21, от 5.06. 2015 Месяц выхода номера газеты. Например января Год выхода номера газеты. Например 2012г.





Уважаемый посетитель, Вы зашли на сайт как незарегистрированный пользователь.
Мы рекомендуем Вам зарегистрироваться либо войти на сайт под своим именем.

Комментарии:

Оставить комментарий

При использовании материалов сайта, активная гиперссылка на сайт Hakikat.Info обязательна!
При использовании материалов сайта в печатных СМИ, на ТВ, Радио - упоминание сайта обязательно!